¹ Aapm ari sidi imam-imam kapala basama tua-tua ba ahli-ahli Taurat ba samua Mahkamah Agungudah bulat mupakatte. Kabatnne ngikat Yesus lalu ngicakng-Ia ba nyarahatn-Ia ka Pilatus. ² Pilatus batanya'k ka-Ia: "Kao ge'k raja urakng Yahudi?" Ja Yesus: "Kao babaro ngataatn ia." ³ Tarus imam-imam kapala ngajuatn manyak tuduhan untu' Ia. ⁴ Pilatus batanya'k agi'k ka-Ia, jare: "Ina'k ge'k Kao mare jawapan? Tee'klah ayamae manyakke tuduhan dangan koa ka Kao!" ⁵ TapiYesus sama sakai ina'k nyawap agi'k, sampe Pilatus marasa heran. ⁶ Udah jaji kabiasaan untu' mebasatn seko'k urakng ukuman ka tiap-tiap ari raya koa sasuai pamintaan urakng manyak. ⁷ Ba sawaktu koa seko' urakng nang badama Barabas agi'k diminjaraatn basama-sama ba sangahe eko'k pambarontak lainne. Kabatnne koa udah ngalakukan pembunuhan daapm pambarontakan. ⁸ Tarus ataknglah urakng manyak ba minta'k supaya ampeatn kabiasaan koa diikuti uga'k ⁹ Pilatus nyahuti'k kabatnne koa tarus batanya'k: "Ahe ge'k nang kao maoan biar ku bebasatn urakng Yahudi nyian? ¹⁰ Ia memang nahui'k, kade'k imam-imam kapala nyarahatn Yesus karna dangki. ¹¹ Tapi imam-imam kapala ngasot urakng manyak untu' minta'k supaya Barabaslah nang dibebasatn untu' kabatnne. ¹² Sakai agi'k Pilatus nyahuti'k tarus batanya'k ka kabatnne: "Kade'k yakoa, ahe ge'k nang harus ku pabuat ka urakng nang kao nyabut raja urakng Yahudi nyian?" ¹³ Lalu kabatnne koa ngampak agi'k: "Salipatnlah Ia!" ¹⁴ Tarus PIlatus bakata ka kabatnne: "Tapi kajahatan ahe ge'k nang udah Ia ngalakukan?" Tapi kabatnne mangkin karas agi'k ngampak: "Salipatnlah Ia!" ¹⁵ Ba karna koa Pilatus mao'k muasatn ati urakng manyak koa, ia mebasatn Barabas untu' kabatnne. Tapi Yesus ia nyambuk tarus ia nyarahatn untu' disalipatn. ¹⁶ Apas koa saridadu-saridadu ngicakng Yesus ka daapm istana, lalu taama'k ka gedung pangadilan, ba nyaru'k samua pasukan bakomo'k. ¹⁷ Kabatnne makeatn jubah ungu ka-Ia, ngayam sabuah mahkota duri ba narohatn ia ka atas kapala-E. ¹⁸ Apas koa kabatnne mulai'k mare'k hormat ka-Ia jakata kabatnne koa: "Salam, hei raja urakng Yahudi!" ¹⁹ Kabatnne mangkong kapala-E ba buuh, ba ngaujahi'k-Ia ba balutut nyambah-Ia. ²⁰ Apas ngolo'k-ngolo'k Ia kabatnne nangaan jubah kurebakng ungu koa dari Ia ba nganaan uga'k pakaean-Ne ka Ia. Apas koa Yesus dingicakng ka uar untu' disalipatn. ²¹ Pas waktu koa lewat seko'k urakang nang badama Simon, urakng Kirene, apa'k Aleksander ba Rufus, nang baru'k atakng dari luar kota', ba urakng koa kabatnne maksa untu' mikut salip Yesus. ²² Kabatnne ngicakng Yesus ka tampat nang badama Golgota, nang ratie Tampat Tangkorak. ²³ Tarus kabatnne mare'k anggur bacampur mur ka-Ia, tapi Ia bai'. ²⁴ Apas kabatnne nyalipatn Ia, lalu kabatnne magi pakean-Ne ba muang undi untu' nantuatn bagian masing-masing. ²⁵ Pas jam sambilan sawaktu Ia