¹ Piharalah kasih pasaudaraan! ² Ame kao kaupaatn mare' tumpangan ka urakng, barang babuat yakoa sangahe urakng ina' ditauatn udah mare' makatn malaekat-malaekat. ³ Ingatlah ka urakng-urakng ukuman, barang kao babaro ugak adalah urakng-urakng ukuman. Ba ingatlah ka urakng-urakng nang diperlakukan samao'k-mao'k e, barang kao babaro ugak masih idup ka dunia nyian. ⁴ Haruslah kao samua ngormati perkawinan ba amelah kao ngotori'k tampat tidur, barang urakng-urakng sundal ba tukang cabul ana akan di hakimi Jubata. ⁵ Amelah kao jaji amba duit ba cukupatnlah diri'knyu ba ahe nang ada ka kao. Barang Jubata udah bakata: "Aku sakai-kai ina akan miaratn kao ba Aku sakai-kai ina akan ningaatn kao." ⁶ Barang koa daapm kayakinan diri'k bisa bakata: "Jubata adalah panolongku. Aku ina akan gai'k. Ahe gek nang bisa dipinjawat manusia ka aku?" ⁷ Ingatlah ka pamimpin-pamimpin nyu, nang udah nyampeatn pakataatn Jubata ka kao. Paratiatnlah ahir idup kabatnne ba contohlah iman kabatnne. ⁸ Yesus Karistus tatap sama, baik tumare'k gek pun ari nyian ba sampe salama-lamae. ⁹ Amelah kao disasatatn di bamacam-macam ajaran asing. Barang nang baik koa, kade' atinyu dipakuat ba di kasih karunia buke' ba di macam-macam makanan nang ina mare paedah ka kabatnne nang nuruti aturan-aturan makanan macam koa. ¹⁰ Diri' ada ba sote' mesbah ba urakng-urakng nang malayani' kemah ina' muih makatn dari ahe nang ada ka daapm me. ¹¹ Barang tubuh binatang-binatang nang darahhe dingicakng taama'k ka tampat kudus di Imam Ayak jaji korban pangapus dosa, di nunu ka uar perkemahan. ¹² Koa ugaklah barange Yesus udah mandarita ka uar pintu garabang untu ngudusatn umat-Te badarah-He babaro. ¹³ Untu koa ijeklah diri'k ampus ka-Ia ka uar perkemahan ba nanggong kahinaan-Ne. ¹⁴ Barang kadian diri'k ina ada batampat badiapm nang tatap; diri'k ngagok kota nang ana atakng. ¹⁵ Untu koa ijekalh diri'k, untu Ia, sau nyarahatn korban sukur ka Jubata, yakoa barupa ucapatn beber nang muliaatn dama-E. ¹⁶ Ba amelah kao kaupaatn babuat baik ba mare banto'an, barang korban-korban nang yakoalah nang berkenan ka Jubata. ¹⁷ Taatilah pamimpin-pamimpinnyu ba tunduklah ka kabatnne, barang kabatnne koa nang bajaga-jaga ka atas jiwanyu, jaji urakng nang harus batanggong jawap kaatase. Ba jaatn koalah kabatnne ngalakukan koa ba parasaan nang repo, buke ba kaluh kesah, barang parihal koa ina akan ngatangan kauntungan baginyu. ¹⁸ Badoalah tarus untu kami; barang kami yakin, kade ati nurani kami koa baik, barang ka daapm sagala hal kami maoan sote' idup nang baik. ¹⁹ Ba sacara kusus aku nasehati'k kao, biar kao mabuat koa, biar aku labih bijak dipuangan ka kao. ²⁰ Jubata damai sajahtera, nang di darah pajanjian nang kekal udah ngicakng agik dari urakng mati Gembala Agung sagala domba, yakoa Yesus, Jubata diri'k, ²¹ kira'k e ngalangkapi kao ba sagala nang baik untu minjawat kamaoan-Ne, ba ngarajaan ka daapm diri'k ahe nang berkenan ka-Ia, di Yesus Karistus. Untu Ia lah kamuliaatn sampe salama-lamae!. Amin. ²² Ba aku nasehati'k kao, kamaruk-kamaruk, biar kata-kata nasehat nyian kao sambut ba daapm karelaan ati, sakaipun ponok maan suratku nyian ka kao. ²³ Tauatnlah, kade Timotius, kamaruk dirik udah barangkat. Sabijakke ia atakng, aku ana ngampusia' kao barage-rage ba ia. ²⁴ Sampeatnlah salam ka samua pamimpin nyu ba samua urakng kudus. Tarima'lah salam dari kamaruk-kamaruk ka Italia. ²⁵ Kasih karunia nyaratai kao samua.