¹ Mbunga yavo yoshe vakatukile vanehele Yesu kumesho a Pilatu. ² Vashangumukile kumuvangeya,vakuanyene nguavo, ''Tuna uana lyala ou a tangula mushovo uetu, kuvindika kufueta lisimu kuli sezale, nakukuanya nguendi yikeye kilistu, Muene.'' ³ Pilatu ua muihuile, nguendi, ''Yove u Muene ua vaYundeya ndi?'' Yesu ua mulimbuluile nguendi, ''Omuo vene mou nakuanya.'' ⁴ Pilatu ua kuanyene na vakuluntu vava sasendote na mbunga, ''Ange kunja uanene mulonga ku lyala ou.'' ⁵ Vuno avo vathininikile, naku kuanya nguavo, ''Yendi ali na kushongangeya vantu, kulongetha muyundeya yoshe, ua shangumukile ku Ngalileya na kuno kumuhela vene.'' ⁶ Muye Pilatu mua vyuvuile evi, uehuile ou lyala ua kele ka Ngalileya. ⁷ Mukonda uedhivile nguendi yikeye ua kele kuintci lya npoko ya muvusuana vua Helonde, uatumine yesu kuli Helonde vavnya, uye ua kele muYelusalema ha matangua aye. ⁸ Muye Helonde ua muene Yesu, ua jolelele muakama, mukonda ua yonguele ku mumona kuntcimbu ya kunima. Endi uovuile vya kulyendi kumona vimuetho vimo vye kupanga yendi. ⁹ Helonde uehuile yesu mu majui amengi, vuno Yesu ka mulimbuluile navimo vyahi. ¹⁰ Vakuluntu va vasasendote na vaka kuthona mathona vemanene,mu kumuvangeya yendi muakama-kama. ¹¹ Helonde na masualale vendi vamutukile Yesu na kumutcopa. Keho vamudhikile vidhala vyalaha vya ku vuaha muakama naku mutuma ahiluke kuli Pilatu. ¹² Va Helonde na Pilatu valikuatele vuthamba, ha litangua liye vene, mukonda kulaya validhile umo namu kuavo. ¹³ Pilatu ua thanene hamo vakuluntu va vasasendote na vakakutumina mashiko na mbunga ya vantu ¹⁴ Ua kuanyene na vavo nguendi, ''Muna njinehela lyala ou ngue lyala ali na kutangula vantu kupanga vyaku vihya, naku tala, ange, ndjina muihuile kumesho eni, kunja uanene mulonga muli lyendi kutuala kuvyuma vimuli naku muvangeya. ¹⁵ Kuahi, nambe Helonde, nga yendi na mutumu ahiluke kuli yetu lalo, naku mona, vyahi vya kuviha vya kumu tcihila vya na panga yendi . ¹⁶ Ange muye vene njika muyandetha njika muethela.'' ^{17 18} Vuno mbunga voshe va tambakanene, nguavo, mutcihe lyala ou, umu tuechelela ou Mbalambasa.'' ¹⁹ Mbalambasa ua kele lyala uye uva hakele mukamenga omo lya kupanga mpuasha muimbo lyakama naku tciha vantu. ²⁰ Pilatu ua kuanyene navo lalo, ua yonguele kuethela yesu. ²¹ Vuno vatambakanene, nguavo, ''Mushukike hachilindakano, mushukike ha chilindakano.'' ²² Endi ua kuanyene navo ntcimbu ya muchitatu, ''Mukonda lya vika, vupi muka vuana lingi lyala ou? Kundja uanene mulonga ua kumutciha. Muye vene kunima ya kumu mangola, njika muethela. ²³ Vuno keho vatambakanene nalijui lya kama, va mutuminine nguavo vaka mushukike. Majui avo atuvakanene Pilatu. ²⁴ Keho Pilatu uatetele lijui kutuala kukutumina kuavo. ²⁵ Ua vethelele uye umo uvalombele uye uva hakele mukamenga vuno lya mpuasha na kutciha. Vuno ua vahanene Yesu kutuala muviyongola vyavo. ²⁶ ngocho vamu tualele Yesu, vakuatele umo Simoni uaku Silene, ua tundile kuchifuti, na kumutuika chilindakano ambate, ashuame Yesu. ²⁷ Mbunga yakama ya vantu, nava kentu vaye vakele navuthiua nakulinyenga omo lyendi, va mushuamene. ²⁸ Yesu ua kuanyene nguendi, ''Eni vana vavakentu vamu Yelusalema, keti munjilile yange, vuno lilileni eni vavena navana veni. ²⁹ Nga