¹ Pa̧'a̧nö̧ jo̧mȩnä̧ recuo mo̧ro̧ 'cuäopinö o'ca'a rȩbȩhui̧na̧'a̧ tu̧ru̧hua̧ tö̧ä̧nä̧hua̧ i̧huȩnȩ Elíasnä, huäbodäcuä du'o ajiya joö pä̧nä̧, pä'inödo: "Topi, i̧jȩcuä̧ji̧ Acabrö ja̧'hua̧ta̧'a̧nö̧ ttö huȩdä̧cua̧sä̧ ajiya icha pä'ö juä̧jä̧ rȩjȩnä̧." ² Elíasmä i̧jȩcu̧ 'chi̧nö̧ Acabrö; Samaria ötahuiyänä ppäi rö̧ä̧nä̧ ppäi ttu'inätö̧do. ³ Acab huopinödo Abdiarö, ru̧hua̧ ojusode tta̧huä̧rä̧cuä̧huä̧ i̧sa̧rö̧. Abdiamä rö̧ä̧nä̧ a̧'cua̧ huȩnä̧ri̧nö̧do u̧ru̧hua̧ ö̧ä̧nä̧hua̧rö̧. ⁴ Ji̧yȩnö̧ pä̧nä̧ Jezabel'inä cuä'äu icuinäjudo tu̧ru̧hua̧ tö̧ä̧nä̧hua̧ i̧huȩnȩ ttä'cacu 'cuä̧o̧pä̧cuȩ huȩnȩ ji'ähuä'ijätörö, Abdiamä ttö̧ja̧ ttu̧mö̧ jimöte ru̧hua̧ pu̧nä̧ daju icu hua'adä'chu rutinödo idoriyänä ja̧'hua̧ta̧'a̧nö̧ pan o̧ppä̧ ttucua pä'öinä iyinödo, ajiya ttahua pä'öinä i̧yo̧pä̧ri̧nö̧do. ⁵ Acab pä'inö Abdiarö: "Topäji rȩjȩnä̧ 'chä̧nö̧ o'cajuiyönä aje o'uhuiyä duboriyä sö o̧dö̧nä̧'i̧nä̧. ujutumä tö̧'o̧cui̧'ä̧cuo̧tö̧jä̧ a̧'cua̧ra̧'a̧ mȩji̧yä'che tä̧ji̧mö̧ cabayu̧tu̧, mulatö'inä cuänö tta̧'cua̧ri̧'a̧ pä'ö, o'catoi'önä de'a ruhuä totte'äcuähua'acu pä'ö" hua'ö tticua'acu, ⁶ Ja̧'hua̧nö̧ jo̧mȩnä̧ jahuätö ttö̧ja̧mä̧ tti̧rȩjä̧ pö̧nä̧ ȩmö̧ tö'ipächinätö̧do ja̧huä̧jä̧nä̧ 'cuättopäcua'a pä'ö ja̧'hua̧ta̧'a̧nö̧ ajiya ttahua ttusähua pä'ö. Acabmä mänä jimätenä ichinö ja̧'hua̧ta̧'a̧nö̧ abdiamä koromänä 'chi̧nö̧do. ⁷ Abdiamä mänänä ö̧ji̧'o̧po̧'a̧dä̧, Elíasmä a̧mu̧cuä̧ro̧co̧mȩ ö̧'o̧cui̧'i̧nä̧cu̧. Abdiamä ttu̧'ȩpä̧ri̧'i̧nö̧do ja̧'hua̧ta̧'a̧nö̧ ihue'quiyönä kä̧mä̧di̧nö̧do ö'ä rȩjȩcu̧ pä̧i̧'ö̧nä̧ ja̧rȩyu̧nö̧ jȩpi̧nö̧ ja̧u̧ pä'inö: "¿Ucutä ja̧'a̧ chu̧ru̧hua̧ Elíasmä? ⁸ Elías ja̧u̧rö̧ ädätinö: "Topi Elíasmä