¹ Chilika chakulya mbolo chakele muhyehi, chiye veku tumbula pasovala. ² vakuluntu vavasasendote, na vaka mathona vali handekethelele vati muye mova katciha Yesu, mukonda vakele na lyova lya vantu. ³ Keho Satana ua kovelele muli Yunda Yishakaliota, umo uavaye likumi navavali, ⁴ Yunda uayile kuvasasendote vakama na tupitau nakuthimutuila navo vati Yesu vaka muenda vungungu. ⁵ Vajolelele muakama nakulyuvuathana vamuhane vimbongo. ⁶ Uetavele naku tala mukuthetela ngila yika yovaka muhana Yesu mumavoko avo ntcimbu kanda mbunga yahiho. ⁷ Ngocho litangua lya mbolo yakuyena hingo lyahetele, ha kutciha vana va vinjui vakukombelela pasovala. ⁸ Keho Yesu ua tumine Petulu na Youano, nguendi, ''Yeni naku tu vuahethela linga tukalye yino pasovala.'' ⁹ Va muihuile nguavo,''Kuiko uyongola tuka kuvuahetheleyo?'' ¹⁰ Ua vakuanyene nguendi, "Taleni, muye muka kovela muimbo lyakama, muka uana muntu nambata njava ya mema. Mushuameni na munjivo muye mua kakovela. ¹¹ ngocho vene handekeni na vavena njivo ngueni, Mulongisi na tutumu kuli yove kuakala njivo ya vangendhi, kukeko kunja kulila Pasovala hamo na vangonge vange?" ¹² Endi aka mileketha njivo ya kama ya kuilu. Muli na vitenga vyoshe tu vuahetheleni kuye." ¹³ Muye mova yile, naku uana vyoshe viye ngue muavalekele. Mukemuo va vuahethele vyakulya vya chilika cha kulya Pasovala. ¹⁴ Ngocho ntcimbu ya hetele, yendi ua tumamene hamo na vapostolo. ¹⁵ Keho ua kuanyene navo nguendi, "Ange njili nalishungu muakama lyakulya pasovala eyi muntcimbu kanda njiyande. ¹⁶ Njimileka nguange, kunji kayili lalo, noho yina puithamo muvumuene vua Kalunga." ¹⁷ Keho Yesu ua tambuile nganja, na muye mua hanene kushangala, ua kuanyene nguendi, "Tambuleni na kulishumuina yo hakati keni. ¹⁸ Njimileka nguange, ange kunjikanu lalo kuvushuka vua vinyu noho vumuene vua Kalunga vukeja.'' ¹⁹ Keho ua tambuile mbolo, naku hana kushangala, ua yipanuine, ua vahanene yo, ua kuanyene nguendi, Ou ukeuo muvila uange, uva na mihana. vilingeni muku njivuluka yange.'' ²⁰ omo vana mane kulya ua tambuile nganja mungila yiye vene ua kuanyene nguendi, ''Eyi nganja yinapu lyuvuathano lya liha lyamu maninga ange, avana mi shampuila yeni. ²¹ Vuno tolileni. Livoko lya muka kunjenda vungungu alinange kuno kutafula. ²² Mukemuo muna muntu akaya ngue muye mua vitumbika. Vuno ngongo ya muntu uye aka muenda vungungu!" ²³ keho Vashangumukile ku lihodhola mukati kavo yiya honi ou aka linga vyuma evi. ²⁴ Mukemo kua katukile vimpata hakati kavo yiya honi hakati kavo uva katumbula ua kama. ²⁵ Ua va lekele nguendi, ''Vimyene vaka vifuti vakevo vali helu lyavo, vuno kuli umo ali na mpoko helu lya voshe veku vatumbula vaka kukuatha muachili kuli vantu vavo. ²⁶ Vuno