¹ Memang pajanjian nang dohok ugak ada ba paraturan-paraturan untu ibadah ba untu tampat kudus buatan kokot manusia. ² Barang ada dinyiapatn sote'k kemah, yakoa bagian nang paling depan ba dikoa ada lampu badiri ba meja ba roti sajian kaatase. Bagian nyian disabut tampat nang kudus. ³ Ka balakang tirai nang kadua ada ba sote' kemah agik nang disabut tampat nang sidi kudus. ⁴ Dikoa ada ba mesbah pembakaran ukupan dari amas, ba tabut pajanjian nang samua e di nyaut ba amas; ka daapm tabut pajanjian koa ada ba buli-buli amas barinsi manna, tongkat Harun nang suah ba tarok ba loh-loh batu nang batulisatn pajanjian, ⁵ ba ka atase dua malaekat kamuliaan nang nonoik tutup pandamaian. Tapi parihal nyian ina bisa dirik omongan angkitn sacara taparinci. ⁶ Yakoalah carae tampat nang kudus koa dingatur. Tarus imam-imam sau taama'k ka daapm kemah nang paling depan koa untu kabatnne sambayang, ⁷ tapi kadaapm kemah nang kadua kahe Imam Ayak maan nang taama'k sakai satahutn, ba harus ba darah nang ia sarahatn barang dosa e babaro ba barang palanggaran-palanggaran, nang diminjawat di umat te sacara ina sadar. ⁸ Untu koa Roh Baraseh madahatn kade maraga ka tampat nang kudus koa nape tabuka, salama kemah nang pertama koa masih ada. ⁹ Koa paumpamaan jaman angkitn. Sasuai ba koa dipersembahatn korban ba persembahan nang ina bisa nyampuranaan kabatnne nang nyarahatn persembahan sasuai ati nurani kabatnne, ¹⁰ barang samuae koa, salain pamakanan panyocokatn ba babagai macam panyuciatn, kahe lah paraturan-paraturan untu idup sacara manusia, nang kahe balaku sampe atakng waktu pambaharuan. ¹¹ Tapi Karistus udah atakng jaji Imam Ayak untu hal-hal nang baik nang ana atakng: Ia udah ngaintasi kemah nang labih ayak ba nang labih gagas, nang buke diminjawat dikokot manusia,- ratie nang ina'k tamasok ciptaan nyian,- ¹² ba Ia udah taama'k sakai untu salama-lamae ka daapm tampat nang kudus buke ngicakng darah domba laki ba darah anak sapi, tapi ia ngicakng darah-He babaro. Ba nang koalah Ia namu kaapasatn nang kakal. ¹³ Barang, kade' darah domba laki ba paracikatn abu sapi muda' ngudusatn kabatnne nang najis, minjawat kabatnne di nyuciatn sacara lahiriah, ¹⁴ sidi labih he agik darah Karistus, nang di Roh nang kakal udah nyarahatn dirik-E babaro ka Jubata untu jaji persembahan nang ina' bacacat, akan nyuciatn ati nurani dirik dari pabuatan-pabuatan nang sia-sia, biar dirik bisa baibadah ka Jubata nang idup. ¹⁵ Barang koa Ia adalah Pangantara dari suatu pajanjian nang barahu, biar kabatnne nang udah tapanggil bisa narima bagian kakal nang di nyanjiatn, barang Ia udah mati untu nabus palanggaran-palanggaran nang udah dingalakukan salama pajanjian nang doho'k. ¹⁶ Barang dimae ada wasiat, dikoa harus dibare nauan parihal kamatian paminjawat wasiat. ¹⁷ Barang sete' wasiat baru'klah sah kade' paminjawat wasiat koa mati, ia ina balaku salama paminjawat wasiat koa masih idup. ¹⁸ Barang koalah, makae pajanjian nang dohok ina disahkan tampa darah. ¹⁹ Barang apas Musa mare' nauan samua parentah ukum Taurat ka samua umat, ia naap darah anak sapi ba darah domba laki ba ai'k, ba bulu merah ba hisop, tarus maraciki'k kitab koa ba samua umat, ²⁰ sambi bakata: "Nyianlah darah pajanjian nang dinatapatn Jubata untu kao." ²¹ Ba kemah ugak ba samua alat untu sambayang di maraciki'k dihe sacara yakoa ba darah. ²² Ba amper sagala sasuatu di nyuciatn sasuai ukum Taurat ba darah, ba tampa panumpahatn darah ina ada pangamponan. ²³ Jadi sagala sasuatu nang malambangkan ahe nang ada ka saruga haruslah di barasehatn sacara yakoa, tapi benda-benda saroga babaro di persembahan-persembahan nang labih baik dari koa. ²⁴ Barang Karistus buke taama' ka daapm tampat kudus pinjawatatn kokot manusia nang kahe jaji gambaran maan dari nang sabanare, tapi kadaapm saruga babaro untu ngadap ka kadiaman Jubata untu kapentingan diri'k. ²⁵ Ba Ia buke' taama'k untu bauwakng-uwakng mempersembahatn dirik-E babaro, ayamae Imam Ayak satiap tahutn taama'k ka daapm tampat kudus ba darah nang buke darahe babaro. ²⁶ Barang kade' yakoa Ia harus bauwakng-uwakng menderita dari salama dunia nyian diminjawat. Tapi angkitn Ia kahe sakai maan nyataatn dirik-E, ka jaman ahir untu ngapusatn dosa di korban-Ne. ²⁷ Ba sama aya manusia dinatapatn untu mati kahe sakai maan, ba apas koa di hakimi'k, ²⁸ yakoa ugak Karistus kahe sakai maan ngorbankan diri'k-E untu nanggong dosa manyak urakng. Apas koa Ia ana akan nyataatn diri'k-E sakai agik tampa nanggong dosa untu mareatn kasalamatan ka dangan, nang ngantiaatn Ia.