¹ Sawaktu Yesus kauar dari Bait Suci, seko'k murit-Te bakata ka Ia: "Guru, tee'klah sidi kokoh he batu-batu koa ba sidi gagas se gadong-gadong koa!" ² Tarus Yesus bakata ka ia: Kao nee'k gadong-gadong nang hebat nyian? Ina'k sege'k batu pun akan dibiaratn ba susun ba batu-batu nang lain, samua e koa ana diruntuhatn." ³ Sawaktu Yesus duduk ka atas Bukit Jaitun, baadapatn ba Bait Suci, Petrus, Yakobus, Yohanes ba Andreas batanya'k ka Ia: ⁴ "Kataatnlah ka kami, kade'k koa ana jaji, ba ahe ge'k tanda e, kade'k samuae koa ana akan sampe ka ahire." ⁵ Tarus mulai'klah Yesus bakata ka kabatnne: "Waspadalah biar ame ada urakng nang nyasatatn kao! ⁶ Akan atakng manyak urakng nang make dama Ku tarus bakata: Akulah Ia, ba kabatnne ana akan nyasatatn manyak urakng. ⁷ Ba kade'k kao nangar bunyi baparang ge'k kabar-kabar parihal parang, amelah gulisah. Samua e koa harus tajadi, tapi koa nape'k baahir. ⁸ Barang bangsa akan bangkit ngalawan bangsa ba kerajaan ngalawan kerajaan. Akan ada gempa bumi ka manya'k tampat, ba akan ada kalaparan. Samua koa baru'klah pamulaan penderitaan pas mao'k masok ka jaman barahu. ⁹ Tapi ati-atilah! Kao akan disarahatn ka majelis agama ba kao ana akan dipangkongi'k ka rumah sambayang ba kao akan diadapatn ka panguasa-panguasa ba raja-raja karna Aku, untu' jaji kasaksian bagi dangan koa. ¹⁰ Tapi Injil harus dibaritaatn doho'k ka samua bangsa. ¹¹ Ba kade'k kao digiring ba disarahatn, amelah kao kuatir ka ahe nang ana akan kao kataatn, tapi kataatnlah ahe nang dikaruniaatn ka kao sawaktu koa uga'k, barang buke'k kao nang bakata-kata, tapi Roh Kudus. ¹² Seko'k saudara ana akan nyarahatn saudarae untu' dibunuh, yakoa ugak apa'k ka anakke. Ba anak-anakke akan malawan ka urakng tuha e ba akan munuh urakng tuha e. ¹³ Kao akan ditegetatn samua urakng karna di dama-Ku. Tapi urakng nang batahan sampe ka ahirre ia akan salamat." ¹⁴ "Kade'k kao nee'k pamunuh jahat badiri ka tampat nang ina'k sapatutte - para pambaca haruslah maratiatn nyian - tarus urakng-urakng nang ka Yudea haruslah dariatn diri'k e ka bukit. ¹⁵ Urakng nang agi'k ka paranginan ka atas rumah amelah ia turutn ba taama'k untu' naapa'k barang ka daapm rumahhe, ¹⁶ ba urakng nang gi'k ka uma amelah ia muakng untu' naapa'k baju e. ¹⁷ Cilakalah nang bini-bini nang ba buntikng ge'k pun nang nyusui'k ola e sawaktu koa. ¹⁸ Badoalah, biar samuae koa ame tajadi waktu munsim dingin. ¹⁹ Barang waktu koa akan jaji siksaan nang aya ina'k suah tajaji dari mulai'k dunia diminjawat, nang dinyiptaatn Jubata, sampe angkitn ba nang ina'k akan suah agi'k tajaji. ²⁰ Ba sakira'k e Jubata ina'k monokatn waktu e, maka dari sagala nang idup ina'k akan ada nang salamat; tapi barang karna urakng-urakng pilihan nang udah dimilih di-He, Jubata monokatn waktu e. ²¹ Sawaktu koa kade'k urakng bakata ka kao: Tee'klah, Mesias ada kanaun, ame kao picaya'k. ²² Barang mesias-mesias palsu ba nabi-nabi palsu akan muok ba kabatnne koa akan minjawat tanda-tanda ba mujisat-mujisat untu' ba maksutte, sakira e bisa nyasatatn urakng-urakng pilihan. ²³ Ati-atilah kao! Aku udah talabih doho'k ngataatn samua e nyian ka kao." ²⁴ "Tapi sawaktu koa, apas siksaan koa, mataari ana jaji galap ba buatn ina'k bacahaya ²⁵ ba bintakng-bintakng ana bajantuatn dari angit, kuasa-kuasa angit akan goncang. ²⁶ Ka masa koa urakng ana akan nee' Anak Manusia akan atakng daapm rahu'k-rahu'k ba sagala kakuasaan ba kamuliaan-Ne. ²⁷ Ba kawaktu koa pun Ia akan nyuruh kauar malaekat-malaekat-Te ba ana akan ngomoan urakng-urakng pilihan-Ne dari kaampat panjuru bumi, dari ujukng bumi sampe ka ujukng angit. ²⁸ Tariklah palajaran dari paumpamaan pohotn ara. Kade'k ranteng-rantengnge malamut ba mulai'k batarok, kao nauan, kade'k musim darakng udah samak. ²⁹ Yakoa uga'k, kade'k kao nee'k hal-hal koa ada tajadi, tauatnlah kade'k waktue udah samak, udah ka muha pintu. ³⁰ Aku bakata ka kao: "Sasidie angkatan nyian ina'k akan balalu se nape'k samua koa tajadi. ³¹ Angit ba buatn akan balalu, tapi pakataatn-Ku ina'k akan balalu. ³² Tapi parihal ari ge'k waktu e koa ina'k seko'k urakng pun nauan, malaekat-malaekat ka saruga ina'k ba Anak pun ina'k nauan, kahe Apak maan nang nauan." ³³ "Ati-atilah ba bajaga-jagalah! Barang kao ina'k nauan kade' kamie waktu e atakng. ³⁴ Sama hal e aya tolen urakng nang ampusa ka abut jauh, nang ningaatn rumahhe ba nyarahatn tanggong jawap ka pambantu-pambantu' e, masing-masing ba tugasse, ba marentahatn ka panunggu pintu supaya bajaga-jaga. ³⁵ Barang koa bajaga-jagalah, barang kai ina'k nauan kamie tuan rumah koa puakng, pas gumare'k ge'k dah maam, gek tangah maam, ge'k pas diniari, ³⁶ biar kade'k pas ia tiba-tiba atakng ame ia namui'k kao gi'k tidur. ³⁷ Ahe nang Ku kataatn ka kao, Ku kataatn ka samua urakng: bajaga-jagalah!"