¹ Kami ina bisa tahan agik, koalah kami naap kaputusan untu diapm babaro maan ka Atena. ² Lalu kami ngirim Timotius, ayukng nang bakaraja ba kami untu Jubata daapm pambaritaan Injil Karistus, untu nguatatn ati nyu ba nasehati kao ka daapm imannyu. ³ Biar ame ada urakng nang goyang imane karna kasusahatn-kasusahatn nyian. Kao babaro nauan, kade dirik dinantuatn untu koa. ⁴ Barang ugak waktu kami sirage ba kao, udah kami matakatn ka kao, kade dirik ana ngalami kasusahatn,Dan parihal koa aya nang kao nauan, udah kajadian. ⁵ Koalah jajie, aku ina bisa tahan agik, udah ku ngiriman ia, biar aku nauan pakara imannyu, barang aku kuater kade-kade kao udah dinyobai di si pangoda ba kade usaha kami sia-sia. ⁶ Tapi angkitn, apas Timotius atakng umpat ka kao, ba ngicakng kabar nang ngembiraatn parihal imannyu ba kasihnyu, ba kade kao sau narohi'k kenang-kenangan nang baik atas kami ba mao'k batamua ba kami,aya kami pun ugak taniti maok batamua'k ba kao. ⁷ Barang koalah ugak, kamaruk-kamaruk, daapm sagala kasasakatn ba kasusahatn kami jaji tahibur dinyu ba imannyu. ⁸ Ampeatn kami idup agik, asal maan kao kuat badiri ka daapm Tuhan. ⁹ Barang ucapan sukur ahe gek nang bisa kami sambahatn ka Jubata atas sagala sukacita, nang kami namuan karna kao, ka adapatn Jubata dirik? ¹⁰ Siakng maam kami badoa sidi-sidi biar dirik bisa muha batamu muha ba nambahatn ahe nang masih kurang ka imannyu. ¹¹ Kirae, Ia Jubata, Apak dirik, ba Yesus, Jubata dirik, mukaatn kami maraga ka kao. ¹² Ba kirae Tuhan nyajiatn kao batambah-tambah dan bakalimpahatn daapm kasih sekok urakng ba nang lain ba samua urakng, aya tolen kami ugak ngasihi kao. ¹³ Kira'e Ia nguatatn atinyu supaya ina ba cacat dan kudus, ka adapatn Jubata Apak dirik, pas waktu kaatangan Yesus Tuhan dirik, ba samua urakng kudus-E.