keti vipue ngue ngechi kuli yeni. Ambe ou ua kama hakati keni apue ua mundende, nou napu ntuama hakati keni napande kupua ndungo. ²⁷ Muomu yiya ua kama, uye natumama kumesa, ndi uye avathela vyakulya? Keti ou na tumama kumesa ndi? Mukemuo munjili yange hakati keni ngue muka kuavathela. ²⁸ Vuno yeni vamo mu neshuala hamo nange mu vyetheko vyange. ²⁹ Njika mihana vu muene, ngue omo Tata ua hanene vumuene kulyange. ³⁰ Mukonda yeni mukalya naku nua ku tafula yange muvumuene vuange, neni muna tumama ha vitumamo via vumuene kupangula mishovo likumi na yivali ya Yisaleli. ³¹ ''Simoni, Simoni, dhangama, Satana a kulomba ku kutambula, aku pekula ngue tiliku. ³² Vuno nja kulombelelele yove, linga kutcelela kuove keti ku-ue. Omo una tenguluka luhua koletha va munanoko vove.'' ³³ Petulu ua kuanyene nendi nguendi, ''Muene, njinali vuahethela laya kuya mumo nove nambe mundolongo namu kutca.'' ³⁴ Yesu ua mukuanyene nguendi, ''Njikuleka, Petulu, Vutciki vuno vene, ntcimbu ndemba atambeke, uka njivyana lutatu nguove kounji dhivuka ange.'' ³⁵ Omo Yesu ua kuanyene navo nguendi, ''Muye monja mitumine na nkombe yahi, na njeke yahi, ndi vinkaku, muayenekele chuma chimo ndi?'' Va kuanyeneko nguavo, ''Vyahi.'' ³⁶ Omo yikeye ua kuanyene navo nguendi, vuno mualolo, uoshe ali nankombe ambate, na njeke lalo. Na uoshe kethi na muele na pande ku landetha kapote kendi alande muele umo. ³⁷ Nga njimileka eni nguange, vika viva thonene viye yange vina pande kupuamo, 'vamu tandele hamo nava kavupi.'' Mukonda viye viva nji tumbuilile vana puithamo.'' ³⁸ Vakuanyene nguavo, ''Muene, tala! tuli na myele yivali.'' Yikeye ua kuanyene navo nguendi, ''Vina pumo.'' ³⁹ Yesu ua yile, ngue muye mua kele nakulinga, ku mukinya ua Oliveta, na vandonge vamu shuamene. ⁴⁰ ngocho omo vahetele, yendi uakuanyene nendi nguendi, ''Lombeni linga keti mukovele mu vyetheko.'' ⁴¹ Uayile ua tundile mukati kavo ngue livue vanashe, na yendi ua tcikamene na kulomba, ⁴² ua kuanyene nguendi, ''Tata, nga utava, tambula nganja eyi kulyange, vuno keti ngue kuchidhango change, Vuno chidhango chove chilingi ue.'' ⁴³ Omo kangelo ua muilu uedhile kuli kulyendi, ua mukolethele. ⁴⁴ Mukukaluua navua, Yindi ua lombelele muakama kama, naku litukuta lyendi lya himpukile ngue manothi akama amaninga aholomo kele hantci. ⁴⁵ Omo ua hetukile ku kulombela kuendi, uedhile ku vandonge naku va uanene vanandanda mukonda lya vuthiua vuvakele navuo. ⁴⁶ Ua vehuile vakevo nguendi, "Vati mu nandanda? Hindukeni na kulombele, linga keti mukovele mu vyetheko.'' ⁴⁷ Te nolo achili naku kuanya mbunga ya hetele, na Yundasa, umo uavaye likumi na vavali, uava tuamenene kulutue. Yundasa uedhile muhyehi na Yesu aku mutcembe, ⁴⁸ Vuno Yesu