¹ Ja̧'hua̧nö̧ ja̧'a̧ Siria ttö̧ja̧rö̧ ru̧hua̧ Ben-adadmä umöhuäyotö su̧ro̧da̧u̧rö̧ ca̧ca̧ti̧nö̧ ja̧u̧cu̧mä̧ 32nö̧ ruhuotö ppättäda'anä, ttä̧ji̧mö̧ cabsyu̧tö̧rö̧'i̧nä̧ ttöcaruquiyä Samaría tö'cö ki̧nä̧tö̧ juȩnȩtä̧ kä̧nö̧ rohuäö icuinäcu̧. ² Huȩnȩ jiäcuähuä ttö̧ja̧rö̧ hue'inö Israel ttu̧ru̧hua̧ Acabrö jittähuäja pä'ö. ³ Pa̧'a̧nö̧ jö̧nä̧ pä'äji ru̧hua̧ Ben-adadmä cuiäre pärätätä, cuiäre oro'inä, ttötä chiäre jä̧cua̧'a̧ cumöhuäyotö nä̧tö̧'i̧nä̧, cui̧tti̧mö̧ adihuätö'inä ttötä jä̧cua̧'a̧. ⁴ Israel ru̧hua̧mä̧ ädätö pä'inö: Ucu päcu'anötä̧ jä̧cua̧'a̧, ttö chu̧ru̧hua̧ ru̧hua̧ o'cajuiyönä chu̧ju̧nä̧rö̧mä̧ ucutä cuiäre jä̧cua̧'a̧. ⁵ Pä'äjita'anö huȩnȩ jiäcuähuä ttö̧ja̧ ppa̧'a̧chö̧ pä'inätö̧ pa̧'a̧nö̧ pä'äji Ben-adadmä: hue'äjisä jittähuacu pä'ö. Cuiäre pärätä'inä, cuiäre oro'inä cui̧tti̧mö̧'inä cuittimörö'inä cui̧yä̧cua̧jä̧ pä'ö. ⁶ Koromä pi̧yȩ juäisometä̧ huȩdä̧cua̧sä̧ chumöhuäyotörö, ucu cuojusode ttusähua pä'ö, cumöhuäyotö ttojusode'inä ttusähua pä'ö jahuätömä o'cajuiyönä nua'a jueimä ttȩmi̧pä̧cuo̧tö̧. ⁷ Ja̧'hua̧nö̧ ja̧'a̧ttö̧ Israel ru̧hua̧mä̧ ttipiyuttömä ttä̧mö̧ jö̧nä̧ huotörö huopö pä'inö: Ttu̧'ȩpä̧rä̧chi̧'ä̧tu̧cui̧ pidemä surojutä usu, ja̧'hua̧nä̧ ja̧'a̧ttö̧ chi̧rȩcua̧mö̧rö̧'i̧nä̧, chi̧tti̧mö̧rö̧'i̧nä̧ iyäjisä, chiäre pärätä'inä chiäre oro'inä iyäjisä. ⁸ Ja̧'hua̧nö̧ ja̧'a̧ o'catoi'önä ötahuiyättö tä̧mö̧ jö̧nä̧ huotömä ädätinätö̧: cuesetärö, jä'epömä cu̧jä̧rö̧. ⁹ Ja̧'hua̧nö̧ ja̧'a̧ ru̧hua̧ Ben-adad u̧mö̧huäyorö pä'inö: Cumöhuöyorö jäcuepäjimä jȩchä̧cua̧sä̧. Pä'äjita'anö jäcuäpömä jȩchi̧ya̧rö̧ ja̧'hua̧nö̧ ja̧'a̧ttö̧ u̧mö̧huäyotörö'inä ja̧u̧rö̧ pä'äjita'anö ppa̧'ä̧chi̧nä̧tö̧ päji huȩnȩ jittähua pä'ö. ¹⁰ Ben-adadmä pä'äjita'anö umöhuäyotörö pa̧'a̧nö̧ jittähuiyärö pä'ö