¹ Kita' babaro pun memang nauan, kamaruk-kamaruk, kade' ka atangan kami ka kita' nyian ina lah sia-sia. ² Tapi biarpun kami sanape e, aya nang kao nauan, udah di nyaci, di nganiaya ka Filipi, tapi karna pertolongan Jubata dirik, kami namu kabaranian untu maritaatn Injil Jubata ka kao ka daapm perjuangan nang barat. ³ Barang nasehat kami ina lahir dari kasesatan atau dari maksud nang ina murni dan ina di campur ba tipu daaya. ⁴ Sabalike, karna Jubata udah nganggap kami pantas untu micayaatn Injil ka kami, koalah makae kami bakata, buke untu ngarepoatna'k manusia, tapi untu ngarepoatn Jubata nang nguji ati dirik. ⁵ Jukut kami ina suah ba moot manis- hal koa kao nahuik- ba ina suah punya maksud dirajatn (rakus/loba)nang diam-diam- Jubata lah saksie- ⁶ ugak ina suah kami ngago pujian ka manusia, baik dari kao, mao'k pun dari urakng-urakng lain, sakaipun kami bisa babuat ayakoa sabagai rasul-rasul Karistus. ⁷ Tapi kami babuat ramah ka antara kita'k, sama aya seko'k uwe'k nang mihara ba ngarawat anake. ⁸ Yakoa lah kami, daapm kasih sayakng nang aya'k untu kao, buke kahe rela magiik Injil Jubata ba kao, tapi idup kami babaro pun ugak untu kao, soale kao kami ngasihi sidi. ⁹ Barang kita'k masih ingat, kamaruk-kamaruk, ka usaha ba kapa' lalah kami. Samintara kami bakaraja siakng maam, biar ame jaji beban bagi sae pun ka antara kita'k, kami maritaatn Injil Jubata ka antara kita'k ¹⁰ Kao ba Jubata lah saksi, sidi saleh, adil, ina ba cacate kalakuan kami ka antara kita'k nang picaya. ¹¹ Kao nauan, yamae kami saparati apak ka anak-anake, udah nasehati'k kao ba nguatatn ati kitak sekok-sekok, ¹² ba minta sidi-sidi, supaya kitak idup sasuai ba kamaoan Jubata, nang nyarui kao ka daapm kerajaan ba kamulaian-Ne. ¹³ Koalah kami ina putus-putuse ugak ngucap sukur ka Jubata, barang kao udah narima firman Jubata nang kami maritaatn koa, buke jaji pakataatn manusia, tapi - memang sidi-sidi yakoa - sabagai firman atau pakataatn Jubata, nang bakaraja ugak ka daapm kao nang picaya. ¹⁴ Barang kita'k kamaruk-kamaruk udah jaji panurut jemaat-jemaat Jubata ka Yudea. Jemaat-jemaat ka daapm Yesus Karistus, barang kao ugak udah menderita dari ayukng-ayukng sabangsa nyu sagala sesuatu nang kabatne derita dari urakng-urakng Yahudi. ¹⁵ Bahkan urakng-urakng Yahudi koa udah munuh Tuhan Yesus ba na nabi ba nang udah ugak nyingsaraatn kami. Ahe nang gagas ka mata Jubata ina kabatne paduliatn ba samua manusia kabatne koa munsuhi, ¹⁶ Barang kabatne mao'k ngalang-ngalangia kami maritaat na' firman ka bangsa-bangsa nang lain untu kasalamatan kabatne. Yakoalah kabatne tarus-tarusan nambahi dosa sampe ganap jumbalahe ba angkitn ukuman udah nimpa kabatne sasidie. ¹⁷ Tapi kami kamaruk-kamaruk nang saketika tapisah dari kao, jauh ka mata, tapi ina jauh ka ati, sidi-sidi ba karinduan nang ayak, udah barusaha untu atakng nabo'k kao. ¹⁸ Barang kami udah baniat untu' atakng ka kao- aku Paulus, malahan labih dari sakai-, tapi ibalis dah nyagah kami. ¹⁹ Barang sae gek pangarapan kami gek karepoatn kami gek mahkota kagagasatn kami ka adapatn Yesus, Tuhan dirik, pas waktu ka atangan-E, kade buke kao? ²⁰ Sidi, kaolah ka muliaan kami ba karepoatn kami.