¹ Ada me ka antara kita' kade' bataisih ba urak'ng lain pane barani ngago' kaadilan ka urak'ng-urak'ng nang ina' banar ba ina' kudus? ² Ina' me kita' nauan, kade' urak'ng-urak'ng kudus ana jaji hakim onto' urak'ng nang idup ka taino? Kade' ana taino nyian kita' adili', masa' kita' ina' bisa ngadili' sigala pakara nang enek? ³ Ina' nauan me kita' kade' ana diri' nang picaya' nyian ana ngadili' malaikat? Aduh agi' pakara-pakara biasa nang diri' alami' tiap ari. ⁴ Kade' kita' ngadapi pakara-pakara nang biasa, ngahe me kita' ina' ngicak'ng pakara koa ka urak'ng nang ina' diparetongan ka daap'm jemaat? ⁵ Aku matakat'n jukut nyian supaya kita' nauan rasa supe'. Masa'lah ina' ada urak'ng nang tarigas, nang mampu ngurus samua pakara nang ada ka antara kita'? ⁶ Sampe ada dangan nang ngago' kabanarat'n ka urak'ng-urak'ng nang ina' picaya! ⁷ Sabanare, nyian udah jaji hal nang nyupei' diri' kita' babaro kade' ada ka antara kita' nang bapakara ba hukum. Ngahe me kita' ina' labih suka disalahat'n? Ngahe kita' ina' labih suka dingarugiat'n? ⁸ Kita' babaro ja' basalah ba ngarugiat'n dangan bahkan ngarugiat'n sigala page kamaru' kita'. ⁹ Nauan ge' ina' kita' kade' urak'ng nang ina' banar ina' bisa taama' ka Subayat'n? Ame kita' sasat! Urak'ng-urak'ng nang ina' sinunuh, nang nyambah sigala batu atau ge' kayu aya' , urak'ng nang kampak'ng, urak'ng nang minjawat diri'e aya nang bini, urak'ng nang kampak'ng ba sabaya lakie, ¹⁰ pangait, urak'ng-urak'ng nang pantohok'ng, urak'ng panyocok arak, nang gia masabungan dangane, ba panipu-panipu, kabat'ne koa ina bisa taama' ka Radak'ng Jubata. ¹¹ Rupae ada uga' urak'ng nang ayakoa ka antara kita'. Tapi, kita' samua udah dimarasehat'n, udah dingudusat'n, ba udah dibanarat'n ka daap'm dama Jubata Yesus ba Roh Jubata. Jauhi' idup kampak'ng ba urak'ng lain. ¹² Samua hal siang muih dipinjawat, tapi ina' samuae' baguna. Samua hal muih dipinjawat, tapi aku bai' jaji amba sae pun. ¹³ Pamakanan memang onto' parut, parut onto' pamakanan, tapi Jubata ana mao minjawat rapot kaduae. Tubuh diri' nyian buke' onto' bakampangan ba urak'ng lain tapi disarahat'n ka Jubata, Jubata onto' tubuh diri'. ¹⁴ Jubata udah mangkitat'n Yesus, ana uga' mangkitat'n diri' oleh kuasaE. ¹⁵ Ina' nauan ge' ina' kade' tubuh kita' koa bagiat'n dari Tubuh Kristus? Masa'lah aku mao' naap bagiat'n-bagiat'n Kristus lalu nyajiat'n kabat'ne jaji lonte? Nang koa ina' mungkin! ¹⁶ Nauan ge' ina' kade' urak'ng nang ngikatat'n diri'e ka lonte akhire jaji sete' tubuh ba ia? Firman Jubata bakata jare, "Nang laki ba nang bini kade' dikomo'an akhire jaji sete' daging". ¹⁷ Tapi, urak'ng nang ngikatat'n diri'e ka Jubata jaji sete' roh ba Ia. ¹⁸ Amelah kita' idup kampak'ng ba dangan. Tiap dosa lain nang urak'ng minjawat, koa ada ka uas tubuhe, tapi urak'ng nang kampak'ng ba dangan jaji badosa. ¹⁹ Ina' nauan me kita' kade' tubuh kita' koa tampat Roh Kudus badiap'm, nang udah kita' narima' dari Jubata, idup diri' nyian buke'nya nu' diri' babaro agi' tapi udah jaji ampu'e Jubata. ²⁰ Tubuh kita' udah dimali ba raga nang lunas. Angke kuihanlah, kita' arus nyenangan ati Jubata ba tubuh kita'.