¹ Barang satiap imam ayak, nang dimilih kaantara manusia, dinatapatn untu manusia daapm hubungan kabatnne ba Jubata, biar ia mempersembahatn persembahan ba pantaratn akibat dosa. ² Ia harus bisa ngarati urakng-urakng nang bodo ba urakng-urakng nang sasat, barang ia babaro pun lamah ugak, ³ nang ngarusatn ia untu mempersembahatn persembahan pantaratn akibat dosa, buke maan untu umat, tapi ugak untu diri e babaro. ⁴ Ba ina seko' urakng pun nang naap kahormatan koa untu diri'k e babaro, tapi di nyaruk untu koa di Jubata, aya tolen nang dah udah tajaji ka Harun. ⁵ Yakoa ugak Karistus ina' muliaatn diri'k-E babaro untu jaji Imam Ayak , tapi dimuliaatn di-He nang bafirman ka-Ia; "Anak-Ku Kao! Kao udah Kumaranakatn ka ari nyian", ⁶ Ayamae tolen firman-Ne nang daapm sete' nas lain: "Kao adalah Imam untu salama-lamae, menurut paraturan Melkisedek." ⁷ Daapm idup-Pe jaji manusia, Ia udah mempersembahatn doa ba pamohonan ba ratap tangis ba keluhan ka Ia, nang sanggup nyalamatatn-Ia dari maut, ba barang kasalehatn-Ne Ia udah dinangaratn. ⁸ Ba biarpun Ia koa Anak, Ia udah balajar jaji taat dari ahe nang udah di nagaratn di-He. ⁹ ba apas Ia nyampe ka kasampurnaan-Ne, Ia jaji pokok kasalamatan nang abadi untu samua urakng nang taat ka-Ia, ¹⁰ ba Ia dinyaru'k jaji Imam Ayak di Jubata, menurut paraturan Melkisedek. ¹¹ Parihal koa manyak nang harus kami kataatn, tapi nang susah untu kami jelasatn, barang kao udah sawe' daapm parihal panangaratn. ¹² Barang sakaipun kao, di tee dari sudut waktu, udah saharuse jaji pangajar, kao masih pararu agik diajaratn dasar-dasar pokok dari panyataatn Jubata, ba kao masih mararuatn susu, buke makanan karas. ¹³ Barang saepun masih mararuatn susu ia ina memahami ajaran parihal kabanaran, barang ia kamuda enek. ¹⁴ Tapi makanan karas koa untu urakng-urakng dewasa, barang nang ada ba pancaindra nang talatih untu bedaatn nang baik dari nang jahat.