¹ Ari raya Paskah ba ari raya Roti Ina'k Baragi akan dimulai'k dua ari agi'k. Imam-imam kapala ba ahli-ahli Taurat ngago'k cara untu' nangkap ba munuha'k Yesus ba tipu muslihat, ² barang kabatnne bakata: "Ame pas waktu ari perayaan, biar ame timu kaributan kaantara rakyat. ³ Sawaktu Yesus ada ka Betania, ka rumah Simon si kusta, ba agi'k duduk makatn, ataknglah seko'k nang bini ngicakng sege'k buli-buli pualam bainsi'k binyak narwastu murni nang maha ragae. Apas ia macahatn kapala buli-buli koa, ia nuhakng binyak koa ka atas kapala Yesus. ⁴ Ada urakng nang jaji bera tarus bakata ka dangan nang lain: "Untu' ahe pemborosan binyak narwastu nyian? ⁵ Barang binyak nyia bisa dijua talu ratus dinar labih ba duitte bisa dibareatn ka urakng-urakng miskin." "Tarus kabatnne merai'k nang bini koa. ⁶ Tapi Yesus bakata: "Biaratnlah ia. Ngahe kao nyusahatn ia? Ia udah ngalakukan perbuatan nang baik ka Aku. ⁷ Barang urakng-urakng miskin salalu ada ba kao tarus kao bisa nolong ia kamie pun kao mao'k, tapi Aku ina'k akan salalu ada ba kao. ⁸ Ia udah ngalakukan ahe nang bisa ia lakukan. Tubuh-Ku udah dimare'k binyak dihe sebagai persiapan untu' panguburanKu. ⁹ Aku bakata kakao: Sasidie dimae maan Injil dibaritaatn kasaluruh dunia, ahe nang ia minjawat nyian akan disabut untu' ngingat ia." ¹⁰ Tarus ampuslah Yudas Iskariot, seko'k dari kadua balas murit koa, ka imam-imam kapala bamaksut untu' nyarahatn Yesus ka kabatnne koa. ¹¹ Kabatnne karepoatn sidi sawaktu nangar ia ba kabatnne koa bajanji mao'k marea'k duit ka ia. Apas koa ia ngago'k kasampatan nang baik untu' nyarahatn Yesus. ¹² Sawaktu ari pertama dari ari raya Roti Ina'k Baragi, sawaktu urakng nyambaleh domba Paskah, murit-murit Yesus bakata ka Ia: "Kamae tampat nang Kao mao'k kami ampus untu' nyiapatn pajamuan Paskah untu'-Nyu?" ¹³ Lalu Ia nyuruh dua urakng murit-Te bapasatn: "Ampuslah ka kota'; dinaun kao ana akan batamu ba urakng nang ngicakng tapayatn enek nang bainsi'k ai'k. Tunaanlah ia ¹⁴ ba kataatnlah ka pamilik rumah nang ia namai'k koa: Pasatn guru: dimae gek ruangan nang dinyiapatn untu'-Ku makatn Paskah ba na'k murit-murit-Ku? ¹⁵ Lalu urakng koa ana akan nojokatn ka kao sabuah ruangan atas nang aya'k, nang udah langkap ba dah tasedia. Dikoalah kao harus nyiapatn pajamuan Paskah untu' diri'k!" ¹⁶ Tarus barangkatlah kadua murit koa ba sasampe e ka kota' koa, dinapati'k dikabatnne koa samua sasuai nang dingataatn Yesus ka kabatnne. Lalu kabatnne nyiapatn Paskah. ¹⁷ Apas ari maam, ataknglah Yesus ba kadua balas murit-murit-Te koa. ¹⁸ Sawaktu kabatnne duduk dikoa ba gi'k agi'k makatn, Yesus bakata: "Aku bakata ka kao, sasidie seko' kaantara kita'k nyian akan nyarahatn Aku, yakoa ia nang makatn ba Aku. ¹⁹ Tarus sedihlah ati kabatnne koa lalu seko'k-seko'k bakata ka-Ia: "Buke'k aku boh Tuhan?" ²⁰ Ia nyahuti'k: "Urakng koa ialah salah seko'k dari kita' nang badua balas nyian, ia nang nyalupatn roti kadaapm sete'k pingatn ba Aku. ²¹ Anak Manusia memang akan mati sasuai ba ahe nang ada tatulis parihal Ia, tapi cilakalah urakng nang oleh dihe Anak Manusia koa disarahatn. Labih baik bagi urakng koa kade'k sakira' e ia ina'k diparanakatn. ²² Sawaktu Yesus ba murit-murit-Te agi'k makatn, Yesus naap roti, lalu ngucapatn