pȩnȩtä̧ kö̧" ⁹ Abdías ädätinö: ¿Tta̧'a̧nö̧ pä'ö suronä jȩ'cuä̧ttö̧ ucu cumöhuä̧ya̧rö̧ Acab umönä cuiya pä'ö ja̧u̧ cuä'ö icua pä'ö ja̧'a̧ pomä? ¹⁰ Cu̧ru̧hua̧ cu̧ä̧nä̧hua̧ Diosr kö̧ pi̧jä̧nä̧mä̧ juiya'a tä̧ji̧ ruhuo'inä ttö chu̧ru̧hua̧ umätö̧rö̧ ttusa hue'a pä'ömä pi̧jä̧nä̧ ka̧cuä̧tö̧ ruhuonä hue'ätö'inä pä'ätö: "Elíasmä pȩnȩtä̧mä̧ toa'a, Acabmä o'catoi'önä ruhuo hue'ätörö pä'inö isopäi'önä päcuätucua'anö ja̧'a̧ tö̧'o̧cui̧'u̧ juiyönä hua̧jä̧ pä'ö pä'inö. ¹¹ Ja̧'hua̧nö̧ ja̧'a̧nä̧ u̧cu̧mä̧ pä̧cuä̧cua̧sä̧: "Täi, ji'ähuäji Elíasmä pȩnȩtä̧ kö̧ pä'ö." ¹² A̧'u̧cua̧'a̧tä̧ jö̧ o'comenä, tu̧ru̧hua̧ tö̧ä̧nä̧hua̧ ȩpä̧cua̧jä̧ yo̧mȩtȩ ttö'inä chieruhuome. Ja̧u̧nu̧ o'comenä 'chä̧nö̧mä̧ ja̧'hua̧ta̧'a̧nö̧ ji̧cuä̧huä̧cua̧jä̧ Acabrö, ja̧'hua̧ta̧'a̧nö̧ ja̧u̧ ö̧'o̧cui̧'ä̧jä̧'a̧ jö̧ttö̧mä̧, cuä'ötä i̧cuä̧cua̧sä̧. Ja̧'hua̧nä̧ ja̧'a̧nä̧ ttö ucu cumöhuä̧ya̧ cha̧'cua̧ huȩnä̧rä̧'i̧jö̧sä̧ chu̧ru̧hua̧ chi̧ä̧nä̧hua̧rö̧ ji̧'qui̧cha̧hua̧ttö̧tä̧ päi'önä. ¹³ Ji'äcuähuocö pinäjä̧di̧, ttö chu̧ru̧hua̧rö̧ ttö jȩchi̧nö̧ tu̧ru̧hua̧ ti̧ä̧nä̧hua̧ i̧huȩnȩ jiäcuähuä ttö̧ja̧rö̧ Jezabel cuä'äu kicuinö pä̧nä̧ 'cuäopinömä, ¿Tta̧'a̧nö̧ jȩpö̧ dajö chicuina'a päcua'attö̧, ttö̧ja̧ ji̧mö̧tȩ ruhuärö tu̧ru̧hua̧ ti̧ä̧nä̧hua̧ i̧huȩnȩ jiäcuähuä ttö̧ja̧rö̧ ttö̧ja̧ ta̧ju̧ ja̧'a̧nä̧ ka̧ra̧ u̧mö̧ tomörȩnö̧ huotö pönärö dajö icuinösä̧ idorä jacuä jahuätörö cuäjepinösä̧ pan ttucua pä'ö ajiya ttahua pä'ö'inä iyocö pinösä̧ tä̧ji̧? ¹⁴ Ja̧'hua̧ta̧'a̧nö̧ jitämä ucumä pä'öjä̧ "Tä'i ji'ähuäji Elísmä pȩnȩtä̧ kö̧ pä'ö; cuä'ö icuattö pä'ö." ¹⁵ Ja̧'hua̧nö̧ päji o'comenä̧ Elías ädätinö: "A̧'cua̧rö̧ curä ruhuotö tti̧ä̧nä̧hua̧, ja̧u̧ ä'ca