ua kuanyene nendi nguendi, "Yundasa, uenda Muna Muntu vungungu na ku mutcemba ndi?" ⁴⁹ Ngocho voshe vaye vadhengelekele Yesu vamuene viye vya kele haye, va kuanyene nguavo, "Muene, chitava tu lue na miele ndi?" ⁵⁰ Uye umo uavo ua ndcalyele ngamba ua Sasendote uakama, na kumuvatula litui lyendi lya chilyo. ⁵¹ Yesu ua kuanyene nguendi, "Keho vinapu mo!" Yesu ua kuatele kulitui, ua muka nguithile. ⁵² Yesu ua kuanyene na va Sasendote va kama, na tupitau va tembele, na vakuluntu vaye vedhile muku muluitha, "Muneja muku njikuata ngue chidhi, na myele na milamu? ⁵³ Munjakele neni matangua oshe mutembele, komua nji kambekele mavoko eni. Vuno eyino yikeyo ntcimbu yeni, na npoko yamu mithithi." ⁵⁴ Va mukuatele ,vamu tualele kunjivo ya sasendote ua kama. Vuno Petulu ua shuameneko noho hakele shondoloka. ⁵⁵ Mova shuamekele tuhya mukati ka ndcango va tumamene hantci hamo,na Petulu ua tumamene mukati kavo. ⁵⁶ Umo ngamba ua mumbanda uamu muene mua tumamene muchite cha tuhya ua mushungamene naku kuanya nguendi, "Ou mumala ou lalo nendi uakele mumo lika nendi." ⁵⁷ Vuno Petulu ua livyanene, ua kuanyene nguendi, "Ove mukentu, ange kunjimuidhiva ouo." ⁵⁸ Kunima ya kantcimbu ka kandende umo uaye ua mumuene, ua kuanyene nguendi, "Ove lalo umo uavo." Vuno Petulu nguendi, "Ove muntu keti yange." ⁵⁹ Kunima ntcimbu hahitile vili lyala uaye ua muthininikile nguendi, "Vu chili lyala ou lalo uakele hamo nendi, mukonda yendi ka Ngalileya." ⁶⁰ Vuno Petulu ua kuanyene nguendi, "Lyala, kunjividhiva ovyo vyu kuanya. "Vuathi-vuathi te achihandeka, ndemba ua tambekele. ⁶¹ Ua tengulukile, Muene ua talele kuli Petulu, na Petulu ua vulukile lijui lya Muene muye mua kuanyene nguendi, "Muntcimbu kanda ndemba atambeke litangua lino lya lelo uka njivyana lutatu." ⁶² "Petulu ua tuhukile hanja ua lilile muakama. ⁶³ Ngocho vamala va nyungile Yesu vamu tcopele na kumupupa, ⁶⁴ Va mufuikile kumesho va kuanyene nguavo, "Polofetala! yiya umo uye na kupupu?" ⁶⁵ Muye vene vakuanyene vyuma vikuavo vya vingi vyo vamu vangeyele Yesu,na ku mushaula. ⁶⁶ Muye molya kile litangua, vakuluntu vavantu va likunguluile, hamo na vakuluntu va vasendote na vaka kuthona. Mukemuo vamutualele kumpunga ⁶⁷ Va kuanyene nguavo, ''Nga yove u kilistu, tuleke" Vuno ua kuanyene navo nguendi, ''Ambe ange njimileke kumunjitcelela, ⁶⁸ Nambe nji mihule, kumu njilimbulula. ⁶⁹ Vuno kutunda hano, Muna Muntu aka tumamama kulivoko lya chilyo lya ndhili ya Kalunga.'' ⁷⁰ Muye vene voshe va kuanyene nguavo, "Nkuma ove u Muna Kalunga ndi?'' Yesu ua kuanyene nguendi, ''Omuo vene mumu na kuanya yange vene.'' ⁷¹ Va kuanyene nguavo, ''Vika lalo tuthetela. Vumbangi? Etu vavenia tuna lyuvuilako vya kutunda mukanua kendi vavenya."