¹ ''Ame kuna ku tjangera mu Engeli wa lipongero lyaku mbunga Kirisite yaku Saradesi ashi, 'Odino nkango kuna kutunda kwaghu akwaterero Mpepo ntano-na-mbiri da Karunga ntani na mbungururu ntano-na-mbiri. '' Ame na yiva viruwana vyoye na vintje. Ove kughayara ashi kuna kuparuka ntani ghuna kara na monyo, nane ngoli ove wafa kare. ² Rambuka ntani dameka ku ruwana ntani kora nyara ove kwato nkondo murutu ku shana kufa, dameka ku ruwana ghutikitemo viruwana vya Karunga ove kuna kara ghure na Hompa Karunga. ³ Yiva naku vhuruka, nkango, odo wa yuvire pa kuhova ove aghudi tambura. Limburuka ku nkango dino, ove ku shighure naku tjindja ghukaro. Nkene kapi ghuna kurambuka wangu, ame kuna kuya ku koye yira muntu wawidi, ove kapi wa yiva liyuva na shirugho opo nganuya ku koye. ⁴ Mu lipongero lyamu mbunga Kirisite yamu Saradesi kuna huparamo tupu vantu va vasheshu vaku pira ku nyateka vidwata vyavo, vavo ngava katunga kumwe name, ngava ka dwata vikoverero vya vikenu, mukondashi vavo kwa hungama ntani kwa kushuka. ⁵ Kehe ghuno waku funda ngaka dwata marwakani ghamakenu, ntani lidina lyendi kapi nganu lidongonona mo mu Mbapira Ya Monyo, ntani ame nganu katapa ghumbangi naku tongonona lidina lyendi na viruwana vyendi vya ghuhunga ku shipara shava Vava naku va Engeli vendi. ⁶ Kehe ghuno akaro na matwi ghaku yuvha, ayuvhe ovi yina ku tanta Mpepo ya Karunga ku lipongero lyaku mbunga Kirisite.''' ⁷ ''Tjangera mu Engeli wa lipongero lyaku mbunga Kirisite yaku Filedefiya ashi: 'Odino nkango kuna kutunda kwa mupongoki ntani ghuye ndje ghushili - ghuye kwa kara ntani kwa kwaterera tjapi da Dafit, ghuye nkene kuna paturura livero ligharuke kwato waku vhura kulighara likupate, ntani nka nkene kuna pata livero likughare kwato waku vhura kuli paturura ligharuke. ⁸ '''Ntani nka Ame na yiva viruwana vyoye. Kenga, ame kuna paturura lino livero kumeho yoye lina gharuka, kwato waku vhura kulighara likupate. Ntani nka ame na yiva ashi ove kuna kara na nkondo dadisheshu murutu, ntani nka ove kapi wa shwena naku kanana nkango dande nane ngoli wadi kwata maghoko maviri ntani ove kapi wa kanana lidina lyande nane ngoli kwa pura mu mwande. ⁹ Kenga! Ame nganu renka ovo vantu vamu mbunga ya lipongero lya Satana, ovo vaku twenyango va vene ashi vavo va Yuda nane ngoli kapishi va ghushili, vavo vana vimpempa - ame nganu vatininika ngavaye ku koye kushipara shoye ngava tongamene pa ngoro davo ku mpadi doye, mposhi vavo ngava yive ashi ame kwa kuhorora ghunene. ¹⁰ Yira momu tupu wa limburuka naku tikitamo nkango dande na veta dande na dimuragho dande nadintje ove mbyo wa kara na lididimiko, ame nganu kupopera ku mayuva ghaghudito ogho ana karo kumeho ove ngaghu pire ku ngena mu masheteko ghamadito ghunene ogho ana karo kumeho ogho ana kuyo mu udjuni naghuntje, masheteko na maghudito ghamanene ogho ana kuyo ku vantu vamu ghudjuni naghuntje vapano pa ntunda ya livhu. ¹¹ Ame kuna kuya weno ntani papepi na kara naku tika. Kwaterera kuvi ruwana vyoye ovyo ghuna ku ruwana pa weno mposhi ngaghu