¹ Vunoni vakuetu, viavuana vuamuthithimba. Kanji jongola mukale kundhimba. ² Munathivuka ngueni muomuakele vakavifuti, muatangukile navimbundi vije kaviakele nalijui, nguehoni movamituamenene. ³ Ngotjovene, ndjimithivukithe nguange naumo uahi ahandeka naSipilitu uaKalunga. Ahandeke nguendi, Jesu ikeje tjithingo. Keho naumo ahandeke nguendi Jesu ikeje muene. Kuvanga naSipilitu Santu. ⁴ Kulivuana vueka navueka, vunoni Spilitu ikeje umo. ⁵ Kulivipanga vieka navieka namuene ikeje omu. ⁶ Kulivilinga vieka navieka , vunoni Kalunga ikeje umo. Ikeje apanga viuma vioshe muvioshe. ⁷ Vunoni muntu kumuntu Spilitu imusolokela linga akolethe. ⁸ Moumu kuliumo vanamuhana Spilitu lijui lia muangana. Kumukuavo lijui liamana, hali Spilitu uje vene umo. ⁹ Kumukuavo kuthelela kuSpilitu umo vene, kumukuavo kuvua navua kukanguitha mavethi, Spilitu ni umo. ¹⁰ Kumukuavo vilinga viandhili ja kukomo uetha. Kumukuavo vupolofeto, kumukuavo kujongola muthithimba. Kumukuavo thindaka theka natheka, kumukuavo ni kulangulula thindaka. ¹¹ Vunoni viuma evi vioshe Spilitu uje molika ikeje avipanga vavena. Mukupangela muntu ngue muana jongola. ¹² Moumu nguehoni moua kalamuvila omu, Keho ulinavilio viavingi. Navilio vioshe viamuvila, nambe via vingi, vikevio muvila umolika, mukemuolalo naKilistu. ¹³ Moumu etu voshe tualimbuitikile naSpilitu umo kumuvila umo. Nambe tuva Jundeja nambe tuva Ngelengu, nambe tuvindungo nambe tuva navakatjithemua. Keho vatunuithile kumo kuSpilitu umo. ¹⁴ Moumu muvila kati ukeou tjilio. ¹⁵ Ngatjiliato tjihandeka, nguatjo, moumu ketijange livoko, keti jange mukamuvila. Ngangotjo tjiketjo tjilivene keti tjamuvila ndi. ¹⁶ Nalitui ngalihandeka, ngualio muomuketi jange lisho, keti jange mukamuvila. Ngangotjolikelio tjili vene kati lia kumuvilandi. ¹⁷ Ngamuvila uoshe uapuile lisho, ngakuvuitha vika? Ngamuvila oushe uapuile lituilika, ngakuvua vati vunithi vuampundhi? ¹⁸ Vunoni mualolo Kalunga nahakavilio vioshe tjimo tjimo mumuvila, nguehoni muana vi jonguela ikeje vavena. ¹⁹ Keho vioshe ngaviapuile tjilio tjimo, muvilatjo nganakela kuiko? ²⁰ Vunoni mualolo vilio viavingi, vunoni muvilani umolika. ²¹ Keho lisho kalihatha kuhandeka nalivoko, ngualio. Konjakujonguele, nambe mutue uleke mahindi, nguendi ange konjakujonguele. ²² Kuahi kutuvakana vene, vilio via muvila vije via kuthejonavua vikevio vinatupu. ²³ Novio via kumuvila tuvithinganjekela nguetu kavia vuahelenavua. Vikevio tuvithina kathingimiko kakutuvakana, keho ovio vietu kavia vuahele. Vikevio vilinakathingimi ko kakutuvakana. ²⁴ Vunoni ovio vietu viavuahele laja, vikevio kavi jeneka vimo. Vunoni Kalunga navuahethela muvila uetu mumo, netji tjajenekene kele uatjihanene kathingimiko kakutuvakana. ²⁵ Lingakumuvila uetu, keti kukakale kulipetha. Vunoni vilio vioshe kalinjungehakati kavio. ²⁶ Keho ngatjilio tjimo tjijanda, vilio vioshe vijanda hamonavikuavo. Nambe tjilio tjimo ngavatjithingimika, vilio vioshe vijolela hamonatjo. ²⁷ Vunoni eni mumuvila uaKilistu, keho muntu namuntu napuvilio via ou. ²⁸ Keho Kalunga navahaka vamo mumbunga, vamutjimo vapostolo, vamutjivali vaPolofeto. Vamutjitatu vaLongithi, keho vitantekejetho via kukomo uetha. Keho vuana vua kukanguitha mavethi, navakakukoletha, navakaku tuamena. Namalimi eka naeka. ²⁹ Voshe vaPostolo ndi? Voshe vaPolofeto ndi? Voshe vaLongithi ndi? voshe vakavitantekejetho viakukomo uetha ndi? ³⁰ Voshe valina vuana vuakukanguitha mavethindi? Voshe vekuhandeka malimi eka naeka ndi? ³¹ Vunoni livejeni navua viavuana vua kutuvaka. Keho jange njimileka ngila jakutuvakana navua.