hue'inö. Tö̧ä̧nä̧huo̧tö̧mä̧ huä̧i̧nä̧tä̧ cuä̧'ö̧ ttiicuattö ja̧, Samaria ötahuiyä i̧sa̧ppȩtä̧ päi'önä toe'öttömä, chumähuäyotörö'inä huäinä cuäcuättäcuotö. ¹¹ Israel ttö̧ja̧ ttu̧ru̧hua̧mä̧ pa̧'a̧nö̧ ädatinö, Yate curä ttö̧ja̧sa̧ ucurä'cacu jo̧mȩnö̧ räopächa pä'ö jo̧mȩnö̧ kö̧mä̧ pa̧'a̧nö̧ jȩ'cuä̧cuo̧tö̧jä̧ päöjuiyö'anö ja̧'a̧ jo̧mȩnö̧ jȩpä̧tö̧ a̧'cua̧rö̧nä̧mä̧. ¹² Ädätäji huȩnȩ ä̧ju̧cu̧mä̧, koro ruhuotucu ahuoya au pä̧nö̧ umöhuäyotörö pä'inö jo̧mȩnö̧ adicuätucui päomenö jahuätömä jo̧mȩnö̧ adicuinätö̧ tturohuähua pä'ö. ¹³ Dios i̧huȩnȩ jiäcuähuä i̧sa̧mä̧ Israel ttö̧ja̧ ttu̧ru̧hua̧ Acadrö topö 'chä̧ji̧'ca̧ pä'inö pa̧'a̧nö̧ pä'äji chu̧ru̧hua̧ Diosmä ¿Cuaboiyotö recuätörö topäjä tä̧ji̧? Ttömä chaboiyotörö cuiminä chiyäcujä pidemä ttö chu̧ru̧hua̧ ja̧'a̧ ja̧u̧mä̧ pä'ö. ¹⁴ Acab ädätinö "Tide umönä? Ja̧u̧mä̧ pä'inö ötahuiyättö ruhuotö ttumöhuäyotö ttumönä iyipäji. Acab pä'inö ¿Dijä̧ttö̧ ä̧cuo̧mȩnä̧ urohuähuäcua̧mä̧? Ja̧u̧ ädätinö ucutä ja̧'a̧. ¹⁵ Ja̧'hua̧nö̧ ja̧'a̧ttö̧ ötahuiyä ruhuotörö ca̧ca̧tö̧ pä'inö jahuätömä 232nö ji̧na̧'a̧, ja̧u̧nu̧ o'comenä ötahuiyä ttö̧ja̧'i̧nä̧ Israel ttö̧ja̧ tti̧tti̧mö̧'i̧nä̧ o'catoi'önämä 7 milnö ji̧na̧'a̧. ¹⁶ Kä̧hua̧ jueö kö̧rö̧ rä'opächinätö̧, jua'atä ki̧nö̧ ru̧hua̧ Ben-adadmä, ojusodenö a̧huä̧yu̧ au tä̧'ä̧mä̧'chö̧tä̧ ki̧nö̧ umöhuäyotucutä, jahuätömä 32 milnö ji̧na̧'a̧ ppa'ädö ichäjätömä. ¹⁷ Ötahuiyätö ruhuotö ttumöhuäyotö ji̧na̧'a̧ ä̧cuo̧mȩnä̧ rä'opinätö̧mä̧, Ben-adadmä ä'canä jittähuäja pä'ö hueäja'a ji̧na̧'a̧. Täcö Samariara̧'a̧cu̧ u̧mä̧tö̧ ichäjätötó pä'ö. ¹⁸ Ja̧'hua̧nö̧ ja̧'a̧ ja̧u̧mä̧ pä'inö: Huȩnȩ juiyönä ttichäjittö'inä, rohuäu ttichäjittö'inä tta̧'cua̧ra̧'a̧nä̧ 'chu'ädätucuitö. ¹⁹ Ötahuiyättö ruhuotö tturuhuotö päjätömä, ötahuiyättö rä'o'ö tto'ca'anä 