¹ Barang koa ijeklah dirik ningaatn dasar-dasar nang dohok dari ajaratn parihal Karistus tarus baalih ka perkembangan ne nang sasidie. Amelah dirik narohatn agik dasar patobatan dari pabuatan-pabuatan sia-sia, ba dasar kapicayaatn ka Jubata, ² yakoa ajaran parihal babagai pambaptisan, panumpangan kokot, kabangkitan urakng-urakng mati ba ukuman kakal. ³ Ba koalah nang akan dirik pabuat, kade Jubata ngijinan. ⁴ Barang kabatnne nang suah di narakngi atie, nang suah nyacap barakat saruga, ba nang suah namu bagian daapm Roh Baraseh, ⁵ ba nang ngecap firman nang baik dari Jubata ba barakat-barakat dunia nang akan atakng, ⁶ tapi nang murtat agik, ina mungkin dibarahui sakai agik saayakoa, sampe kabatnne batobat, barang kabatnne nyalipatn agik Anak Jubata untu kabatnne babaro ba nyaci Ia ka muha umum. ⁷ Barang tanah nang ngisap aik ujatn nang suah turutn ka atase, ba nang ngasilatn tumbuh-tumbuhan nang baguna untu dangan nang ngarajaan iya, narima barakat dari Jubata; ⁸ tapi kade tanah koa ngasilatn tompoatn duri ba rumput duri, inaklah ia baguna ba udah samak ba kutuk, nang ahire di tunu. ⁹ Tapi, oi kamaruk-kamaruk ku nang ku ngasihi'k, sakaipun kami bakata ayakoa parihal kao, kami yakin, kade kao ada ba sasuatu nang labih baik, nang mengandung kasalamatan. ¹⁰ Barang Jubata buke ina adil, sampe Ia kaupaatn ka pakarajaatnnyu ba kasihnyu nang kao neeatn ka atas dama-E dipalayanan nyu ka urakng-urakng kudus, nang masih kao ngarajaan sampe angkitn. ¹¹ Tapi kami maok, biar kao masing-masing nunjukatn kasunguhan nang sama untu nyajiatn pengharapannyu jaji milik nang pasti, sampe ka ahire ana, ¹² biar kao ame jaji sawe'k tapi jaji panurut-panurut kabatnne nang oleh iman ba kasabaran namu bagian daapm ahe nang dijanjiatn Jubata. ¹³ Barang sawaktu Jubata mareaatn janji-E ka Abraham, Ia basumpah demi dirik-E babaro, barang ina ada nang labih tingi dari Ia, ¹⁴ jakata-E: "Sasidie Aku akan marakati'k kao balimpah-limpah ba akan minjawat kao manyak." ¹⁵ Abraham batunggu kadaapm kasabaran ba yakoalah ngihan ia namu ahe nang dinyanjiatn ka ia. ¹⁶ Barang manusia basumpah demi urakng nang labih tingi, ba sumpah koa jaji suatu pangukuhatn untu ia, nang ngahiri samua bantahan. ¹⁷ Barang koa, untu labih ngayakinkan kabatnne nang berhak narima janji koa akan kapastian kaputusan-Ne, Jubata udah ngikat dirik-E ba sumpah, ¹⁸ biar di dua kanyataan nang ina barubah-ubah parihal mae Jubata ina mungkin pangalok, dirik nang ngagok palindungan, namu dorongan nang kuat untu naap pengharapan nang ada ka depan dirik. ¹⁹ Pengharapan koa jangkar nang kuat ba nang aman untu jiwa dirik, nang dah udah dingalabuhatn sampe ka balakang tabir, ²⁰ dimae Yesus udah taama' jaji Parintis untu dirik, sawaktu Ia sasuai paraturan Melkisedek, jaji Imam Ayak sampe salama-lamae.