¹ Parihal jukut nang suah kita' nulisat'n ka aku: ada baike kade' urak'ng nang laki ina' nyamaki' urak'ng nang bini. ² Tapi karna gia sau ada urak'ng nang idup kampak'ng, ada baike kade' tiap urak'ng nang laki ada binie, aya koa uga' nang bini ada akie. ³ Sabikat'n nang laki arus mare' ahe nang arus dibareat'n ka binie, ayakoa uga, ayakoa uga' sabikat'n nang bini ka akie. ⁴ Sabikat'n nang bini ina' ada kuasae atas tubuhe babaro, tapi akie. Ayakoa uga' sabikat'n nang laki ina' bakuasa atas tubuhe babaro, tapi binie. ⁵ Amelah kita' idup bajauhat'n, kacuali kade' koa atas kamaoan aki bini, nang koapun kahe onto' samintara, supaya kita' bisa ada waktu onto' badoa. Aka' koa, baru'lah ana idup sirage agi' supaya Ibalis ina' ngecoh kita' karena kita' ina' mampu nahan diri' onto' ina' badosa. ⁶ Aku matakat'n parihal nyian buke'nya parintah nang arus kita pinjawat ayakoa, nyian bisa dipinjawat, bisa uga' ina. ⁷ Aku baharap samua urak'ng bisa nunaan aku. Tapi tiap urak'ng narima' barakate babaro dari Jubata onto' bisa panganten atau ge' ina'. ⁸ Onto' urak'ng nang bai' panganten atau ge' nang bini nang udah diakie ningaat'n mati, aku mao matakat'n jare: labih baik ia idup nunaan aya aku. ⁹ Tapi, kade'nya kabat'ne koa ina' mampu agi' nahan diri'e, labih baik agi' ia panganten. Sabape jare, labih baik panganten daripadanya sau badosa ihane. ¹⁰ Bagi nang udah panganten, aku mare'at'n parentah-parentah nyian (buke' aku, tapi nyian parintah Jubata), nang bini ina' muih ningaat'n akie, ¹¹ (tapi kade'nya ia udah talanjur ningaat'n akie, ia ina' muih panganten agi', atau ge' muak'ng agi ka akie), nang laki pun ina' muih nyareat'n binie. ¹² Aku matakat'n nyian (aku, buke' Jubata), kade' ada kamaru' nang babini urak'ng nang ina' picaya ka Jubata lalu nang bini koa mao' idup ba ia, amelah sampe ia nyareat'n nang binie koa. ¹³ Ayakoa uga' kade' ada kamaru' nang baaki urak'ng nang ina' picaya ka Jubata, kade' nang laki koa mao nunaan ia idup sirage, amelah nang bini koa ningaat'n nang laki koa. ¹⁴ Barang ga' kade' sabikat'n nang laki nang ina' picaya' koa dingudusat'n di binie, lalu bini nang ina' picaya' koa pun dingudusat'n di akie koa. Kade' ina' ayakoa, ana samua kamuda'nyu jaji kamuda' kampak'ng, tapi angkit'n kabat'ne udah jaji kudus. ¹⁵ Tapi, urak'ng nang ina' picaya' koa mao bacare, biarat'n maan ia bacare. Ratie, kabat'ne udah ina' tarikat agi' jaji laki bini. Tapi, Jubata udah nyaru' diri' samua onto' idup nang damai, ina' barabo'. ¹⁶ O, samua nang bini, ayamae kita' nauan kade' kita' nyalamatat'n akinyu? Ayamae kita' nauan, o, kita' nang laki, kade' kita' udah nyalamatat'n bini kita'? ¹⁷ Jubata udah natapat'n onto' samua urak'ng, ayamae Jubata udah nyaru kabat'ne onto' idup daap'm kabanaran. Ayakoa uga' aku marentahat'n uga' ka samua urak'ng nang picaya' ka Jubata. ¹⁸ Ada ge' ina' urak'ng nang udah dinyaru' waktu ia udah dinyunat? Ame sampe ia ngilangan tanda-tanda sunat. ¹⁹ Sabape, udah basunat ataupun nape' nang koa ina' palaru. Nang paling palaru koa adalah nuruti sigala parintah-parintah Jubata. ²⁰ Tiap urak'ng arus idup sarupa aya waktu ia dinyaru' onto' picaya'. ²¹ Amba sahaya me kita' waktu kita' dinyaru onto' picaya'? Ame