¹ Kuruku rwavino ame anu kenge kuwiru, makura anu mona livero lyamu liwiru kuna gharuka. Liywi lyaku hova olyo na yuvire kuna ku ghamba ku kwande yira rumbendo rwaku shiva, kuna ku ghamba ashi, ''Ronda kanduka ghuye kuno, kuna shana ku kuneyeda ovyo ngavi shoroko kunyima ya shirugho.'' ² Naku harukako tupu ame kuna kara mu Mpepo, ame anu mono shipundi sha ghuHompa kuna shitura mu liwiru, ntani muntu kuna shungiri po. ³ Muntu ogho ashungiliropo pa shipundi sha ghuHompa kwa fana yira liwe lya diyamande ya ndiro ntani na diyamande yayi geha yaku vembera yira likende lya shitarero. Ntani ame anu mono likongoro kuna kundurukida shipuna sha ghuHompa. Mavara gha likongoro gha shina-mahako ghaku vembera yira mawe gha diyamande ya ndiro kuna ku ndurukida shipundi sha ghuHompa. ⁴ Shipundi sha ghuHompa kuna shikundurukida mukatji vipundi vya ghuHompa vyaku tika ku dimurongo-mbiri-na-vine, ntani matimbi ghaku tika ku dimurongo-mbiri-na-vane kuna shungiri pano pa vipundi, vavo kuna dwata marwakani ghamakenu, ntani kehe ghuno kuna dwata nkata ya ngorodo ku mutwe. ⁵ Ntani ku shipundi sha ghuHompa kuna ku vema naku twera maruvadi, naku ndunduma, naku dukuta shikukumo yira mvhura ya maruvadi yaku roka ghunene. Ntani ramba ntano-na-mbiri kuna ku twera ditape ghukenu kumeho ya shipundi sha ghuHompa: dino ramba ku tanta ashi Mpepo da Karunga ntano-na-mbiri. ⁶ Kumeho ya shipundi sha ghuHompa kwa kalireko yira lifuta lya mema ghaku moneka yira likende lyaku vembera, lyaku fana yira mungwa wa ghukenu waku vembera. Mukatji kwa kaliremo shipundi sha ghuHompa ntani kuna shikundurukida vikorama vine, vyaku kara na mantjo, kumeho na kuruku. ⁷ Shikorama shaku hova kwa fana yira Nyime, sha ghuviri kwa fana yira Hove, sha ghutatu kwa fana yira Muntu, ntani sha ghune kwa fana yira Likuvi. ⁸ Ovino vikorama vine kehe shino kwa kara na mavava matano-na-limwe, ntani kwa yura mantjo murutu pawiru na munda. Vino vikorama kehe pano kuyimba matiku na mwi ashi, ''Kwa pongoka, Kwa pongoka, Kwa pongoka, Hompa Karunga wa nkondo nadintje, oghu ahoviro ku karako, ntani oghu ana karoko weno, ntani ogho nka ngaka karoko kumeho dogoro na runtje naku naruntje.'' ⁹ Ovino vikorama vyavyo ku tapa kehe pano mfumwa naku shamberera, naku fumadeka, ntani naku tapa mpandu kwaghu ashungiro ku shipundi sha ghuHompa, oghu akaro na monyo wa naruntje naku naruntje, ¹⁰ ntani ghano matimbi dimurongo mbiri-na-mane vavo ku kugandera pa livhu va tongamene naku nyongama dimutwe davo kumeho yaghu ashungiro ku shipundi sha ghuHompa kumwe naku mutanga oghu akaro na monyo wa naruntje naku naruntje. Vavo ku vhukuma nkata davo pa livhu kumeho ya shipundi sha ghuHompa naku ghamba ashi, ¹¹ ''Atwe kupandura ku koye, ove Hompa wetu, ntani ove nka Karunga wetu, kwa kara na ghuyerere ntani na mfumwa, na nkondo nadintje, ove kwa shita navintje vyamu ghudjuni, ove kwavi turapo na nkango doye mbyo vina karapo weno ntani ove mushiti wa navintje ovyo vashita.''