'chä̧hui̧'ö̧ 'chuttädinäu. ²⁰ O'catoi'önä ttaboiyotö päjätömä cuä'äu tticuinäu̧ korotömä töttipächa'a rutti'inäu̧, ja̧'hua̧nö̧ ja̧'a̧nä̧ Siria ttu̧ru̧hua̧ Ben-adad'i̧nä̧ umöhuäyotucu cabayu̧tö̧nä̧ tö'ipächinö. ²¹ Israelttö ru̧hua̧'i̧nä̧ rä'opö cabayu̧tö̧nä̧'inä, caruquiyänä'inä 'chä̧tö̧rö̧mä̧ cuä'äu si'epö icuinä̧u̧. ²² Ja̧u̧nu̧ o'comenä Dios i̧huȩnȩ jiäcuähuä i̧sa̧, Israelttö ru̧hua̧rö̧ pä'inö, jo̧mȩnö̧ adicui'ipö kä̧hui̧, ya'ute a̧'ȩ 'cuäo'ö o'ca'a, Siria ttu̧ru̧hua̧mä̧ pä'äjita'anö rohuäu i̧chä̧cua̧ ucuru. ²³ Siria ru̧hua̧ umöhuäyotömä pä'inätö̧: Israel ttö̧ä̧nä̧huo̧tö̧mä̧. mö̧ä̧'quiyö'inä ttö̧ä̧nä̧huotö ja̧'a̧, ja̧'hua̧nö̧ ja̧'a̧ttö̧ jȩpö̧ tticuaja̧u̧jä̧, ja̧'hua̧nö̧ ja̧'a̧nä̧ pä̧mä̧roppätötä si'epö tticu'anö huotö. ²⁴ Ja̧'hua̧nö̧ jö̧ttö̧mä̧ ruhuotörömä emö icuätucui, su̧ro̧da̧u̧ tturuhuotörö ku̧nö̧ ²⁵ U̧cu̧mä̧ ko̧ro̧tö̧ jarepotucu curä rohuähuätörö emö pä'äji tottechä'ächome yorecuächönä, cabayu̧tö̧nä̧'i̧nä̧ caruquiyättö'inä, ja̧u̧ o̧'co̧mȩnä̧tä̧ rȩjȩ pä̧mä̧romettö̧ turohuähuäcuotöjä̧, huȩnȩ juiyönätä jȩpö̧ ti̧cuä̧cuäu ruhuomä pättäji'anötä̧ jȩpi̧. ²⁶ Ya'ute a̧'ȩ 'cuäopinö o'ca'a Ben Adadmä umöhuäyotö su̧ro̧da̧u̧rö̧ ä̧tȩpi̧nö̧ Siriarö Afec rȩjȩttö̧ israel ttö̧ja̧ tturohuähua pä'ö. ²⁷ Ja̧'hua̧ta̧nö̧ Israel i̧tti̧mö̧'i̧nä̧ usäu 'chi̧nä̧tö̧, täcö jo̧mȩnö̧ jȩpä̧tö̧'cotö ja̧'hua̧ta̧nö̧ topäcuähuinätö̧, Israel i̧tti̧mö̧ su̧ro̧da̧u̧mä̧ cabra i̧tti̧mö̧ jä̧'i̧nö̧'a̧nö̧tä̧ huinätö̧ Asiattö su̧ro̧da̧u̧mä̧ rȩjȩ pä̧mä̧ro̧mȩmä̧ suhuädi'ina'a. ²⁸ Ja̧'hua̧nö̧ ja̧'a̧ Dios u̧mö̧huä̧ya̧ 'chi̧nö̧ Israel ru̧hua̧ ö̧jo̧mȩcu̧ ja̧u̧rö̧ ucuocu pä'inö: Pa̧'a̧nö̧ pä'ö Diosmä Sirio ttö̧ja̧mä̧ pä'ätö möä'quiyötä ttö̧ä̧nä̧hua̧ Diosmä, meje'quiyutä, ja̧'hua̧nö̧ ja̧'a̧ttö̧ su̧ro̧da̧u̧mä̧ recuätö ja̧'a̧nä̧ ucu cumönätä̧ chi̧yi̧pä̧u̧. Ja̧'hua̧nö̧ ja̧'a̧ttö̧ Dios ja̧'a̧ pä'ö ttu̧huo̧juä̧cuo̧tö̧. ²⁹ 6nö mo̧ro̧mä̧ ttahuaruhuäcu pönä ca̧ca̧cuä̧rö̧ ka̧cui̧nä̧tö̧, ji̧mö̧tȩttö̧ todäre päi'omenä täcö curä rohuäu kä̧mä̧di̧nä̧tö̧, Israel i̧tti̧mö̧mä̧ cuä'ö icuinätö̧ Siriarö ya'ute mo̧ro̧tä̧mä̧ 100 milnö umätö̧rö̧. ³⁰ Korotömä tö'ipächinätö̧ Afec, ötahuiyära̧'a̧ jua'attö 27 milnö umätö̧rö̧ ka̧cui̧pä̧jä̧tö̧rö̧ ttoecuä'ca mo̧i̧nä̧u̧, ja̧'hua̧ta̧'a̧nö̧ Ben andad'inä ötahuiyära̧'a̧cu̧tä̧ tö'ipächö yo̧ca̧tȩnä̧ dajahuächinö. ³¹ Ja̧'a̧hua̧nö̧ ja̧'a̧ttö̧ umöhuäyotö pättinäcu̧, ujutumä ä̧ju̧cuä̧jä̧tö̧jä̧ Israel rȩjȩttö̧ ruhuotömä rȩrö̧jö̧ topätödo, ja̧'hua̧nö̧ jö̧ttö̧mä̧, täcänä tȩä̧ta̧ tu̧nä̧huä̧tu̧cua̧, tusacuyunämä isappä ti̧'ä̧dä̧cuä̧u̧, rȩrö̧jö̧nö̧ topitö pähuä jä̧cua̧'a̧, ja̧'hua̧nö̧ jȩpö̧ ru̧hua̧ ä'ca jo̧mȩ ti̧'chä̧tu̧cua̧ ta̧'cua̧rö̧ jȩpö̧ icua'acu. ³² Ja̧u̧nu̧ o'comenä i̧sä̧ta̧ täcänä ru̧nä̧hui̧'i̧pö̧ tusacuyunä isappä ti̧'ä̧dä̧cuä̧hui̧'i̧pö̧ Israel ru̧hua̧ ä'ca jo̧mȩ 'chä̧hui̧'ö̧ pättinäcu̧: Cu̧mö̧huä̧ya̧ Ben adadmä pä'äji cha̧'cua̧rö̧ jȩpö̧ icuhuiyattöhue, ja̧u̧mä̧ ädätinö ji̧nä̧ a̧'cua̧rö̧ttö̧mä̧, ja̧u̧mä̧ ttö chi̧jä̧hua̧tä̧ hua̧. ³³ Jahuätö umötö̧mä̧ adiunä päji huȩnȩ ȩpi̧nä̧tö̧, jurunänö päji huȩnȩ 'chä̧hui̧'ö̧ pä'inätö̧: Isopäi'önätä cui̧jä̧hua̧ Ben adadmä kö̧, ja̧'hua̧nö̧ pä'äji, ȩmä̧jä̧tu̧cui̧rö̧ ja̧'hua̧nö̧ ja̧'a̧ttö̧ Ben adadmä Acab ä'ca jo̧mȩ 'chä̧hui̧'i̧nö̧, ja̧u̧nu̧ o'ca'a carucä ju'tä 'cahuächi'önä hueinäcu̧. ³⁴ Ben Adadmä̧ pä'inö: Ttömä cuiäre ötahuiyä chä'o 'choipinömä ppädäcua̧jä̧ ja̧'hua̧nö̧ ja̧'a̧nä̧ Damasconä cuähuä iyähuome päi'önätä̧ jȩ'cuä̧ji̧, chä'o Samaria ötahuiyä jȩi̧nö̧'a̧nö̧tä̧ pää'inö Acabmä, Ja̧'hua̧nö̧ päcua'attö cä'ädö chicuäcua̧jä̧ cui̧hua̧ pä'ö cuyäru