¹ Tjangera mu Engeli wa mbunga Kirisite yamu Efeso ashi: 'Dino nkango kuna ku tunda kwaghu akwaterero dino mbungururu ntano-na-mbiri mu lighoko lyendi lya rulyo ntani ndje waku yenda mukatji ka shitondo sha maghuywekero gha ramba dino matano-na-mbiri da ngorodo, kuna ghamba ashi, '' ² Ame kwa yiva viruwana vyoye, na maghudito ghoye, ntani na lididimiko lyoye, ntani ove kwato ku kengerera vantu varuwane ghurunde, ntani ove wava kona-kona kare vano vantu vaku ku twenya vavene ashi mbo va Apositoli nane ngoli kapi shi vaghushili, mbyo wava dimburura ashi vavo va Apositoli va vimpempa. ³ Ame na yiva lididimiko lyoye ntani namu wa shimba mudigho wa ghudito mukonda ya lidina lyande, ano ngoli kapi wa roroka ghushuve viruwana vyande. ⁴ Ano ngoli ame kuna kudi ku vyuka ku koye kwavi vyaku hamena vino, ove kapi ghuna kara na shihoro name yira momu wa kalire na shihoro paku hova. ⁵ Vhuruka wangu-wangu ashi ku ninko oku wa tunda. Ku shighure ntani wapeka ghukaro ghoye ghukare na shihoro shaku hova ntani ruwana viruwana vyoye vyaku hova. Nkene kapi ghuna ku ku shighura wangu-wangu, ame nga nuya ku koye nganu ghupepo ghuywekero waku yimanena ramba yoye ngayi tundepo pa livhango lyagho. ⁶ Ove kwa ruwana ghuwa na ghuhunga kwa vino: Ove kwa nyenga viruwana vyava Nikolayite, yira momu navi nyenga name. ⁷ Ove wa karo na matwi ghaku yuvha, yuvha yino mbudi yina ku ghamba Mpepo ya Karunga ku mapongero gha mbunga Kirisite. Kehe ghuno waku funda ame nganu mutwara ngaka ngena mu Paradisa mu shikunino sha Hompa Karunga, ghuye nga kalya nyango yaku shitondo sha liparu.''' ⁸ ''Tjangera mu Engeli waku lipongero lya mbunga Kirisite ya Shimirena ashi: 'Odino nkango kuna kutunda kwaghu waku hoverera ntani ndje nka waka hulilira, ghuye kwa fire ano ngoli weno ghuye kuna kara na monyo, ghuye kuna ku ghamba ashi: ⁹ ''Ame na yiva maghudito ghoye na ruhepo roye ntani na yiva nka ashi ove muntu wamu hutu, ano ngoli ove muntu wamu ngavo. Ovano vantu vaku twenyango vavene ashi va Yuda kumu rundira naku mughamba mwa mudona, ano ngoli vavo kapishi va Yuda vene-vene. Vavo kwa hamena ku mbunga ya Satana. ¹⁰ Kapi shi ngamu kare na ghoma mukonda ya mahepeko ogho ngamu gwanekera nagho. Kengenu! Mudjonaghuli nga kwata vantu vamwe vamu mbunga yenu ngava ka ngene mu dorongo ntani ngava ka wane masheteko ghaku ku shuva-shuva, ntani vavo ngava ka kara murunyando ghure wa mayuva murongo. Ove kara na lipuro ntani na lididimiko dogoro kumfa doye, ame nganu ka tapa ku koye nkata ya monyo ya mapenda yaku dwata ku mutwe. ¹¹ Kehe ghuno akaro na matwi ghaku yuvha, ayuvhe yino mbudi yina ku ghamba Mpepo ya Karunga ku lipongero lyaku mbunga Kirisite. Kehe ghuno waku funda, kapi nka ngaka wana ghudito na shiponga ku mfa ya ghuviri.''' ¹² '' Tjangera mu Engeli waku lipongero lyaku mbunga Kirisite ya Peregamu ashi: Odino nkango kuna ku tunda kwaghu akwaterero mu lighoko rufuro rwaku twepa rwaku teta kuviri, ashi: ¹³ "Ame na yiva ashi oko ku livhango mwa tunga, nko lya kara lipundi lya ghuhompa wa lipangero lya Satana. Nampili ngoli anwe mbyo mwa kwa terera lidina lyande. Ame na yiva nawa-nawa ashi anwe kapi mwa shuva lipuro lyenu lyaku kwande, na mpili mu ruvede rwa Antipasi mukareli wande na mbangi yande waku yuvita mbudi yande, kwa kara na lipuro, dogoro ku mfa dendi, ghuye kwa kalire ghumwe wamu mbunga yenu, nkoko ku mbara ya Satana. ¹⁴ Ntani ame na kara na mbudi yayididi yayidona yaku hamena ku kwenu ashi: Mpovali shimpe vamwe mu mbunga yenu ovo va kwaterero ku marongo gha Balamu, ogho atapire naku ronga kwa Balaka, ghuye waku teya viraha mundjira ngava lyatemo naku pundukamo vantu vamu muhoko wa