¹ Barang Melkisedek koa raja Salem ba imam Jubata Nang Mahatingi; ia ampus nyoso Abraham sawaktu Abraham muakng dari ngalahatn raja-raja, ba marakati' ia. ² Ka ia pun Abraham mareatn sapersapuluh dari samuae. Sasuai arti damae Melkisedek adalah pertama-tama raja kabanaran, ba ugak raja Salem, yakoa raja damai sajahtra. ³ Ia ina' ba apak, ina ba uwek, ina bapiturutn, arie ina ba awal ba idupe ina baahir, ba barang ia dinyajiatn sama ba Anak Jubata, ia tatap jaji imam sampe salama-lamae. ⁴ Pikiratnlah ayamae ayak e urakng koa, nang ka ia Abraham, apak leluhur dirik mare'k sapersapuluh dari sagala rampasatn nang paling baik. ⁵ Ba kabatnne dari anak-anak Lewi nang narima jabatan imam, namu tugas, sasuai ukum Taurat, untu naap persepuluhan dari urakng Israel, yakoa dari kamaruk-kamaruk kabatnne, sakaipun kabatnne nyian ugak katurunan Abraham. ⁶ Tapi Melkisedek, nang buke katurunan kabatnne, naap persepuluhan dari Abraham ba marakati' ia, biar pun ia pamilik janji. ⁷ Memang ina bisa disangkaatn, kade' nang labih babah dibarakati' dinang labih tingi. ⁸ Ba kadian manusia-manusia fana narima persepuluhan, ba kanaun Ia, nang parihal Ia dibare' kasaksian kade Ia idup. ⁹ Koa bisalah dikataatn, kade' ba parantara Abraham di taap ugak persepuluhan dari Lewi, nang berhak narima persepuluhan, ¹⁰ barang Ia masih ada ka daapm tubuh apak leluhure, sawaktu Melkisedek nyoso apak leluhur koa. ¹¹ Barang koa, andaikata di imamat Lewi udah taucap kasampuranaan-barang di imamat koa umat Israel udah narima Taurat- ahegek musabab pe masih pararu seko' urakng lain ditatapatn jaji imam ayak menurut paraturan Melkisedek ba nang parihal ia ina dikataatn menurut paraturan Harun? ¹² Barang, kade' imamat barubah, ukum Taurat koa pun ana akan barubah babaro e. ¹³ Barang Ia, nang kadian koa nang dimaksut, termasuk suku lain; dari suku nyian ina ada seko urakng pun nang suah malayani ka mezbah. ¹⁴ Barang udah dinaun samua urakng, kade Jubata dirik barasal dari suku Yehuda ba mengenai suku koa Musa ina suah bakata sasuatu ahe pun parihal imam-imam. ¹⁵ Ba hal koa jauh labih nyata agik, kade ditatapatn seko urakng imam lain menurut cara Melkisedek, ¹⁶ nang jaji imam buke berdasarkan paraturan-paraturan manusia, tapi berdasarkan idup nang ina bisa binasa. ¹⁷ Barang parihal Ia ada dimare kasaksian: "Kao koa Imam untu salama-lamae, sasuai paraturan Melkisedek." ¹⁸ Memang sete ukum nang dingauasatn doho'k dimatalatn, kade' ukum koa ina ada ba kakuatan ba karna koa jaji ina baguna,- ¹⁹ barang ukum Taurat sidi ina ngicakng kasampurnaan- tapi angkitn dinimuan pangarapan nang labih baik, nang nyamakatn dirik ka Jubata ²⁰ Ba sama aya tolen parihal nyian ina tajaji tampa sumpah - memang kabatnne udah jaji imam tampa sumpah, ²¹ tapi Ia ba sumpah koa, dingucapatn di-He nang bafirman ka-Ia: "Jubata udah basumpah tarus Ia ina akan nyasal: Kao koa Imam untu salama-lamae"- ²² yakoa ugak Yesus koa jaminan dari sete pajanjian nang labih kuat. ²³ Ba daapm jumbalah nang ayak kabatnne udah jaji imam, barang kabatnne dinyagah di maut untu tatap manjabat jaji imam. ²⁴ Tapi, barang Ia tatap salama-lamae, imamat-Te ina bisa ba alih ka urakng lain. ²⁵ Barang koa Ia sanggup ugak nyalamatatn ba nyampuranaan samua urakng nang di-He atakng ka Jubata. Barang Ia idup salalu untu jaji pangantara kabatnne. ²⁶ Barang Imam Ayak nang ayanyian nang dirik mararuatn; yakoa nang saleh, ina basalah, ina banoda, nang labih tingi daripada tingkat-tingkat saruga, ²⁷ nang ina aya tolen imam-imam ayak lain, nang satiap ari harus mempersembahatn korban untu dosae babaro ba apas koa baru'klah untu dosa umat te, barang hal koa udah Ia ngarajaan sakai untu salama-lamae, sawaktu Ia mempersembahatn dirik-E babaro sak jaji korban. ²⁸ Barang ukum Taurat natapatn urakng-urakng nang dinutupi ba kalamahan jaji Imam Ayak, tapi sumpah, nang dingucapatn apas koa dari ukum Taurat, natapatn Anak, nang dah udah jaji sampurana sampe salama-lamae.