barakat, macah-macahatn ia tarus mareatn ia ka kabatnne lalu bakata: "Taaplah, nyianlah tubuh-Ku." ²³ Apas koa Ia naap cawan, ngucapatn sukur lalu mareatn ka kabatnne, tarus kabatnne samua e nyocok dari cawan koa. ²⁴ Ba Ia bakata ka kabatnne: "Nyianlah darah-Ku, darah pajanjian, nang dinumpahatn untu' manyak urakng. ²⁵ Aku bakata kakao: Sasidie Aku ina'k akan nyocok agi'k hasil pokok anggur sampe ka ari Aku nyocok ia, yakoa ari nang barahu, daapm Kerajaan Jubata. ²⁶ Apas koa kabatnne balagu ngalaguatn pujian, ampuslah kabatnne ka Bukit Zaitun. ²⁷ Tarus Yesus bakata ka kabatnne: "Kao samua akan tagoncang imannyu. Barang ada tatulis: Aku akan mangkong gembala ba domba-domba koa akan tacarai-barai. ²⁸ Tapi apas Aku bangkit, Aku akan nohoi'k kao ka Galilea." ²⁹ Ja Petrus ka-Ia: "Biarpun kabatnne koa samua tagoncang imanne, aku ina'k." ³⁰ Tarus ja Yesus ka ia: "Aku bakata ka kao, sasidie pada ari nyian, maam nyian uga'k, sanape'k manok nyingkokok dua kai, kao udah nyangkal Aku talu kai." ³¹ Tapi labih sidi-sidi agi'k Petrus bakata: "Sakaipun aku harus mati basama-sama Kao, aku ina'k akan nyangkal Kao." Samua nang lainpun bakata yakoa uga'k. ³² Tarus sampelah Yesus ba murit-murit-Te ka suatu tampat nang badama Getsemani. Ja Yesus ka murit-murit-Te: "Duduklah ka dian samintara Aku badoa." ³³ Lalu Ia ngicakng Petrus, Yakobus ba Yohanes ampus ba Ia. Ia sidi kagaianan ba tertekan, ³⁴ lalu jakata-E ka kabatnne: "Ati-Ku sidi sedih, aya mao'k mati rasae. Diapmlah dian ba bajaga-jagalah." ³⁵ Ia maju sadikit, ba nguringan diri'k e ka tanah lalu badoa biar sakira'k e mungkin, saat koa balalu dari pada-Ia. ³⁶ Jakata-E: "O Abba, o Apak, ina'k ada nang mustahil baginyu, taaplah cawan nyian dari Aku, tapi amelah ahe nang Aku maoan, tapi ahe nang Kao kehendaki'k" ³⁷ Apas koa Ia atakng agi'k, ba namui'k katiga e koa agi'k tidur. Lalu Ia bakata ka Petrus: "Simon, gi'k tidur ge'k kao? Ina'k me kao sanggup bajaga-jaga sajam maan? ³⁸ Bajaga-jagalah ba badoalah biar kao ame jantu'k ka daapm pancobaan; roh memang panurut tapi daging lamah." ³⁹ Tarus Ia ampus agi'k ba ngucapatn doa nang koa agi'k. ⁴⁰ Ba sawaktu Ia muakng agi'k, Ia napati'k kabatnne agi'k tidur, barang mata kabatnne koa udah barat ba kabatnne ina'k nauan mao'k bakataa'k ahe ka Ia. ⁴¹ Apas Ia muakng untu' katalu kai e lalu bakata ka kabatnne: "Angkitn tidurlah ba istirahatlah. Cukuplah. Waktu eudah atakng, tee'k, Anak Manusia disarahatn ka kokot urakng-urakng badosa. ⁴² Umpatlah, ije'klah diri'k dari. Ia nang nyarahatn na' Aku udah samak." ⁴³ Waktu Yesus masih bakata, muoklah Yudas, seko'k dari kadua balas murit koa, ba ia ada atakng sarombongan urakng nang ngicakng pedang ba pentungan, dinyuruh di imam-imam kapala, ahli-ahli Taurat ba tua-tua. ⁴⁴ Urakng nang nyarahatn na' Ia udah mare'k tanda nyia ka kabatnne koa: "Urakng nang ana ku idung, koalah Ia, tangkaplah Ia ba icaknglah Ia salamat." ⁴⁵ Ba sawaktu ia sampe dikoa ia langsung maju namui'k Yesus lalu bakata: "Rabi," lalu ngidung Ia. ⁴⁶ Tarus kabatnne naap Yesus ba nangkap-Ia. ⁴⁷ Salah seko'k dari kabatnne nang ada dikoa ngauasatn pedangnge lalu natakatn ia ka amba Imam Aya'k sampe putus tarenyekngnge. Ja Yesus ka kabatnne: "Kao nyangka Aku panyamun, ⁴⁸ tarus