Isirayeli makura ngava lye ndya daku djambera kuva Karunga vaku vintjwontjo ntani naku ruwana vya rushonda rwa djanyi. ¹⁵ Ntani nka, shimpe mpovali vamwe vamu mbunga yenu ovo vana ku kwamo marongo ghava Nikolayite, ogho na shwena. ¹⁶ Tjinda ghukaro, ku shighure! Nkene kapi ghuna ku tjindja ghukaro ghoye ghuku shighure, ame nganu kwa ngura kuya ku koye, nganu ku rwanita na rufuro rwamu kanwa kande, Nkango da Karunga. ¹⁷ Kehe ghuno akaro na matwi ghaku yuvha, ayuvhe ovi yina ku ghamba Mpepo ya Karunga ku lipongero lyaku mbunga Kirisite. Kwa kehe ghuno waku funda, nga kalya mana yaku horama yaku tapa nkondo murutu, ntani nka ngaka wana liwe lya lipe lya likenu, kwa tjangapo lidina lya lipe, ntani kwato waku yiva lino lidina nkwandi ndjegho tupu vana litambeke ti.''' ¹⁸ ''Tjangera mu Engeli waku lipongero lyaku mbunga Kirisite ya Tiyatira ashi: 'Odino nkango kuna kutunda kwa Mona Karunga, ogho akaro na mantjo ghaku twera yira makara gha mundiro, ntani wa mpadi daku vembera yira shikugho sha ngoporo vana putju, kuna ku ghamba ashi: ¹⁹ ''Ame na yiva viruwana vyoye vya viwa vya ghuhunga ovyo wa ruwana ku kwande: ntani na yiva shihoro shoye shaku kwande ntani na lipuro lyoye lyaku kwande ntani na lihuguvaro lyoye lyaku kwande ntani na viruwana vyoye vya viwa vyaghu kareli karunga ku vantu ntani na lididimiko lyoye mu virugho vya maghudito. Ame na yiva ashi viruwana vyoye vino vya ntantani vyaku hulilira vya hungama ghunene ntani vya wapa ntani vina pitakana vyaku hova. ²⁰ Ano ngoli ame kuna kudi ku vyuka ku viruwana vyoye vyaku hamena weno: Ove kwa kengerera ghuno mukadi wa lidina Jesabela, waku ku twenya mwene ashi ghuye mu Porofete. Marongo ghendi ghaku pukita vantu vande va vayingi vayende vaka ruwane vya rushonda rwa djanyi ntani na kulya ndya daku djambera kuva Karunga va vipemba. ²¹ Ame kuna ku mupa shirugho aku shighure naku tjindja naku wapeka ghukaro wendi, ano ngoli ghuye ana shwena ntani kapi ana shana ku ku shighura naku tjindja naku shuva ghukaro wendi wa rushonda. ²² Kenga! Ame nganu murangeka pa ghuro mu ghuvera wa ghunene kumwe na vantu vendi na vantje va rushonda ngava wera mughuvera wa tjutju naku kukora ghunene, nkwandi vana hepa ku ku shighura naku tjindja ghukaro wavo va shayeke ku ruwana ghurunde na rushonda. ²³ Ame nganu toghona naku dipaya vana vendi na vantje ngava pwe kufa, mposhi mapongero ghamu mbunga Kirisite na ghantje ngava yive ashi ame ku kenga naku kona-kona vya munda ya mutjima wa muntu kumwe naku kenga ovi vya vandomo. Ame ku futa kehe muntu ku twara mu viruwana vyendi. ²⁴ Ku kwenu vantu vaku hupako vamu Tiyatira, anwe mwa pirango ku yiva naku kwama marongo gha madona ntani nanwe mwa piro kuyiva marongo gha Satana ghaku horama gha madona gha ghufeke - ame kuna kumu tantera ashi, 'Ame kapi naku wederera ko ku ghudito wenu namu digho wenu ogho mwa shimba.' ²⁵ Anwe, kwa tererenu ngoli ku lipuro lyenu na marongo ghenu ogho muna kara nagho weno dogoro mpopo nganu ya tika ku kwenu. ²⁶ Kehe ghuno waku funda ntani naghu waku ruwana viruwana vyande vitikiliremo dogoro ku ghuhura, ame nganu ka tapa ku kwendi lipangero na nkondo daku pangera virongo.' ²⁷ Ghuye ngaka pangera na nkonda daku fana yira mburo ya shikugho yaku djindja, ghuye ngaka kadjonaghura naku hanaghurapo vantu va varunde yira momu va bomonanga vapoto va lirova na mburo. ²⁸ Ame ku pangera na nkondo daku tunda kuva Vava, name nganu katapa mbungururu yaku tema ghunene ngura-ngura mu ruvindwira kwa kehe ghuno waku funda ngaka kare na ruhafo. ²⁹ Kehe ghuno akaro na matwi ghaku yuvha, ayuvhe ovi yina ku tanta Mpepo ya Karunga ku lipongero lyaku mbunga Kirisite.