¹ Ka daapm ukum Taurat kahe ada bayangan maan dari kasalamatan nang akan atakng, buke sasidie dari kasalamatan koa babaro. Barang koa ba korban nang sama, nang satiap tahutn tarus-tarusan dipersembahatn, ukum Taurat ina mungkin nyampuranaan kabatnne nang atakng naap bagian ka daapme. ² Barang kade parihal koa mungkin, pasti urakng ina mempersembahatn korban agik, barang kabatnne minjawat ibadah koa ina sadar agik ka dosa apas dinyuciatn salama-lamae. ³ Tapi justru di korban-korban koa satiap tahutn urakng diparingatatn ka adae dosa. ⁴ Barang ina mungkin darah sapi laki gek darah domba laki ngapusatn dosa. ⁵ Barang koa sawaktu Ia taama'k ka dunia, Ia bakata: "Korban ba persembahan ina' Kao maoan - tapi Kao udah nyiapatn tubuh untuku -, ⁶ Ka korban nang di tunu ba korban pangapus dosa Kao ina berkenan. ⁷ Tarus Aku bakata: "Sidi, Aku atakng; ka daapm golongan kitab ada tatulis parihal Aku untu ngarajaan kamaoan Nyu, o Jubata-ku." ⁸ Ka atas Ia bakata; "Korban ba persembahan, korban nang ditunu ba korban pangapus dosa Kao bai' ba Kao ina berkenan ka nang koa" -biarpun dipersembahatn sasuai ukum Taurat-. ⁹ Ba apas koa jakata-E: "Sidi, Aku atakng untu minjawat kamaoan-Nyu." Nang dohok Ia ngapusatn, biar madiriatn nang kadua. ¹⁰ Ba barang kamaoan-Ne nyianlah dirik udah dingudusatn sakai untu salama-lamae di persembahan tubuh Yesus Karistus. ¹¹ Sataruse satiap imam minjawat tiap-tiap ari palayananne ba uwakng-uwakng nyarahatn korban nang sama,nang sama sakai ina bisa ngapusatn dosa. ¹² Tapi Ia, apas nyarahatn kahe sote' korban maan karna dosa, Ia duduk untu salama-lamae ka sabalah kanan Jubata, ¹³ ba angkitn Ia kahe ngantiatn saat te, dimae munsuh-munsuh-He ana akan dijajiatn tinyakatn paha-E. ¹⁴ Barang di sote' korban maan Ia udah nyampuranaan untu salama-lamae urakng nang Ia ngudusatn. ¹⁵ Ba parihal koa Roh Baraseh ugak mare' kasaksian ka diri'k, ¹⁶ barang apas Ia bafirman: "Nyianlah pajanjian nang akan Ku adaatn ba kabatnne apas waktu koa," Ia bafirman ugak: "Aku mao' narohatn hukum-Ku ka daapm ati kabatnne ba nulisatn koa ka daapm akal budi kabatnne, ¹⁷ ba Aku ina' agik ngingat dosa-dosa ba kasalahatn kabatnne, ¹⁸ Jadi kade' untu samuae koa ada pangamponan, ina pararu agik dipersembahatn korban karna dosa. ¹⁹ Jadi, kamaruk-kamaruk, di darah Yesus dirik angkitn panuh kabaranian bisa taama'k ka daapm tampat kudus, ²⁰ barang Ia udah muka' maraga nang barahu ba nang idup untu' dirik ngalalui'k tabir, yakoa diri'k-E babaro, ²¹ ba dirik ada seko'k Imam Ayak nang jaji kapala Rumah Jubata. ²² Untu koa ije'klah diri'k ampus ngadap ka Jubata ba ati nang tulus iklas ba kayakinan iman nang kuat, barang ati dirik udah dimarasehatn dari ati nurani nang jahat ba tubuh dirik udah dinyasah ba ai'k nang murni. ²³ Ijeklah dirik kuat nyingiik pangakoatn diri'k ka pangarapan diri'k, barang Ia, nang nyanjiatn koa setia. ²⁴ Ba ijeklah diri'k saling maratiatn biar dirik saling mendukung daapm kasih ba daapm pakarajaatn baik. ²⁵ Amelah diri'k nyauhatn diri'k dari patamuan-patamuan sambayang diri'k, aya nang dibiasaatn di sangahe urakng, tapi ijeklah diri'k saling mare'k nasehat, ba samangkin giat minjawat koa menjelang ari Jubata nang makin samak. ²⁶ Barang kade' diri'k singaja babuat dosa, apas namu pangatahuan parihal kabanaran, maka ina' ada agik korban untu ngapus dosa koa. ²⁷ Tapi nang ada yakoa kamatiatn nang mengerikan ka pangakiman ana ba api nang sidi aya'k nang ngagusatn samua urakng nang durhaka. ²⁸ Kade' ada urakng nang nolak ukum Musa, ia diukum mati tampa belas kasihatn di atas keterangan dua gek talu urakng saksi. ²⁹ Yamae labih barate ukuman nang harus dijantuatn ka atas ia, nang ninyak-ninyak Anak Jubata, nang nganggap najis darah pajanjian nang ngudusatn ia, ba nang nyaci Roh kasih karunia? ³⁰ Barang diri'k kanal ka Ia nang bakata; "Pambalasan koa hak-Ku. Akulah nang akan nuntut pambalasan." Ba ugak Ia bakata: "Jubata ana mao'k ngakimi umat-Te." ³¹ Gai'k sidi, kade jantu'k ka daapm kokot Jubata nang idup. ³² Ingatlah ka waktu nang dee. Apas kao narima' tarakng, kao manyak menderita barang kao batahan daapm perjuangan nang barat, ³³ baik waktu kao dinyajiatn tontonan panyaciatn ba penderitaan, gek pun waktu kao naap bagiatn daapm penderitaan kabatnne nang diperlakukan ayakoa. ³⁴ Memang kao udah ampus naap bagiatn daapm penderitaan urakng-urakng ukuman ba sawaktu harta nyu dingarampas, kao narima' parihal koa ka daapm sukacita, barang kao nauan, kade' kao pamilik harta nang labih baik ba nang labih manatap sipatte. ³⁵ Barang koa amelah kao ngalapasatn kapicayaatnnyu, barang ayak upah nang ana ngantiaatn. ³⁶ Barang kao mararuatn ketekunan, biar apas kao melakukan parentah Jubata, kao namu ahe nang dinyanjiatn koa. ³⁷ "Barang sadikit, bahkan sadikit sidi waktue agik, ba Ia nang akan atakng, udah akan ada, tampa nangguhatn kaatangan-Ne. ³⁸ Tapi urakng-Ku nang banar akan idup di iman, ba kade' sakirae ia ngunduratn diri'k, maka Aku ina berkenan ka ia." ³⁹ Tapi diri'k buke'lah urakng-urakng nang ngunduratn diri'k lalu binasa, tapi urakng-urakng nang picaya ba nang namuan idup.