¹ Barang diri'k ada ba manyak saksi, aya tolen rahu' nang ngulilingi' diri'k, ijeklah diri'k nangaan samua beban ba dosa nang sidi ngaintakngi'k diri'k, ba balomba kadaapm katekunan daapm palombaan nang dingawajipatn untu' diri'k. ² Ijeklah diri'k ngarajaan ia ba mata nang tatuju ka Yesus, nang mimpin diri'k daapm iman, ba nang ngicakng iman diri'k koa ka kasampuranaan, nang ina paduli kapenghinaan, sidi-sidi mikut salip nang baganti sukacita nang dinyiapatn untu Ia, ba nang angkitn duduk ka sabalah kanan tahta Jubata. ³ Sau ingatlah ka Ia, nang tekun nanggong bantahan nang sahebat koa terhadap diri'k-E dari pihak-pihak urakng badosa, biar ame kao jaji lamah ba putus asa. ⁴ Daapm pagumulan nyu ngalawan dosa kao nape' sampe nyucuratn darah. ⁵ Gek udah kaupaatn me kao nasehat nang bakata ka kao aya ka kamuda'-kamuda': "Oi anak-Ku, amelah anggap enteng didikan Jubata, ba amelah putus asa kade' kao diparingatatn di-He; ⁶ barang Jubata ngajar urakng nang di ngasihi' di-He, ba Ia malasah urakng nang Ia ngakoi'k anak. ⁷ Kade' kao harus nanggong ukuman, Jubata memperlakukan kao aya anak. Dimae gek ada anak nang ina' diajar di apa'k e? ⁸ Tapi kade' kao bebas dari ukuman, nang harus diderita satiap urakng, jajie kao buke'lah anak, tapi anak-anak gampang. ⁹ Apas koa: dari apa'k diri'k nang sabanare diri'k namu ukuman, ba ia koa diri'k hormati; kade' yakoa buke'k me diri'k harus labih taat ka Apa'k sagala roh, biar diri'k namuan idup? ¹⁰ Barang kabatnne ngajari'k diri'k daapm waktu nang ponok sasuai ba ahe nang kabatnne nganggap baik, tapi Ia ngajar diri'k untu kabaikan diri'k, biar diri'k namu bagian daapm kakudusatn-Ne. ¹¹ Memang tiap-tiap pangajaratn sawaktu ia dibareatn ina ngatangan sukacita, tapi kasedihan. Tapi apas koa ia ngasilatn buah kabanaran nang mareatn damai ka kabatnne nang dingalatih dihe. ¹² Barang koa kuatatnlah kokot nang lamah ba tuut nang gangatar; ¹³ ba ocoratnlah maraga untu pahanyu, biar nang pencang ame tapaleot, tapi jaji samuh. ¹⁴ Barusahalah idup babaikatn ba samua urakng ba gagui'klah kakudusatn, barang ina ba kakudusatn ina seko' pun urakng ana akan nee Jubata. ¹⁵ Jagalah biar ame ada seko' urakng pun nang nyauhatn diri'k e dari kasih pamareatn Jubata, biar ame tumuh akar pahit nang nimuan karusuhan ba nang ngotori'k manyak urakng. ¹⁶ Amelah ada urakng nang jaji cabul gek nang ba napsu nang babah aya Esau, nang nyua hak kasolonganne untu sapiring pamakanan. ¹⁷ Barang kao naun, kade' apas koa, sawaktu ia mao'k narima'a'k barakat koa, ia dinolak, barang ia ina namuan kasampatan untu maiki' kasalahatn ne, sakaipun ia ngagoi'k ia sampe nyucuratn ai'k mata. ¹⁸ Barang kao ina atakng ka bukit nang bisa disantuh ba ka api nang banyala-nyala, kadaapm kasuraman, kagalapan, ba angin badai, ¹⁹ ka bunyi sangkakala ba bunyi suara nang minjawat kabatnne nang nangar minta' biar ame agik bakata ba kabatnne, ²⁰ barang kabatnne ina tahan nangar parentah nyian: "Bahkan kade' binatang pun nang nyantuh bukit, ia harus ditabaki' babatu." ²¹ Ba sidi gai'k pamandangan koa, sampe Musa bakata: "Aku sidi kagaianan ba sidi gangatar." ²² Tapi kao udah atakng ka Bukit Sion, ka kota Jubata nang idup, Yerusalem sarugawi ba ka baribu-ribu malaekat, sote' pakomoan nang meriah, ²³ ba ka jemaat anak-anak sulong, nang damae tadaptar ka saruga, ba ka Jubata, nang menghakimi samua urakng, ba ka roh-roh urakng-urakng banar nang udah jaji sampurana, ²⁴ ba ka Yesus, Pangantara pajanjian barahu, ba ka darah pamaracikatn, nang bakata labih kuat dari pada darah Habel. ²⁵ Jagalah supaya kao ame nolak Ia, nang bafirman. Barang kade' kabatnne, nang nolak Ia nang nyampeatn pakataatn Jubata ka bumi, ina luput, ahe agik diri'k, kade' diri'k bapaling dari Ia nang bakata dari saruga? ²⁶ Waktu koa suara-E nguncangan bumi, tapi angkitn Ia mareatn janji; "Sakai agik Aku akan nguncangan buke kahe bumi maan, tapi angit ugak." ²⁷ Pakataatn "Sakai agik" nojokatn ka parubahan ka ahe nang bisa diguncang, barang ia di nyajiatn biar tatap singah ahe nang ina taguncakng. ²⁸ Jadi, barang diri'k narima kerajaan nang ina taguncakng, ijeklah diri'k ngucap sukur ba sambayang ka Jubata sasuai ba cara nang berkenan ka-Ia, ba rasa hormat ba gai'. ²⁹ Barang Jubata diri'k koa api nang ngangusatn.