dinyalipatn. ²⁶ Ba alasan Ia dingukum dinyabut ka tulisan nang tapasang dikoa: "Raja urakng Yahudi". ²⁷ Ba Ia dinyalipatn dua urakng panyamun, seko'k ka sabalah kanan ba seko'k ka sabalah keba'k-E. ²⁸ [Yakoa ganaplah nas Alkitab nang babunyi: "Ia akan taetong kaantara urakng durhaka."] ²⁹ Urakng-urakng nang lewat dikoa menghujat Ia, ba sambi ngelengan kapala kabatnne bakata: "Hei Kao nang mao'k ngarubuhatn Bait Suci ba mao'k mangun ia agi'k daapm talu ari, ³⁰ turutnlah dari salip koa ba salamatatnlah diri'knyu!" ³¹ Yakoa uga'k imam-imam kapala ba ahli Taurat ngoloan Ia ba ka sabayaatnne koa tarus kabatnne koa bakata: "Urakng lain Ia nyalamatatn, tapi diri'k-E babaro ina'k bisa Ia salamatatn! ³² Baiklah Mesias, Raja Israel, turutnlah dari salip koa, supaya kami nee'k ba picaya'k." Bahkan kadua urakng nang dinyalipatn basama-sama ba Ia nyaci Ia uga'k. ³³ Sawaktu jam dua balas, kagalapan ngaliputi'k saluruh daerah koa tajadi sampe jam tiga. ³⁴ Ba pas jam tiga koa ngampaklah Yesus nyarekng: "Eloi, Eloi lama sabakthani?", nang artie: Jubataku, Jubataku, ngahe Kao ningaatn Aku? ³⁵ Nangar koa, sangahe urakng nang badiri dikoa bakata: "Tee'klah, Ia nyaru'k Elia." ³⁶ Tarus ataknglah seko'k urakng ngicakng bunga karang, nyalupatn ia ka daapm anggur asapm lalu nyucukatn ia ka sabatakng buuh ba mareatn ia ka Yesus nyocok sambi bakata: "Baiklah diri'k tunggu ba nee'k ada ge'k Elia atakng untu' nurunan Ia." ³⁷ Tarus ngampaklah Yesus nyarekng ba nyarahatn nyawa-E. ³⁸ Waktu koa panutup Bait Suci tabalah dua dari atas sampe ka babah. ³⁹ Sawaktu kapala pasukan nang badiri baadapatn ba Ia nee'k mati-E ayakoa, bakatalah ia: "Sidi, urakng nyian Anak Jubata!" ⁴⁰ Ada uga'k sangahe eko'k nang bini nang nee'k dari jauh, kaantara kabatnne koa ada Maria Magdalena, Maria uwe'k Yakobus Muda'k ba Yoses, ba Salome uga'k. ⁴¹ Kabatnne samua e udah nunaan Yesus ba ngalayani'k Ia waktu Ia ka Galilea. Ba ada uga'k dikoa manyak nang bini lain nang udah atakng ka Yerusalem barage-rage ba Yesus. ⁴² Samintara koa ari mulai'k maam, ba ari koa adalah ari persiapan, yakoa ari menjelang Sabat. ⁴³ Karna koa Yusuf, urakng Arimatea, anggota Majelis Aya'k nang terkemuka, nang uga'k nunggu-nunggu Kerajaan Jubata, maranian diri'k e ngadap Pilatus ba minta' mayat Yesus. ⁴⁴ Pilatus waktu nangar Yesus udah mati. Tarus ia nyaru'k kapala pasukan lalu batanya'k ka ia Yesus udah mati gek' nape'k. ⁴⁵ Apas ia nangar keterangan kapala pasukan, ia muihan mareatn mayat koa ka Yusuf. ⁴⁶ Yusuf pun mali kaikng lenan, apas koa ia nurunan mayat Yesus dari salip ba ngapani'k Ia ba kaikng lenan koa. Tarus ia nguringan Ia ka daapm kuburan nang dingubakngi'k ka daapm bukit batu. Apas koa ia ngulingan sabuah batu ka pintu kuburan koa. ⁴⁷ Maria Magdalena ba Maria uwe'k Yoses nee'k dimae Yesus dinguringan.