jo̧mȩ kö̧sä̧, isopäi'önä chi̧jȩcuä̧cua̧sä̧ Acabrö jitä mo̧ro̧." ¹⁶ Ja̧'hua̧nö̧ jo̧mȩnä̧ ja̧'hua̧ta̧'a̧nö̧ jiähuinä̧cu̧ Elías päji huȩnȩ. ¹⁷ Ji̧yȩnö̧ pä̧nä̧ Acab topinö Elíasrö, pä'inö: ¿Ucutä ja̧'a̧? Ucu Israel ttö̧ja̧ huȩnȩ pä̧i̧pä̧rö̧nä̧ jȩpä̧'chä̧'i̧jö̧mä̧! ¹⁸ Elías ja̧'hua̧nö̧ pä'a ä̧ju̧cu̧ ädätinö ja̧u̧rö̧ ttömä Israel ötahuiyä ttö̧ja̧ tta̧'cua̧tta̧ttȩcuä̧'chu̧nä̧mä̧ jȩpo̧cö̧ pä'ijusä, ja̧'hua̧ta̧'a̧nö̧ ucu cuä'ottö cuahuaruhuä jä̧'i̧ja̧'a̧ huȩnȩ kä'ebe'ä̧rä̧tu̧mä̧ chu̧ru̧hua̧ chi̧ä̧nä̧hua̧ hueinö huȩnȩ'i̧nä̧ jarotti'ä'chönä jȩpä̧tö̧mä̧ ja̧'hua̧ta̧'a̧nö̧ Baal tti̧ä̧nä̧hua̧rö̧ tta̧'cua̧ huȩnä̧rö̧ tti̧'chö̧nä̧. ¹⁹ Ja̧'hua̧nö̧ ja̧'a̧ jitämä, cui̧huȩnȩ hue'i Israel ttö̧ja̧ o'catoi'önä Carmelo de'a muä'quiyunä ttö̧ca̧ca̧cui̧'a̧ pä'ö ttöcu, ja̧'hua̧ta̧'a̧nö̧ 400nö̧ huotörö Baal i̧huȩnȩ jiäcuähuä ttö̧ja̧rö̧'i̧nä̧ ja̧'hua̧ta̧'a̧nö̧ 400nö̧ huotörö yapare tti̧ä̧nä̧hua̧ isaju Asera ki̧huȩnȩ ji'ähuätörö'inä Jezabel kiäre mesattö cuä'ijätörö'inä." ²⁰ Ja̧'hua̧nö̧ jo̧mȩnä̧ Acabmä i̧huȩnȩ hue'inö o'catoi'önä Israel ttötahuiyä ttö̧ja̧rö̧ ya̧nä̧ 'cuäopö jiäcuähuä ttö̧ja̧ ji'ähuäjätö pönä̧rö̧ Carmelo muö'cara̧'a̧ ttö̧ca̧ca̧cui̧ya̧rö̧ pä'ö jȩpi̧nö̧. ²¹ Elíasmä ichinö ttö̧ja̧ ttö̧jo̧mȩ pä'inö: Jä'epö ä̧ju̧cui̧nö̧ jähuätörö ¿Ucutumä tta̧'a̧nö̧ pä'ö recuo päi'önä 'chä̧nö̧ cuicuätucuäcua'ajä̧ttö̧ a̧mö̧cuädö cucuocuätucumä? A̧'a̧ isopäi'önä ja̧u̧tä̧ ja̧'a̧ Ti̧ä̧nä̧hua̧ Diosmä, ja̧u̧ru̧tä̧ cua̧'cua̧ huȩnä̧rö̧ tätucui. Ja̧'hua̧nö̧ pä'ö jiähua'anä ttö̧ja̧mä̧ yoriso ttädätococu pinö ji̧yȩtȩ tti̧huȩnȩ'i̧nä̧. ²² Ja̧'hua̧nö̧ 'koruttiyäcu Elías pä'inö jahuätö ötahuiyä ttö̧ja̧rö̧ "Ttö katätä