pire ku kombanita nkata yoye ya mapenda yaku dwata ku mutwe. ¹² ''Kehe ghuno waku funda ame nganu mutura nga kare ngundi yaku kora yaku kwata mu Ntembeli Ya Karunga wande. Ghuye kapi nka nga rupukamo ndi nga tundemo, ntani ame nganu tjanga naku tura lidina lya Karunga wande papendi, ntani na lidina lya shitata shashipe sha Karunga wande (Yerusalemu yayipe, kuna kutunda mu liwiru kwa Karunga wande weno kuna ku sheghumuka pa livhu), ntani nka name nganu tjanga lidina lyande lyalipe papavo lyaku neyeda ashi vavo vantu vande. ¹³ Kehe ghuno akaro na matwi ghaku yuvha, ayuvhe ovi yina kutanta Mpepo ya Karunga ku lipongero lyaku mbunga Kirisite.''' ¹⁴ ''Tjangera mu Engeli waku lipongero lyaku mbunga Kirisite yaku Leghodesiya ashi: 'Ame waku tikitamo nkango nadintje odo vatjanga mu mbapira, ntani ame mukareli waku tikiliramo ntani ame mbangi ya ghushili, ntani ame waku pangera lishito lya Hompa Karunga na lintje, kuna ku ghamba ashi. ¹⁵ "Ame nayiva viruwana vyoye navintje, ntani ove kapi ghuna tende parutu ntani kapi ghuna pyapyara parutu. Ame kuna shana ghukare ashi kuna tende parutu ndi kuna pyapyara parutu, nkene shi ove kapi wa kanana lidina lyande ntani ove kapi wa kara na shihoro shaku kwande! ¹⁶ Mukonda ya weno, ove kapi ghuna pyapyara parutu ntani kapi ghuna tende parutu - kutanta shi kwato oko ghuna hamene - ame kuna shana ku kuruka ghutunde mo mukanwa kande. ¹⁷ Ove kuna ku ghamba ashi, 'Ame muntu wamu ngagho, kwa weka limona lya liyingi ghunene, kwato nka ovyo nganu hepa.' Nane ngoli ove kapi wayiva ashi ove muntu wa lihudi, ove muntu waku remana, ove muntu wa ruhepo, ove muntu waku vera, ove muntu wamu twiku ntani ove muntu wamu here-here. ¹⁸ Terera naku yuvha naku tambura nkando dande dino ashi: ghura ngorodo ku kwande yaku tereka mu mundiro yaku kushuka yaku pongoka yaku hungama ngaghu wane limona lya ghushili, ntani ngaghu wane ghupongoki waku tunda ku kwande ngaghu kare na vidwata vyaku kena, ngaghu dwateke rutu roye rwa muhere-here mposhi ngaghu pire ku kara muntjoni namu lishwaghu, ntani ghura mutondo wamu mantjo waku tunda ku kwande ngaghu ku rokere mu mantjo ghoye ngaghu veruke ngaghu pahuke ngaghu tameke kumona ngaghu yive ghushili. ¹⁹ Ame ku deghura kehe ghuno na hora, ntani naku ronga vantu vande ashi weni omu va vhura kuparuka. Mpo ngoli shi, ku shighurenu naku tjindja ghukaro wenu anwe mushuve naku shayeka ku ruwana ghudona makura ngamu wapeke ghukaro wenu. ²⁰ Kenga, ame kuna yimana pa livero lyoye kuna ku ngongora. Kehe ghuno waku yuvha liywi lyande makura nga gharure livero lyendi, ame nganu ngena mu mundi wendi nganu kalye kumwe naye, ntani naye nga kalya name makura na tuvantje ngatu ka tunga kumwe tupu. ²¹ Kehe ghuno waku funda ame nganu katapa shipundi ku kwendi ngaka shungire name ku shipundi shande sha ghuHompa, yira momu na funda name mbyo na shungira kumwe nava Vava ku shipundi shavo sha ghuHompa. ²² Kehe ghuno akaro na matwi ghaku yuvha, ayuvhe ovi yina kutanta Mpepo ya Karunga ku lipongero lyaku mbunga Kirisite.'''''