¹ Ame makura anu mono agho ashungiro ku shipundi sha ghuHompa kuna kwa terera mbapira ku liwoko lyendi lyaku rulyo oyo ya karo na mapepa ghaku tjanga pa ntunda na munda, mbyo vayipata na makumba matano-na-maviri. ² Ame anu mono mu Engeli wa nkondo kuna kughamba na liywi lya nkondo lyaku dameka ghunene ashi, ''Are akaro na nkondo daku vhura kutjora naku paturura ghano makumba aye weno atjore naku paturura afikure yino mbapira?'' ³ Kwato muntu wamu liwiru ndi wapa ndunda ya livhu ndi wakuntji ya livhu waku vhura ktutjora naku paturura yino mbapira vayi varure munda. ⁴ Ame kwa lira ghunene mukonda shi kwato ghumwe waku vhurura kutjora naku paturura makumba va varure yino mbapira. ⁵ Makura ghumwe wa matimbi aghamba ku kwande ashi, ''Kapishi ghulire. Kenga! Nyime wa muhoko wava Yuda, wamu lira lya Dafiti, kwa funda vino vita. Ghuye ku vhura kutjora naku paturura ghano makumba matano-na-maviri vafikure naku varura yino mpapira.'' ⁶ Ame anu mono ndjwighona kuna yimana mukatji ka vipundi vya ghuHompa ntani yayo kuna kara mukatji ka vikoramo ntani matimbi nagho kuna yi kundurukida mukatji. Ndjwighona kuna ku moneka ashi yina kara na livavi parutu, ku moneka ashi yayo kwayi dipayire. Yayo kwa kara na mbinga ntano-na-mbiri ntani na muntjo matano-na-maviri, vino ku tanta ashi dino Mpepo ntano-na-mbiri da Karunga odo atuma diyende pa ntunda ya livhu ku mavhango naghantje. ⁷ Ndjwighona kwa yenda yika ghupe mbapira mu liwoko lya rulyo lyaghu ashungiro ku shipundi sha ghuHompa. ⁸ Opo aghupire yino mbapira, makura vino vikorama vine ntani na matimbi dimurongo mbiri-na-vane ava kugandere pa livhu va tongamene ku shipara sha Ndjwighona. Kehe ghuno kwa kwatilire shikitara shaku veta ntani na shisha sha ngorodo shaku yura vitutumukita vyaku nuka lidumba lya rupekwa, ku tanta ashi dino ndapero da vantu va Karunga vaku pongoka. ⁹ Vikorama na matimbi kuna kuyimba rushumo rwarupe ashi: "Ove kwa kara na nkondo daku vhura kutjora naku paturura ghano makumba vafikure yino mbapira. Ove kwa ku fire, mbyo wa vhumbuka makura mbyo wa yoghora vantu navantje na honde yoye ngava kare vantu va Karunga vaku tunda kwa kehe muhoko, na kehe liraka, ntani namu virongo navintje. ¹⁰ Ove kwava yita mu ghuntungi wa Hompa vakare va Pirisiteli ntani na muhoko waku pongoka wa mbunga yaku karera Hompa Karunga wetu, ntani vavo mbo ngava karo vapangeli va pano patunda ya livhu.'' ¹¹ Ame kwa mona naku yuvha maywi gha mbunga yava Engeli va vayingi vavo kuna kundurukita shipundi sha ghuHompa shikare mukatji kumwe na vikorama ntani na matimbi. Shivaro shava Engeli kwa kalire mayovi murongo na mayovi murongo ntani liyovi na liyovi. ¹² Vavo kuna kuyimba na liywi lyaku dameka ashi, ''Ndjwighona, oyo vadipayire, kwa hungama muku wana lipangero lya linene lya nkondo mposhi navantje ngava mutange naku mupanda, naku mushamberera naku mufumadeka mukondashi ghuye kwa kara na limona, na ghukonentu, na nkondo, na ghuyerere, na mayere ntani na mfumwa.'' ¹³ Makura ame anu yuvhu vishitwa na vintje: vishitwa vyamu liwiru na vishitwa vyapa ntunda ya livhu ntani na vishitwa vya kuntji vya munda ya livhu ntani na vishitwa vya mulifuta - ntani na vishitwa navintje vyamu ghudjuni - kuna ku ghamba ashi, ''Tuna hepa ku tapa mfumwa naku shamberera kwaghu ashungiro ku shipundi sha ghuHompa ntani na Ndjwighona vavo kwa kara na nkondo, na ghuyerere, ntani na nkondo daku pangera naruntje naku naruntje.'' ¹⁴ Vino vikorama vine avi ghamba ashi, ''Amen! ntani Matimbi dimurongo mbiri-na-vane ava ku gandere pa livhu naku tongamena pa ngoro vatape mpandu naku tanga Hompa Karunga ntani na Ndjwighona.