ki̧'ö̧sä̧ tu̧ru̧hua̧ ti̧ä̧nä̧hua̧ i̧huȩnȩ isopäi'önä jiäcuähuä huȩnȩ jiäcuähuä isotö ttö̧ja̧sa̧mä̧, ja̧'hua̧nö̧ ja̧'a̧nä̧ Baalrö jiäcuähuä ttö̧ja̧rö̧ 450nö̧ huotörö umätö̧ ja̧'a̧. ²³ Pa̧'a̧nö̧ pä'ö huopäjisä jahuätörö ta̧ju̧rö̧ Torotö̧rö̧ iyitö. Ja̧'a̧tä̧ topi jitörötä pä̧huä̧rö̧jo̧mȩnä̧ ttȩma̧'a̧nä̧ jitö'inä ya̧tȩ tororö ja̧'hua̧ta̧'a̧nö̧ ja̧u̧rö̧ 'cui'cuipö tticuäcuotö ppo̧u̧cu̧ pö̧nä̧, ttu̧huȩnä̧ja̧ soähuäcä dauhuiyä huä̧mȩ, ja̧'hua̧nö̧ ja̧'a̧nä̧ ocurä juiyönätä̧ jahuäcä dȩa̧'a̧mä̧. Ttö'inä jo̧mȩnö̧ jȩchä̧cua̧sä̧ ka̧ra̧ tororö, ja̧'hua̧ta̧'a̧nö̧ chu̧huȩnä̧cua̧sä̧ soähuäcä huä̧mȩ, jahuäcä dȩa̧'a̧mä̧ ocurä chujuhui̧yä̧cua̧sä̧ juȩnȩmä̧. ²⁴ Ja̧u̧nu̧ o'comenä ucutumä cui̧ä̧nä̧huo̧tu̧cu̧ diosrö huopö cudoro'ätucuajä̧, ja̧'hua̧ta̧'a̧nö̧ ttö'inä chi̧ä̧nä̧hua̧rö̧ huo̧chä̧cua̧sä̧ chu̧ru̧hua̧ i̧mi̧nä̧ ocuränä ädätome jubö päi'önä ja̧u̧ jä̧cua̧'a̧ isopäi'önä Diosmä. Ja̧'hua̧nö̧ pä̧i̧yä̧u̧ jahuätö o'catoi'önä ädätinätö̧ pä'inätö̧: "Ja̧'hua̧nö̧ jö̧ttö̧mä̧ pi̧yȩmä̧ isopäi'önä adihua'a." ²⁵ Pa̧'a̧nö̧ pä'inö Elíasmä Baal i̧huȩnȩ jiäcuähuä ttö̧ja̧rö̧: "Ja̧'hua̧ta̧'a̧nö̧ ucutu'inä ȩmä̧tu̧cui̧ jo̧mȩnö̧ jȩpä̧tu̧cui̧ ä̧cuo̧mȩnä̧tä̧, dä̧bu̧ pä'ö ucutumä juiyo recuätöjä̧. ja̧'hua̧nö̧ jo̧mȩnä̧ cu̧ru̧hua̧ cu̧i̧ä̧nä̧hua̧ iminä huopätucui, ocurämä cujuhuätucuó tororö soähuäcä dȩa̧'a̧mä̧. ²⁶ Jahuätö ȩmi̧nä̧tö̧ ja̧u̧ tororö i̧yä̧hua̧ päjirö ja̧u̧nu̧ o'comenä jo̧mȩnö̧ jȩpö̧ ku̧ni̧nä̧tö̧do, huopö'inä huopinätö̧do tti̧ä̧nä̧hua̧ diosrö pä'ö mo̧ro̧ päia'a rutädipö kä̧hua̧ jueö päi'ome jubö cä'ädö, pä'inätö̧do: Baal ä̧ju̧cui̧tö̧ ja̧'hua̧nö̧ ja̧'a̧nä̧ ä̧dä̧to̧co̧u̧ pinätö̧ ya̧tȩ'i̧nä̧ 'coru