¹ Acabmä ji'ähuinö Jazabelrö o'cajuiyönä Elías jȩä̧ji̧mä̧, juhua'a jö̧ta'anö o'catoi'önä hue'ähuotörö curodänä cuä'äu icuäji'inä - jiähuinäcu̧. ² Ja̧'hua̧nö̧ ja̧'a̧ Jezabelmä hue'inäju̧ ya̧tȩ jiäcuähuä i̧sa̧rö̧ Elíasrö jiähuäja pä'ö, koro'inä pä'chäcuähuä juiyönä ttö̧ä̧nä̧huo̧tö̧mä̧ huä̧i̧nä̧ ro̧ttȩpa̧tö̧ pä'ö. A̧'a̧ yo̧ä̧i̧ mo̧ro̧ pi̧yȩtä̧ horasnä cua̧'cua̧rö̧mä̧ jȩpö̧ chicuococu päjijä̧, ucutä jahuätörö jȩpö̧ cuicuäji'anömä. ³ Elíasmä ye'ecui'ö tö'ipächinö ö̧ji̧pa̧ pä'ö ja̧'hua̧nö̧ ja̧'a̧ Judá rȩjȩttö̧mä̧ Beersebarnä rȩbȩhui̧nö̧, juȩnȩtä̧ ku̧ni̧pi̧nö̧ u'uttädinäcu̧rö̧mä̧. ⁴ Ja̧'hua̧nö̧ ja̧'a̧ ja̧u̧mä̧ i̧hui̧nö̧ mä̧nä̧nä̧ ya'ute mo̧ro̧ 'cuäo'önä de'a'inä jui̧yä̧jä̧nä̧. Ja̧'hua̧nö̧ i̧huo̧mȩnä̧ mȩji̧yä̧ dau ko̧mȩ rȩbȩhui̧nö̧, täcö 'curupäia'anö päi'önä juiyöpächi'äjitä. Ja̧'hua̧nö̧ ja̧'a̧ttö̧ juäitä dau u̧ju̧tä̧ro̧mȩ pä̧mä̧dö̧ pä'inö: "Täcö huä̧i̧nä̧ ja̧'a̧ chu̧ru̧hua̧ cha̧'cua̧rö̧mä̧ jȩpö̧ icuittö ttömä chä̧do̧tö̧ mi̧nä̧ ji̧nö̧'a̧nö̧mä̧ adihuä i̧sa̧mä̧cö̧sä̧" ⁵ Ja̧'hua̧nö̧ ja̧'a̧ juäu dau u̧ju̧tä̧ro̧mȩ kada'ca pä̧mä̧dö̧ ä'i'inö, ja̧'hua̧nö̧ ä'i'äji o'ca'a ya̧tȩ isoppa hua̧ ichi'ö me'ö̧ päinäcu̧: "Ä̧rä̧mi̧'ö̧ cu̧cuä̧ cuiti" ⁶ Ja̧'hua̧nö̧ ja̧'a̧ Elías ippeyä ja̧'a̧cu̧ toomenä topinö: U ja̧'a̧cu̧ jo̧mȩ sa̧dä̧'ca ka̧'a̧ adiunä cuä̧mi̧'ö̧nä̧ ocuränä ȩttä̧huä̧'ca. Juhua'a jö̧ta'anö ajiya acuäba'inä ka̧'a̧. Ja̧'hua̧nö̧ ja̧'a̧ cuä̧nö̧'i̧nä̧ cuinö, au'inä ahuinö ja̧u̧ cä'ädömä pä'äjita'anö pä̧mä̧dö̧ ä'i'inö. ⁷ U̧ru̧hua̧ umöhuä̧ya̧ isoppa hua̧ päjitä ppa̧'a̧chö̧ todärenä päi'önä me'ö̧ päinäcu̧: Ä̧rä̧mi̧'ö̧ cu̧cuä̧ cuiti däje pä'ö mänänä cai̧huä̧cua̧'a̧mä̧ oto jä̧cua̧'a̧. ⁸ Elíasmä ä̧rä̧mi̧'ö̧ u̧cuä̧'i̧nö̧ cuinö, a'u'inä ahuinö, ja̧u̧ u̧cuä̧ cuä̧nö̧ cä'ädömä täcö juruhuächi'inö. Ja̧'hua̧nö̧ ja̧'a̧ttö̧ i̧hui̧nö̧ ttö̧ja̧ ta̧ju̧ mo̧ro̧ jo̧mȩnä̧, ttö̧ja̧ ta̧ju̧ yodo jo̧mȩnä̧ Horebnä i̧rȩbȩhuo̧mȩnä̧ jubö, juhuenä de'amä Dios ö̧jo̧mȩ ji̧na̧'a̧. ⁹ Juhuoröttömä idoränä do'ächi'ö ya'ute yodo jo̧mȩnä̧ ä'ö pinö. Ja̧'hua̧nö̧ ja̧'a̧ ja̧u̧ru̧mä̧ u̧ru̧hua̧ i̧huȩnȩ rȩbȩhui̧pö̧ pa̧'a̧nö̧ päinäcu̧: ¿Elías porömä däje jȩ'cua̧'a̧ttö̧? ¹⁰ Ja̧u̧mä̧ ädätinö ä'cuoyähuäcuäönö kö̧sä̧ ttö̧ja̧ ttö̧ä̧nä̧hua̧ Diosmä Israel ttö̧ja̧ tti̧tti̧mö̧mä̧ ucuocu todeunä kä̧cuä̧huä̧ jä̧'i̧jö̧mä̧ jaropi'äjätö ucuru ucuotö jȩpö̧ ku icu iyähuä o'ca jä̧'i̧jö̧mä̧ jȩpö̧ icuäjätö. Ucuttö hue'ähuotö pä'ijätörömä curodänä cuä'äu icuäjätö ji̧nä̧ a̧'cua̧rö̧mä̧ ttö katä hua̧tä̧ ki̧'i̧pä̧ji̧sä̧ ja̧'hua̧nö̧ ja̧'a̧nä̧." ¹¹ Ja̧u̧mä̧ päinäcu̧: U̧mi̧cu̧ rä'o'ö de'attömä cu̧ru̧hua̧ ä'ca jo̧mȩ kä̧mä̧di̧, däje pä'ö täcö juȩnȩnä̧tä̧ 'cuädopa pä'ö kö̧sä̧. Ja̧'hua̧nö̧ ja̧'a̧ juȩnȩtä̧ ö̧ja̧'a̧ u̧ru̧hua̧ 'cuä'opinö isoppa juruhuoppa ichina'a de'a'inä toeina'a inähuiyä'inä durächipina'a tu̧ru̧hua̧ ä'ca jo̧mȩttö̧mä̧. Ja̧'hua̧nö̧ ja̧'a̧nä̧ Tu̧ru̧hua̧mä̧ isoppanämä ko̧cö̧ pinö, juoppa isoppa o'ca'anämä ttö̧ȩpi̧na̧'a̧, ja̧'hua̧nö̧ ja̧'a̧nä̧ Tu̧ru̧hua̧mä̧ ttö̧ȩpö̧ juäinämä ko̧cö̧ pinö. ¹² Ja̧'hua̧nö̧ ja̧'a̧ ttö̧ȩpä̧ji̧ o'ca'anämä ocurä'inä ichina'a, ja̧'hua̧nö̧ ja̧'a̧nä̧ ocurä o'ca'anämä ttucuocua'a jä̧'i̧nö̧'a̧nö̧ jä̧'i̧nö̧ ja̧'a̧nä̧ ra̧huä̧pi̧jö̧nä̧ ucuocuina'a. ¹³ Elías ja̧u̧ huȩnȩ ä̧ju̧cuo̧mȩnä̧ ö'ä tto'ecuinö chutä ö̧'ca̧tä̧huä̧ta̧ huä̧mȩ i̧sä̧ta̧nä̧, ja̧'hua̧nö̧ jȩpö̧ idorä ä'ca rä'opinö, ja̧'hua̧nö̧ ja̧'a̧ tu̧ru̧hua̧ i̧huȩnȩ ä̧ju̧cui̧nö̧ churutä pa̧'a̧nö̧ ucuocu pä'a: ¿Elías däje jȩ'cua̧'a̧ttö̧ porömä? ¹⁴ Ja̧u̧mä̧ ädätinö: Ttö̧ja̧ ttö̧ä̧nä̧hua̧ Diosrömä ä'cuoyäunö kö̧sä̧. Israel ttö̧ja̧ tti̧tti̧mö̧ ucucu todeunä kä̧cuä̧huä̧ jä̧'i̧jö̧mä̧ jaropi'äjätö; ucuru ucuotö ku icu iyähuä o'ca jä̧'i̧jö̧mä̧ jȩpö̧ icuäjätö. Ucuttö hue'ähuotö pä'ijätörö'inä curodänä cuä'äu icuäjätö ja̧'hua̧nö̧ ja̧'a̧nä̧ ji̧nä̧ a̧'cua̧rö̧mä̧ ttö ka̧tä̧hua̧tä̧ ki̧'i̧pä̧ji̧sä̧ ji̧nä̧ ttusäcusä cuä'ö tticuattö pä'ö. ¹⁵ Ja̧'hua̧nö̧ ja̧'a̧ tu̧ru̧hua̧ päinäcu̧: Mä̧nä̧ cuichinämänätä̧ ppa̧'ä̧chi̧ de'a jui̧yä̧jä̧ttö̧mä̧ Damascora̧'a̧tä̧ täi. Juhuene cui̧rȩbȩhuo̧mȩnä̧mä̧ a̧dȩj dacuepajá Hazeelrötä siria rȩjȩttö̧ ru̧hua̧ päi'önä ö̧jä̧cua̧rö̧. ¹⁶ Mimsi i̧tti̧ Jehurö'inä a̧dȩja dacuepajá Israel ttö̧ja̧ ttu̧ru̧hua̧ päi'önä ö̧jä̧cua̧rö̧, juhua'a jö̧ta'anö Safat i̧tti̧ Eliseorö'inä a̧dȩja dacuepajá Abet-Meolatt'inä ucutä cuo'come huȩ'ä̧hua̧ päi'önä aditä̧cua̧rö̧'i̧nä̧. ¹⁷ Ja̧'hua̧nö̧ ja̧'a̧ Hazael ucurä'chunä cuä'ö tticu juiyarö pä'ö tö'ipächäjirömä Jehútä jä̧cua̧'a̧ ja̧u̧rö̧ cuä'ö i̧cuä̧cua̧mä̧, ja̧'hua̧nö̧ jö̧ta'anö Jehú ucurä'chunä cuä'ö tticu juiyarö pä'ö tö'ipächäjirömä Eliseotä jä̧cua̧'a̧ ja̧u̧ru̧ cuä'ö i̧cuä̧cua̧mä̧. ¹⁸ Ttömä jȩchä̧cua̧sä̧: Israel ttö̧ja̧ttö̧mä̧ 7 mil jo̧mȩnä̧ huotörö Baal ä'ca jo̧mȩ ttihue'quiyunä ja̧rȩyu̧ pä'i'ö kä̧mä̧do̧co̧tö̧ pä'ijätörömä, juhua'a jö̧ta'anö ttänä'inä 'chu̧'o̧po̧co̧tö̧ pä'ijätörömä - pä'inö Tu̧ru̧hua̧mä̧. ¹⁹ Elíasmä juhuottö rä'opö ichomenä po̧cui̧pi̧nö̧ Safat i̧tti̧ Eliseorö 'cuä'opö ö̧ja̧'a̧ pä̧cä̧yu̧ 12nö̧ huotöcu isähuänä ttö̧ja̧cua̧'a̧nä̧, chutämä röjinä juȩ'ȩpä̧ri̧nö̧. Ja̧'hua̧nö̧ ja̧'a̧ Elíasmä 'cuä'opinö eliseo ä'canä, ja̧'hua̧nö̧ 'cuä'opö kä̧nö̧ ö̧'ca̧tä̧huä̧ta̧ huä̧mȩ i̧sä̧ta̧ icuinö ja̧u̧ru̧tä̧ huä̧mä̧dö̧nä̧. ²⁰ Ja̧'hua̧nö̧ ja̧'a̧ Eliseomä pä̧cä̧yu̧rö̧ icuipö Elías o'ca'anä jopächö 'chä̧hui̧'ö̧ pä'inö: Jä'epösä ucuru huecuattö pä'ö chä'orö'inä, cha̧ju̧ru̧'inä te'äu 'chu̧do̧pa̧ja̧ pä'ö, ja̧u̧ni̧u̧u̧ o'ca'atä ucucu chi̧chä̧cua̧sä̧. Ja̧'hua̧nö̧ ja̧'a̧ ja̧u̧mä̧ päinöcu̧ täi, ppa̧'ä̧chi̧, ¿Ttömä däje jȩchä̧cu̧ttö̧? ²¹ Ja̧'hua̧nö̧ ja̧'a̧ Eliseomä ppa̧'ä̧chi̧nö̧, ppa̧'ä̧chä̧ji̧'ca̧mä̧ pä̧cä̧yu̧rö̧ 'chu'ädö cuä'ö icuinö de'ämä ocurä so'äji'ca̧ ttö̧ja̧rö̧ iyä'chinö, ja̧'hua̧nö̧ i̧yä̧u̧ jahuätömä cuinätö̧ ja̧u̧nu̧ o'ca'amä ä̧rä̧mi̧'ö̧ Elías o'ca'anä 'chinö, ja̧'hua̧nö̧ ja̧'a̧ttö̧ täcö chutä aditähuä päi'önä ppä̧'ä̧dä̧ri̧nö̧.