mutala, matangua ali nakuinja, muye mova kakuanya nguavo, ''Vana vedhuka dhinchimi na memo aye kathemene na mavele aye ka amuekele.'' ³⁰ Keho muye vene vaka shangumuka kukuanya na mikinya nguavo, tuuileni; na malundu, nguavo, 'Tufuikeni.' ³¹ Nga valinga vyuma evi kuchiti chitontola, vikafua vati kuchiti cha kuma?'' ³² Vamala vamo, vavali vaka vuidhi, vava tualele hamo naYesu muku kava tciha. ³³ Muye mo vedhile kumuhela uvatumbula, ''Chikola.'' Kuye vamushukikile na vidhi-umo kuchilyo chendi na mukuavo kuchimuoshue chendi. ³⁴ Yesu ua kuanyene nguendi, ''Tata, vechele, kuvedhivile vyova panga.'' Keho muye vene valyavelele vidhala vyendi. ³⁵ Vantu vemanene vatalele ku vaka kuthika mathiko lalo muye mova mutcopele yendi nguavo, ''Uo vuelele vakuavo, achi lyovole endi vavenya, nga yikeye Kilistu ua Kalunga, uye umo yova hanguile.'' ³⁶ Va masualale lalo vamuthembuluile, va shuenyeneko kulyendi vamuhanene vindangele, ³⁷ na kukuanya nguavo, ''Nga yove u Muene ua vaYundeya, lyovole ove vavenya.' ³⁸ Hakele lalo chidhivukitho halyendi, ''Ou yikeye Muene ua va Yundeya.'' ³⁹ Umo ua vidhi vaye vova shukikile hamo nendi ua kuanyene nguendi, ''Ove keti u kilistu ndi?Lyovole ove vavenya netu u tuovole.'' ⁴⁰ Vuno uye mukuavo ua kuanyene nguendi, ''Ove lyova lya Kalunga lyahi, te ove una tambula chihitho ngue yendi? ⁴¹ Chihitho chetu ni chinatufuila, omo tutambula fueto ya vyuma vyetu, vuno lyala ou kethi na mulonga.'' ⁴² Keho ua kuanyene nguendi, ''Yesu, kanjivulukeko ange muukaheta muvu muene.'' ⁴³ Yesu ua mulekele nguendi, ''Vuchili njikuleka, lelo vene ukakala mumo nange muchitungu cha Kalunga.'' ⁴⁴ Cha puile ngechiye muhyehi nantcimbu yamuchitanu na yimo, na muthithi uedhile muchifuti choshe noho hantcimbu yamuchitanu na yiuana ⁴⁵ kuakele muthithi ha litangua liye. Na ntanga yiye yamutembele yatavukile muvali. ⁴⁶ Ua tambakanene na lijui lya kama, Yesu ua kuanyene nguendi, ''Tata, mu mavoko ove ndjinakundika muono uange.'' Muye mua kuanyene viye, ua tcile. ⁴⁷ Uje mukuluntu ua masualale ua muene viye vya kele haye, ua shangalele Kalunga, ua kuanyene nguendi, "Chili nkuma lyala ou uakele mukavuchili.'' ⁴⁸ Muye mbunga yoshe ya kungulukile hamo vakele dhimbangi kumutambela uye vamuene vyuma viye vya lingiuile, vahilukile na kuli pupanga havintulo vyavo. ⁴⁹ Vuno voshe vaye vamudhivukile, na vakentu vaye vamushuamene kutunda kuNgalileya, vemanene hale, nakutala vyuma evi. ⁵⁰ Taleni, kuakele lyala umo lidhina lyendi Josefe, uye uakele mukacilyo cha ndhango. Yikeye uakele lyala ua kathingimiko. ⁵¹ Lyala ou ka lyu vuathanene na muvutumbe vuavo na vipanga vyavo. Endi ua tundile kuYundeya kumbongi ya Alimateya, na yikeye ua tcetelele vumuene vua Kalunga. ⁵² Lyala ou, ua shuenyenene Pilatu, ua lombele muvila ua Yesu. ⁵³ Ua ushukuile, ua udhengelele ya ntga ya kuvotcika ya linyu, ua mu hakele mumbumbo ya kuchokola mulivue, muye nolo kanda va shitikemo muntu. ⁵⁴ Lyakele litangua lya kuli vuahethela, na Sabata ya kele muhyehi na kushangumuka. ⁵⁵ Na vakentu vaye vatundile ku Ngalileya vedhile hamo na Yesu vamushuamene na kumona ha mbumbo na vati valangekele muvila uendi. ⁵⁶ Vakevo va hilukile na kuvuahetha vihemba na madhi. Keho mu Sabata vahuimine kutuala mu lishiko lyavo.