kita' nguatirat'n parihal nang ayakoa. Kade' kita' bisa jaji urak'ng nang bebas, labih baik kita' gunaan kesempatan koa. ²² Sabape, urak'ng nang dinyaru ka daap'm dama Jubata, ia koa amba sahaya, ia koa urak'ng bebas nu' Jubata. Ayakoa uga' waktu urak'ng bebas dinyaru', ia koa amba sahayae Kristus. ²³ Kita' udah dinabus ba raga nang kontan, angke kuihanlah kita' ame jaji amba sahaya taino. ²⁴ O, samua page kamaru', aruse tiap urak'ng tatap idup ka daap'm maraga Jubata. ²⁵ Parihal urak'ng-urak'ng nang ina suah panganten, aku ina' namu parintah dari Jubata. Tapi aku mare' pandapatku sebagai urak'ng nang Jubata micayai'. ²⁶ Aku nganggap samuae bisa jaji baik kade' kita' idup ayamae kita' arus idup. ²⁷ Tarikat ge' kita ka urak'ng nang bini? Kade'nya ayakoa, amelah kita' sampe barusaha onto' bacare. Kade' kita nape' tarikat ba urak'ng nang bini, amelah kita' ngago' nang bini. ²⁸ Tapi kade' kita' udah panganten, ame sampe kita' kampak'ng ba dangan. Kade' ada nang dara panganten, ia ina' badosa. Tapi, kabat'ne nang panganten pasti ana namu manyak alangan salama ia idup ka taino nyian, tapi aku mao'e kita' dijauhat'n kira'e dari parihal koa. ²⁹ O, samua page kamaru', aku kahe mao' matakat'n ka kita' kade' waktu nyian udah sia' sabebet. Jadi, mulai' angkit'n biarlah kira'e kabat'ne nang ada ba bini, idupe sarupa urak'ng nang ina' babini, ³⁰ kabat'ne nang nangis saolah-olah ia ina' nangis, kabat'ne nang idup repo, saolah-olah idupe ina' repo, ³¹ kabat'ne nang magunaan samua hal ka taino nyian, saolah ia ina magunaan ia. Sabape, dunia nyian sia' udah mao abisa'. ³² Aku mao' kita' samua ina' agi' ngarasa gai'. Urak'ng nang ina' panganten kahe mikirat'n parihal Jubata, ayamae ia bapikir kahe onto' nyanangan ati Jubata. ³³ Tapi, urak'ng nang udah panganten kahe mikirat'n parihal nang ada ka taino nyian, ia bapikir ayamae ia mao' nyanangan ati binie, ³⁴ paratian ba kasihe jaji tabagi. Nang bini nang ina panganten ba nang dara kahe nguatirat'n parihal nang baraseh, antahnya koa tubuhe atau ge' rohe. Tapi, kade' nang bini nang udah panganten kahe nguatirat'n parihal taino nyian, ayamae ia mampu nyanangan ati akie? ³⁵ Aku matakat'n parihal nyian onto' kauntungan kita' babaro, buke'nya mao nyantu'at'n kita' tapi supaya kita' sia' jaji tambah baik, supaya pakarajaannyu onto' Jubata ina' takecoh. ³⁶ Kade' ada urak'ng nang nganggap diri'e udah minjawat parihal nang ina' gagas ka nang dara, barang ga' nang dara koa udah lewat umure, biar maan ia minjawat ahe nang ia maoan, ia ina' badosa; biarat'n maan kabat'ne koa panganten. ³⁷ Tapi, kade'nya udah siap sidi ka daap'm atie, ina' ada urak'ng nang maksa ia, ahe maan nang mao' ia pinjawat, koa atas kamaoane babaro, ia pane naap kaputusan ka daap'm atie babaro onto' naap nang dara onto' jaji binie. ³⁸ Jaji, kade' ia naap kaputusan onto' panganten, koa pun ina diahe. ³⁹ Sabikat'n nang bini, salama akie masih idup, ia tarikat ka akie. Tapi, kade' akie koa mati, ia bisa panganten agi ba nang laki mae maan nang ia mao', asal maan urak'ng koa udah picaya' ka Jubata. ⁴⁰ Tapi, kade' nurut aku labih baik ia ina' panganten agi, dan manurut aku, ada Roh Jubata nang diap'm ka daap'm aku.