kao atakng langkap ba pedang ba pentungan untu' nangkap Aku? ⁴⁹ Padahal tiap-tiap ari Aku ada katangah-tangahnyu ngajar ka Bait Suci, ngahe kao ina'k nangkap Aku. Tapi haruslah diganapi'k nang tatulis daapm Kitap Suci." ⁵⁰ Tarus samua murit koa ningaatn Ia ba dariatn diri'k e. ⁵¹ Ada seko'k anak muda, nang sawaktu koa kahe make sabaah kaikng lenan untu' nutup badanne, nunaan Ia. Kabatnne koa mao'k nangkap ia ⁵² tapi ia ngalapasatn kaikngnge ba dari badoga. ⁵³ Apas koa Yesus dingicakng ngadap Imam Aya'k. Tarus samua imam kapala, tua-tua ba ahli Taurat bakomo'k dikoa. ⁵⁴ Petrus nunaan dari jauh, sampe kadaapm botang Imam Aya'k, ba dikoa ia duduk kaantara pangawal-pangawal sambi badiakng ka samak api. ⁵⁵ Imam-imam kapala, malah saluruh Mahkamah Agung ngagok kasaksian untu' Yesus biar Ia bisa diukum mati, tapi kabatnne ina namuan kasalahanne. ⁵⁶ Manyak urakng nang ngucapatn kasaksian palsu, untu' Ia tapi kasaksian-kasaksian koa ina'k sasuai sete'k ba nang lain ne. ⁵⁷ Tarus sangahe urakng naik saksi ngalawan Ia ba tuduhan palsu nyian: ⁵⁸ "Kami suah nangar urakng nyian bakata: Aku akan ngarobohatn Bait Suci buatan kokot manusia nyian ba daapm talu ari akan Kudiriatn nang lain, nang buke' buatan manusia. ⁵⁹ Daapm hal nyian pun kasaksian kabatnne koa ina'k sasuai sete' ba nang lain ne. ⁶⁰ Tarus Imam Aya'k bangkit badiri ka tangah-tangah sidang lalu batanya'k ka Yesus, jare: "Ina'k ge'k Kao mare jawapan atas tuduhan-tuduhan saksi-saksi nyian ka Kao?" ⁶¹ Tapi Ia tatap diam ba ina'k nyawap ahe-ahe. Imam Aya'k koa batanya'k sakai agi'k, jare: "Ahe ge'k Kao Mesias, Anak dari Nang Terpuji?" ⁶² Ja Yesus: "Akulah Ia, ba kao akan nee'k Anak Manusia duduk ka sabalah kanan Nang Mahakuasa ba atakng ka tangah-tangah rahu'k-rahu'k ka angit." ⁶³ Lalu Imam Aya'k koa ngarojekatn pakeanne ba bakata: "Untu' ahe diri'k pararu saksi agi'k? ⁶⁴ Kao udah nangar hujatan-Ne ka Jubata. Ayamae pandapatnyu?" Lalu ba suara nang bulat kabatnne mutusatn, kade'k Ia harus diukum mati. ⁶⁵ Tarus mulai'klah sangahe urakng ngaujahi'k Ia ba nutup muha-E ba ninju Ia sambi bakata ka-Ia: "Hei nabi, coba'klah tebak!" malah na'k pangawal-pangawal pun mangkongi'k Ia. ⁶⁶ Waktu koa Petrus masih ada ka babah, ka botang. Tarus ataknglah seko' pambantu' nang bini Imam Aya'k, ⁶⁷ ba sawaktu nang bini koa nee'k Petrus agi'k badiakng, ia nee'k muha e lalu bakata: "Kao uga'k salalu ba sama-sama ba Yesus, urakng nasaret koa." ⁶⁸ Tapi ia basangka tarus bakata: "Aku ina'k nauan ba ina'k ngarati ahe nang kao maksut." Tarus ia ampus ka sarambi depan [tarus nyingkokoklah manok]. ⁶⁹ Sawaktu pambantu' nang bini koa nee'k Petrus agi'k, bakatalah ia ka urakng-urakng nang ada dikoa: "Urakng nyian koa salah seko'k dari kabatnne koa." ⁷⁰ Tapi Petrus basangka agi'k. Ina'k lama apas koa urakng-urakng nang ada dikoa bakata agi'k ka Petrus: "Kao nyian pasti salah seko'k dari kabatnne, ahe agi'k kao nyia urakng Galilea!. ⁷¹ Tarus mulai'klah Petrus ngutuk ba basumpah: "Aku ina'k kanal ka urakng nang kao nyabut koa!" ⁷² Ba sawaktu koa ugak'k nyingkokoklah manok untu' kadua kai e. Tarus taringatlah Petrus, kade'k Yesus udah bakata ka ia: "Sanape'k manok nyingkokok dua kai, kao udah nyangkal Aku talu kai." Tarus nangislah ia sedih sidi.