¹ IMAN koa dasar dari sagala sasuatu nang diri'k ngarapatn ba bukti dari sagala sasuatu nang ina'k diri'k tee'. ² Karna imanlah udah dimareatn kasaksian ka na enek moyang diri'k. ³ Karna iman diri'k jaji ngarati, kade' alam semesta udah dinyajiatn di pakataatn Jubata, sampe ahe nang diri'k nee udah tajaji dari ahe nang ina' bisa diri'k tee' ⁴ Karna iman Habel udah nyarahatn ka Jubata korban nang labih baik dari pada korban nu' Kain. Ba jaatn koa ia namuan kasaksian kadiri'k e, kade' ia banar, barang Jubata suka ka persembahanne koa ba karna iman ugak ia masih bakata, apas ia mati. ⁵ Karna iman Henok tarangkat, biar ia ina ngalami'k kamatian, tarus ia ina ditamuan, barang Jubata udah ngangkat ia. Barang sanape' ia tarangkat, ia namu kasaksian, kade ia berkenan ka Jubata. ⁶ Tapi ina ba iman ina' mungkin urakng berkenan ka Jubata. Barang saepun nang bapalek ka Jubata, ia harus picaya kade' Jubata koa ada, ba kade' Jubata mare' upah ka urakng nang sidi-sidi ngagui'k Ia. ⁷ Karna iman, Nuh- ba patunjuk Jubata parihal sasuatu nang nape kateeatn-ba kataatatn ne nyiapatn bahtera untu nyalamatatn kaluargae; ba barang di iman koa ia ngukum dunia, ba ia dinantuatn untu narima' kasalamatan, sasuai ba imanne. ⁸ Karna iman Abraham taat, sawaktu ia di nyaru'k untu barangkat ka nagari nang akan ia tarima untu jaji milik pusakae, tarus ia barangkat ia ina nauan kamae tampat nang ia tujui'k. ⁹ Karna iman ia diapm ka tanah nang dinyanjiatn koa saolah-olah ka sote' tanah asing ba dikoa ia diapm ka kemah ba Isak ba Yakup, nang turut jaji ahli waris janji nang sote'k koa. ¹⁰ Barang ia ngantiatn kota nang ada memiliki'k dasar, nang direncanaatn ba di bangun di Jubata. ¹¹ Karna iman ia ugak ba Sara namuan kakuatan untu nurunan anak ucu'k, biarpun umure udah lewat, barang ia nganggap Ia, nang mareatn koa setia. ¹² Koalah sebappe, dari seko'k urakng nang udah mati pucuk, tapancar kakuatan aya'k, aya tolen bintakng ka angit ba aya pasir ka tapi laut, nang ina taetong manyake. ¹³ Daapm iman kabatnne samua nyian udah mati aya jaji urakng-urakng nang ina namuan ahe nang dinyanjiatn koa, tapi kahe nang dari jauh nee ba ngalambe-ngalambe ka ia ba nang ngakoi'k, kade' kabatnne koa urakng asing ba pandatang ka dunia nyian. ¹⁴ Barang kabatnne nang atakng bakata ayakoa matakatn, kade' kabatnne rindu ngagui'k sote' tanah ai'k. ¹⁵ Ba sakira'e daapm parihal koa kabatnne ingat ka tanah asal, nang udah kabatnne ningaatn, maka kabatnne cukup ada ba kasempatan untu'k puakng ka dikoa. ¹⁶ Tapi angkitn kabatnne ngarinduatn tanah ai'k nang labih baik yakoa sote'k tanah ai'k sarugawi. Barang koa Jubata ina' supe' disabut Jubata kabatnne, barang Ia udah nyiapatn sabuah kota' untu' kabatnne. ¹⁷ Karna Iman lalu Abraham, sawaktu ia dinyobai', nyarahatn Ishak. Ia, nang udah narima' janji koa, rela mempersembahatn anak ke nang toget, ¹⁸ biarpun ka ia udah dingataatn: "Katurunan nang barasal dari Isaklah nang akan disabut katurunannyu." ¹⁹ Barang ia bapikir, kade' Jubata bakuasa mangkitatn