¹ Vunoku chimenemene kukukya kua litangua lya kulivanga lya chivike, muye vedhile kumbumbo, vanehe vihemba viye viva vuahethele. ² Muye va uanene livue vana lyandumuna ko kumbumbo. ³ Va kovelelemo, vuno kova uu uanene muvila ua muene Yesu. ⁴ Vya kele ngechi, omo vakele nachitanga cha viye, vuathi-vuathi vamala vavali vemanene hamo navo navidhala vya kuvyakula. ⁵ Keho vakentu vakele nalyova va kulumanene vihanga vyavo hantci, vakuanyene na vakentu nguavo, Vika muthetelela muka muono mukati ka vaka kutca? ⁶ Kuno uahiko, vuno na shituka! Vulukeni muye mua kuanyene neni te muli ku Ngalileya, ⁷ Nguendi Muna Muntu vana pande kumuhana kumavoko avantu vaka milonga vaka mushukike, keho aka shituka lalo halitangua lyamu chitatu.'' ⁸ Na vakentu va vulukile majui endi ⁹ Vahilukile va tunde ku chihilo va kambuluile vyuma vyoshe kuli vaye likumi naumo na kuvakuavo voshe. ¹⁰ Vuno vakele va Malia Mandalena, na Johana, na Malia vayina ya Tyango, na vakentu vavo vakele hamo navo va kambuluile vyuma evi kuli vaPostolu. ¹¹ Vuno mudhimbu uavo uakele ngue vihandeka vya ngocho kuli vaPostolu, kova vitavele nambe ku vatcelela vakentu. ¹² Muye Petulu ua katukile ua shatukilile kumbumbo, keho ua kulumanene nakutala mo mukati, ua muene vintanga vyakutoka lika lyavyo. keho petulu ua hilukile ua yile kunjivo yendi, ua komokele viye vya kele kuye. ¹³ Taleni, vamo vavali vayile kulitangua liye vene kuimbo limo lyakuluka Emau, hakele ntunda yakuheta kuJelusalema vikilometa makumi atanu na limo. ¹⁴ Vana kulileka vyuma vyoshe viye vya lingiuile. ¹⁵ Vya kele ngechi mova va yile na kuthimutuila na ku lihula umo na mukuavo, vavenya Yesu ua shuenene hamu hyehi uendele hamo navo. ¹⁶ Vuno vuivuitithile mesho avo linga yendi keti va munongonone. ¹⁷ Yesu ua kuanyene navo nguendi, ''Eni muvavali muendiemo nkuma vya ku tyamena kuiko muli na ku thimutuila?'' Keho vemanene vihanga vyavo vya kele na vuthiua. ¹⁸ Umo uavo, ua kuluka Keleopa, ua mukumbuluile nguendi, ''Yove lika npano ungendhi mu Yelusalemana ku uadhivukile vyuma evi vinahitimo mu matangua ano ndi?'' ¹⁹ Yesu ua kuanyene navo nguendi, ''Vyuma vika?'' vamukumbuluile nguavo, ''Vya Yesu muka Nazaleta, ua kele kapolofeto, ua kama muka ndhili kuvipanga naku majui kumesho a Kalunga na kumesho avantu voshe, ²⁰ na vakuluntu vavasasendote na vaka kutumina linga va muuane mulonga umutuale ku kutca na kumu kulika hachilindakano. ²¹ Vuno etu tua tcelelele nguetu yikeye akakula vaYisaleli. Mukemo, na vika vya vingi, lelo linapu litangua lya muchitatu kutunda haye hovya yombolokele vyuma vyoshe. ²² Vuno lalo, vakentu vamo vakumbunga yetu va tukomokethele, mo va menekele chimene mene ku mbumbo. ²³ omuo kuva uanenemo muvila uendi, vedhile, nguavo vanamono chimona chimo cha tungelo vaye vava lekele ngua ali na muono. ²⁴ Vamala vamo vaye vakele netu vayile kumbumbo, vaka uanene muye vene muva valekele vakentu. vuno yikeye kova mumuene.'' ²⁵ Yesu uakuanyene navo nguendi, ''Eni