isojänä huȩyu̧tu̧ tti̧huȩnȩ ppättahuaji o'ca'a i̧hua̧ pä'ö hue'ö icuinäcu̧. ³⁵ Ja̧'hua̧nö̧ ja̧'a̧ Dios i̧huȩnȩ jiäcuähuä ttö̧ja̧ tti̧tti̧, Dios päji'anötä̧ pä'inö a̧hua̧ru̧hua̧rö̧, jitämä cuä'ittö päcu ja̧u̧mä̧ cuä'u icua pä'ömä kä'co pinö. ³⁶ Ja̧u̧mä̧ päinäcu̧: Dios päjimä cuesetoca'aja̧ttö̧mä̧, poröttö tucuipächomenämä, möyähuiyätä jȩpö̧ i̧cuä̧cua̧jä̧ ja̧'a̧ttö̧, töipächäji o'ca'a ya̧tȩ mö yähui po̧cui̧pö̧ cuä'ö icuinäcu̧. ³⁷ Ja̧u̧nu̧ o'ca'a ka̧ra̧ uborö po̧cui̧pi̧nö̧, ja̧u̧rö̧ pä'inö, jitämä cuä'ittö. Päcu cuäinäcu̧ ötta päi'önätä̧. ³⁸ Dios i̧huȩnȩ jiäcuähuä i̧sa̧ tö'ipächäji'ca̧ mä̧nä̧ ä'ca tta̧'ä̧ri̧nö̧ ru̧hua̧ icha'anä, ö'änämä jerutäcuäu icuinö i̧sä̧bä̧ ti̧'ä̧dä̧cuä̧u̧. ³⁹ Ru̧hua̧ 'cuäopomenämä päinäcu̧, huopö pä'inö ru̧hua̧rö̧ ucu cumöhuä̧ya̧mä̧ curä tturohuähuome kä'cottö tö'ipächäji, ja̧u̧mä̧ ttö chu̧ja̧'a̧cu̧ ichi'ö pä'äji pide uborö tta̧'a̧ru̧yi̧ttö̧ ja̧u̧ töipächöttömä ucu cua̧'cua̧rö̧nä̧tä̧ cuimitä̧huä̧cua̧jä̧, ja̧'hua̧nö̧ jo̧ca̧'a̧ jö̧ttö̧mä̧ ya'ute talento pärätänä cuimitähuä̧cua̧jä̧. ⁴⁰ Ucu cumöhuä̧ya̧mä̧ koro'inä, koro'inä jȩö̧ pä̧nä̧ ja̧u̧ ubomä tu'ipächäji, ja̧hua̧nö̧ ja̧'a̧ ru̧hua̧mä̧ päinäcu̧, ucutä ja̧'a̧ huȩnȩmä̧ ucu päcuäji'anötä̧ cumitä̧huä̧cua̧jä̧. ⁴¹ Ja̧'hua̧nö̧ ja̧'a̧ ja̧u̧mä̧ ö'änä ti̧ä̧da̧cuä̧huä̧ta̧ ko̧'ä̧dö̧ cuä'ö icuinö̧, ja̧'hua̧nö̧ jȩo̧mȩnä̧ Israelttö ru̧hua̧mä̧ ttu̧'ȩpä̧rä̧chi̧'i̧nö̧ Dios päö huȩnȩ jiäcuähuä i̧sa̧ ja̧'a̧ pä'ö. ⁴² Ja̧u̧mä̧ pä'inö pa̧'a̧nö̧ päji Diosmä ya̧tȩ a̧'cua̧rö̧ huedäji'anö jȩpö̧ cuicuaja'attö ucutä ja̧'a̧ i̧mi̧nä̧ tocue'äcua̧jä̧, cuahuaruhuä'inä ja̧u̧ ahuaruhuä totte'äji'anötä̧ totte'äcuotö. ⁴³ Ja̧'hua̧nö̧ päö ä̧ju̧cu̧ Israelttö ru̧hua̧mä̧ a̧'cua̧ juiyächi'inäcu̧ ajahuinö. Samariara̧'a̧ ojusodecu ppa̧'ä̧chi̧nö̧.