urakng-urakng sakaipun dari antara urakng mati. Ba dari koa ia saakan-akan udah narima' ia agik. ²⁰ Karna iman tarus Isak, sambi nee jauh ka depan, mareatn barakate ka Yakup ba Esau. ²¹ Karna iman lalu Yakub, sawaktu amper waktue ia mao'k mati, marakati'k dua anak Yusup, tarus nyambah sambi basanar ka kapala tongkate. ²² Karna iman lalu Yusup pas ka waktu ia maok mati mare'k nauan parihal kaluare urakng-urakng Israel ba mare'k pasatn parihal tuakng-tuakngnge. ²³ Karna iman lalu Musa, apas ia dimaranakatn, dinaporatn salama tiga buatn di urakng tuha e, barang kabatnne nee, kade' kamuda'k koa gagas muha e ba kabatnne ina' gai'k ka parentah raja. ²⁴ Karna iman lalu Musa apas dah aya'k ia nolak di sabut anak putri Firaun, ²⁵ barang ia labih suka menderita sengsara ba umat Jubata dari pada untu samintara nikmati'k kasenangan dari dosa. ²⁶ Ia nganggap penghinaan karna Karistus jaji kakayaatn nang labih aya'k dari pada samua harta Mesir, barang pandangane ia ngarahatn ka upah. ²⁷ Karna iman tarus ia ningaatn Mesir ina'k gai'k ka raja bera. Ia batahan sama aya saparati ia nee ahe nang ina' kateeatn. ²⁸ Karna iman lalu ia ngadaatn Paskah ba maracikatn darah, biar pamunuh anak-anak sulong ame nyantuh kabatnne. ²⁹ Karna iman lalu kabatnne udah ngaintasi Laut Merah sama aya saparati ngaintasi tanah karikng, sedangkan urakng-urakng Mesir tingaapm, sawaktu dangan koa nyoba ia ugak. ³⁰ Karna iman lalu runtuhlah dinikng-dinikng Yeriko, apas kota koa di ngulilingi tujuh ari lamae. ³¹ Karna iman tarus Rahap, nang bini sundal koa, ina turut binasa barage-rage ba urakng-urakng durhaka, barang ia udah nyambut pangintai-pangintai koa baik sidi. ³² Ba ahegek agik nang harus aku sabut? Barang aku ana kakurangan na' waktu, kade' aku nyuritaatn na' parihal Gideon, Barak, Simson, Yefta, Daud ba Samuel ba na' nabi, ³³ nang barang picaya udah ngalahatn kerajaan-kerajaan, ngarajaan kabanaratn, namuan ahe nang dinyanjiatn, ba nutup moot singa-singa, ³⁴ madaman api nang aya'k sidi. Kabatnne udah lapas dari mata pedang, udah namuan kakuatan daapm kalamahan, udah jaji kuat daapm paparangan ba udah minjawat mundur pasukan-pasukan tantara asing. ³⁵ Nang bini-bini udah narima agik urakng-urakngnge nang udah mati, barang dimangkitatn. Tapi urakng-urakng lain miaratn diri'k e disiksa ba bai' narima' pambebasan, biar kabatnne namuan kabangkitan nang labih baik. ³⁶ Ada ugak nang dinyaci ba dimalasah, bahkan dingarante ba diminjaraatn. ³⁷ Kabatnne dinabaki'k, dingaragaji, dimunuh ba pedang: kabatnne dari bapakean kuit domba ba kuit kambing sambi menderita kakurangan, kasasakatn ba siksaan. ³⁸ Dunia nyian ina layak untu kabatnne. Kabatnne mengembara ka padang gurun ba ka bukit-bukit, kadaapm goa-goa ba ka sisi-sisi bukit. ³⁹ Ba kabatnne samua ina' namuan ahe nang dinyanjiatn koa, sakaipun iman kabatnne udah mareatn ka dangan suatu kasaksian nang baik. ⁴⁰ Barang Jubata udah nyiapatn sasuatu nang labih baik untu' diri'k; barang ina' badiri'k kabatnne ina' bisa sampe ka kasampuranaan.