mumatha muvaka dhimbunge dha malanga ku kutcelela viye vyoshe viva kuanyene vaPolofeto! ²⁶ Kavya kele na mulyo Kilistu akayandele vyuma evi, nakukovela vumpahu vuendi ndi?'' ²⁷ Keho hakushangumuka na Mosesa navapolofeto voshe, Yesu ua valanguluilile ku mathona aye aku mutumbula yikeye. ²⁸ Omuo vashuenene kuimbo liye li vayile, Yesu ua lingile ngue ayongola ku vatuvakana. ²⁹ Vuno vakevo vamu kokuele, nguavo, ''Kala netu, mukonda lili kuchinguedhi na litangua liyongola kukovela mualolo.'' keho Yesu ua kovelele mo mu kukala navo. ³⁰ Vya kele ngachi, muye mua tumamene navo kukulya, ua tambuile mbolo, ua yilombelele, ua yivanyuine, uayi vahanene. ³¹ Keho mesho avo emukile, vamunonguenene, keho ua lavukile ua tundile. ³² Omuo valihandekethele umo na mukuavo nguavo, ''Keti netu ku vimbungevyetu tuovuile voo, muye endi ua kuanyene mungila, muye mua tulanguilile yetu mathona?'' ³³ Omuo vakatukile hantcimbu yiye vene vahilukile ku Yelusalema. Va uanene vaye likumi naumo vana kunguluka vavo vaye vakele hamo navo, ³⁴ Va kuanyene nguavo, muene chili vene nashituka, na yombolola kuli Simoni. ³⁵ Keho vambuluile vyuma viye vya lingiuile mungila, nomuye Yesu muavanuine mboloto. ³⁶ Muye mo vahandekele vyuma evi, yikeye vavenya uemanene hakati kavo, ua kuanyene navo nguendi, '''Chiyulo chikale neni.'' ³⁷ Vuno vakevo vatcile chintcima na kukala na lyova, vathinganyekele halumo vana muene mpundhi. ³⁸ Yesu ua kuanyene navo nguendi, ''Vika munomina vimbunge? Vika mulihuila muvimbunge vyeni? ³⁹ Taleni mavoko ange namyanja yange, uno yange vena. Njikuateni mutale. Mukonda mpundhi ka yakele nambunda na vitciha, ngue momu nanjimono ange njili navyo.'' ⁴⁰ Muye mua handekele evi, ua valekethele mavoko endi na myanja yendi. ⁴¹ Muye vene kova tcelele evi mukonda njangi, vakele nayo va komokele, Yesu ua kuanyene navo nguendi, ''Muli na vimo vyakulya kuno ndi?'' ⁴² Keho vamuhanene mbaluvuila ya yintci ua kuocha, ⁴³ na yikeye ua yitambuile ualile kumesho avo. ⁴⁴ Ua kuanyene navo nguendi, ''Muye ange njakele neni, Ange njamilekele kuvyoshe viva thonene mashiko aa Mosesa na kuli vaPolofeto naku Visamo ana pande kupuamo. ⁴⁵ Keho va shokolokele mana avo, linga vadhivukena kuvuithitha mathona. ⁴⁶ keho ua kuanyene navo nguendi, ''ngachiye vene muvavithona, Kilistu akayanda keho aka shituka kukutca kulitangua lya muchitatu. ⁴⁷ Kutenguluka na ku lyechela umo na mukuavo ku milonga na ku yambulula muli dhina lyendi ku mishovo yoshe, kutamekela mu Yelusalema. ⁴⁸ Eni munapu dhimbangi kuvyuma evi. ⁴⁹ Taleni, ange njimi tumina ku tceleletha kua tata. Vuno kaleni muimbo lyakama noho muna dhala ndhili ya muilu." ⁵⁰ Keho Yesu ua vatuamenenene noho muhyehi na Mbetaniya. Uoluele mavoko endi ua vavuavuethele. ⁵¹ Keho chakele ngechi, ntcimbu achi va vuavuetha, ua lihandele navo va mutualele muilu. ⁵² Ngocho va mulemethele va hilukile ku Yelusalema na kuyolela muakama. ⁵³ Ngocho vakalelelemo ntcimbu yoshe mutembele, na kushangala Kalunga.