¹ Ahire, kamaruk-kamaruk, kami minta ba nasehati kao daapm Jubata Yesus: Kao udah nangar dari kami ayamae kami harus idup supaya berkenan ka adapatn Jubata. Hal koa memang udah kao nuruti, tapi baiklah kao ngalakukan koa labih sidi-sidi agik. ² Kao nauan ugak patonjok-patonjok mae nang udah kami mareatn ka kao atas dama Jubata Yesus. ³ Karna nyianlah kamaoan Jubata: kakudusatn nyu, yakoa biar kao nyauhi pancabulan, ⁴ biar kao masing-masing naap sekok urakng nang bini jaji bini nyu babaro, ba idup ka daapm kakudusatn ba kahormatan, ⁵ buke kadaapm kamaoan hawa nafsu, aya nang dah diminjawat di urakng-urakng nang ina kanal ka Jubata, ⁶ dan biar daapm hal-hal nyian urakng ame minjawat kamaruk e jaji ina baik atau ugak ma baga ia. Jukut Jubata koa adalah pamaas dari samuae nyian, aya tolen nang udah kami matakatn ba nagasatn dee ka kao. ⁷ Jubata nyaruk dirik buke minjawat ahe nang kotor, tapi ahe nang gagas. ⁸ Barang koalah sae nang nolak nyian buke lah nolak manusia, tapi nolak Jubata nang udah mareatn ugak Roh-E nang kudus ka kao. ⁹ Parihal kasih pakamaruatn ina pararu di tulisatn ka kao, jukute kao babaro udah balajar kasih ngasihi dari Jubata. ¹⁰ Hal koa kao ngalakukan ugak ka samua kamaruk ka saluruh wilayah Makedonia. Tapi kami nasehati' kao kamaruk-kamaruk biar kao labih sidi-sidi agik ngalakukan iya. ¹¹ Ba anggaplah aya sote'k kahormatan untu idup tenang, untu ngurus pasoalan-pasoalan babaro ba karaja ba kokot tolen nang aya dah kami masanan ka kao, ¹² tarus kao idup jaji urakng nang sopan ka mata urakng luar ba ina bagantung ka kabatne koa. ¹³ Sataruse kami bai, kamaruk-kamaruk, kade kao ina nauan parihal kabatne nang mati, biar kao ame baduka gia aya urakng-urakng lain nang ina ada pangarapan. ¹⁴ Barang kade dirik picaya, kade Yesus udah mati lalu bangkit agik, jadi dirik picaya ugak kade kabatne nang dah mati daapm Yesus mao di komoan di Jubata sirage ba IA. ¹⁵ Nyian kami matakatn ka kao ba firman Tuhan: dirik nang masih diapm sampe ka atangan Tuhan sakai-kai ina akan nohoik kabatne nang dah mati ¹⁶ Barang pas waktu tanda di bare, pakoa pas waktu penghulu malaekat ngampak ba sangkakala Jubata ba bunyi, jadi Jubata babaro mao turutn dari saruga ba kabatne nang mati daapm Yesus Karistus nang paling doho bangkit; ¹⁷ apas koa, dirik nang idup, nang masih diamp, mao diangkat barage-rage ba kabatne ka daapm rahu nyambut Jubata ka atas angit. Yakoalah dirik ana salama-lamae ada ba Jubata. ¹⁸ Karna koa iburatnlah urakng-urakng lain ba pakataatn-pakataatn nyian.