jö̧nä̧tä̧. Jahuätömä ku icu iyähuäca̧ jäyänä sobutä̧rö̧ tö'inätö̧do jahuäcä soähuäcä jäyänä. ²⁷ Täcö mo̧ro̧ kä̧hua̧ jueö päia'a, Elíasmä jahuätörö ya̧'a̧huä̧'chi̧nä̧do pä'inö: ¡Pä̧i̧cu̧nä̧ huopätucuirö ja̧u̧ ja̧'a̧ diosmä jinä amöcuädö a̧'cua̧ra̧'a̧, koro jȩpö̧ 'cua̧ra̧'a̧, kara'a i̧huo̧cö̧ mä̧nä̧nä̧, ä'ö'inä ä'i'äji 'cua̧ra̧'a̧, ja̧'hua̧ta̧'a̧nö̧ ttö'odarö pä'ö a̧'cua̧ka̧'a̧. ²⁸ Ja̧'hua̧nö̧ ji̧yä̧u̧mä̧ pä̧i̧cu̧nä̧ 'qui'ächö huopinätö̧do. Jitötä korojueinä nonopä̧cuä̧hui̧nä̧tö̧do, ihueye jȩttä̧'i̧jö̧ta'anö ttucuoja erome jubö päi'önä nonopä̧cuä̧hui̧nä̧tö̧ jitötätä. ²⁹ Ja̧u̧nu̧ mo̧ro̧ kä'co jubö päi'önä, ja̧'hua̧ta̧'a̧nö̧ jahuätö ji̧nä̧ huopä'chinätö̧do ä'canä jiäcuähuä ttö̧ja̧'i̧nä̧ ni̧pä̧ro̧mȩ päi'önä ttiäre ku icu iyähuä iyinätö̧do, ja̧'hua̧nö̧ ja̧'a̧nä̧ 'coru ji̧na̧'a̧do ya̧tȩ i̧huȩnȩ rä̧mi̧po̧ca̧'a̧tä̧ ya̧tȩ'i̧nä̧ ädäta pä'ömä, ³⁰ Ja̧'hua̧ta̧nö̧ Elías pä'inödo o9'catoi'önä ötahuiyä ttö̧ja̧rö̧: "Ichätucui tö'cönänö päjita'anö o'catoi'önä ttö̧ja̧ ja̧u̧ ö̧jo̧mȩ tö'cö ichinätö̧do, ichi'ö ca̧ca̧cui̧pi̧nä̧tö̧. Ja̧'hua̧ta̧'a̧nö̧ u̧ru̧hua̧ i̧ä̧nä̧hua̧rö̧ i̧yä̧huo̧ca̧ surojuoächina'amä jareönä aditinödo. ³¹ Elías 12nö ido'qui ȩmo̧po̧'ä̧nö̧do, yo'quite ido'quimä i̧jȩcuä̧ päi'önä ji̧na̧'a̧, Jacob i̧tti̧mö̧ yotucupönä yottähuäcua'a jö̧ta'anötä̧, dä̧bö̧ pä'ö Jacobtä ji̧na̧'a̧ tu̧ru̧hua̧ ti̧ä̧nä̧hua̧ ucuocuinäcumä päinäcu̧: "Ucumä cuimicuä̧cua̧jä̧ Israel pä'ö. ³² Ja̧u̧ ido'quiyönä u̧ru̧hua̧ ö̧ä̧nä̧hua̧rö̧ ku icu iyähuä'ca 'ca̧tö̧ tätö aditinödo ja'huä'ca jäyänä a̧hui̧yä̧ rö̧nö̧ sa'inödo soböcuöchönä ö̧rö̧ä̧'i̧nä̧ u̧huä̧ju̧ ote tena pä'ö satta'a jä̧'i̧nö̧'a̧nö̧ jö̧nä̧. ³³ Ja̧u̧mä̧ mi tta̧ti̧nö̧do cuoäcua'a pä'ö ja̧'hua̧ta̧'a̧nö̧ tororö'inä ppo̧u̧cu̧ o'ca pönä 'cui'cuipinödo de'ämä, ja̧u̧ toro idepämä suhuädi'önä rötinädo mica huä̧mȩ. Päinäu̧: Pa̧ja̧cuä̧nö̧ obanä ajiya su'epätucui ku icu i̧cuä̧huä̧cuȩ huä̧mȩ to'ätucui a̧cuä̧mä̧chi̧'ö̧nä̧ päi'önä riripö mi'inä. ³⁴ Ja̧'hua̧ta̧'a̧nö̧ pä'inödo: Todärenä päi'önä jȩpä̧tu̧cui̧ hueöta'anö jȩpi̧nä̧tö̧ todärenä päi'önä, ja̧u̧nu̧ o'comenä pä'äjita'anö hueinä̧u̧ "Jȩpä̧tu̧cui̧ huäbodäcuänä päi'önä" jahuätö hueöta'anö jȩpi̧nä̧tö̧do huäbodäcuänä päi'önä." ³⁵ Ku icu iyähuä'ca sobucuächönä roya ajiya ki'ädi'ö a̧cuä̧mä̧chö̧nä̧ suädi'ina'ado. ³⁶ Ja̧'hua̧ta̧'a̧nö̧ ku icu iyähuä jä̧ji̧ jȩtta̧ pättäji mo̧ro̧mä̧ täcö nipä̧ro̧mȩ päi'ina'ado, Elíasmä Dios i̧huȩnȩ jiäcuähuä i̧sa̧ ji̧na̧'a̧do tö'cönänö ichi'ö pä'inödo: Chu̧ru̧hua̧ chi̧ä̧nä̧hua̧, Abraham'inä i̧ä̧nä̧hua̧ Diosjä̧, Isaac'inä, Israel'inä, ja̧'a̧tä̧ topitö jitä pi̧yȩ mo̧ro̧ ttu̧tȩpä̧ri̧'ä̧cua̧'a̧nö̧ ucutä ja̧'a̧ pä'ö Israel ttö̧ja̧ tti̧ä̧nä̧hua̧ Diosmä, ja̧'hua̧ta̧'a̧nö̧ cumöhuä̧ya̧sä̧ pi̧yȩ jȩchö̧mä̧ ucu cui̧huȩnȩ päöta'anö jȩpö̧sä̧. ³⁷ Chu̧ru̧hua̧ chi̧ä̧nä̧hua̧ ä̧ju̧cui̧ttö̧, pitö ötahuiyä ttö̧ja̧ ucutä ja̧'a̧ ru̧hua̧mä̧ pättönä, Dios'inä hua̧jä̧, ucutä ja̧'a̧ pä'ö ttamiso'qui jacuättö amöcuädö ppa̧ttä̧chö̧nä̧ jȩpö̧mä̧ ucutä ja̧'a̧ pä'ö. ³⁸ Ja̧'hua̧nö̧ jo̧mȩ tu̧ru̧hua̧ ti̧ä̧nä̧hua̧ ädätomenä ocurä ju'tojuttö maina'ado ja̧'hua̧ta̧'a̧nö̧ Diosrö ttiäre iyähuämä cuo'ö icuina'ado, pi̧yȩ mi'inä, inähuiyä'inä ajiya isahuiyanä acuäji'inä jo'epö icuina'ado ocurä rö̧ä̧nä̧ tejädi'ö du'i'omenä. ³⁹ Ji̧yȩnö̧ mo̧ro̧ o'catoi'önä topinätö̧do ötahuiyä ttö̧ja̧ pi̧yȩmä̧, tti'äpiyämä rȩjȩcu̧ ja̧rȩyu̧ päi'önä jȩpi̧nä̧tö̧do, "Ja̧u̧ tu̧ru̧hua̧ ti̧ä̧nä̧hua̧ ja̧'a̧, ja̧u̧tä̧ ja̧'a̧ Diosmä, ¡ja̧u̧tä̧ ja̧'a̧ isopäi'önä tu̧ru̧hua̧ ti̧ä̧nä̧hua̧ Diosmä! ⁴⁰ Ja̧'hua̧nö̧ pättiyäcu ä̧ju̧cu̧ Elíasmä pä'inö jahuätörö: "'Chu'ädätucuitö Baal i̧huȩnȩ jiäcuähuä ttö̧ja̧rö̧. Ja̧'a̧tä̧mä̧ to'cuätucuä jahuätörömä ya̧tȩ'i̧nä̧ ö̧ji̧pö̧tó." Ja̧'hua̧ta̧'a̧nö̧ jahuätörö 'chu'ädinätö̧, ja̧u̧nu̧ o'comenä Elíasmä Baal i̧huȩnȩ jiäcuähuä ttö̧ja̧rö̧mä̧ tti̧mȩyȩu̧nä̧ hue'inö Cisón aje siomecu̧ juorutä cuä'ö icuinäu̧. ⁴¹ Elíasmä pä'inödo Acabrö: "Ä̧rä̧mi̧'ö̧ cuiti cuä̧nö'inä ja̧'hua̧ta̧'a̧nö̧ au'inä ahui, ä̧ju̧cui̧ ajiya icha'a ucuocua'a pä'inö." ⁴² Ja̧'hua̧nö̧ 'cuäopäji o'ca'a Acabmä ucua pä'ö huä̧mä̧di̧nö̧ ahua pä'ö'inä. Ja̧u̧nu̧ o'comenä Elíasmä 'cha'achu huä̧mipi̧nö̧do Carmelo möä'ca ju'tä päjure beipome jubö, chutä rȩjȩcu̧ ja̧rȩyu̧nö̧ päi'önä jȩpi̧nö̧ ja̧'hua̧ta̧'a̧nö̧ i'ämä öjahuiyä 'quiyu 'cä̧tȩ päte'ö päi'önä jȩpi̧nö̧do. ⁴³ Ja̧u̧ pä'inödo̧ umöhuäya̧rö̧: Jitämä cha'achö topi aje de'ähuotocu ja̧u̧mä̧ u̧ru̧hua̧ hueöta'anö ye pä'inö, 'cha'achö topäji'ca̧ pä'inö: "Yorisotä juiya'a." Ja̧'hua̧nö̧ jiähuäcu Elíasmä pä'inö ja̧u̧ru̧: "Pä'äjita'anö topi, ttumö ji̧mö̧tȩ ja̧'a̧nä̧ koromöttö̧ to'cherenö päi'önä." ⁴⁴ Ttumö koromöttö̧ to'cherenö päi'omenä. umöhuä̧ya̧ pä̧i̧nä̧cu "Topi, ajiya isoppa aje de'ähuotottö 'chahuächa'a, ji̧'qui̧nö̧tä̧ ttö̧ja̧sa̧ umö jä̧'i̧nö̧'a̧nö̧ ja̧'a̧." Ja̧'hua̧nö̧ jiähuäcu Elíasmä ädätinö: 'Cha'ächö 'chä̧nö̧ ji'ähuäji Acabrö: Jo̧mȩnö̧ jȩpö̧ caruquiyä'inä ja̧'hua̧ta̧'a̧nö̧ mȩyȩhuä̧chö̧ täi ajiya ichäcua'a ä'canä cu̧ji̧pa̧'a̧cu̧." ⁴⁵ A̧'u̧cua̧'a̧tä̧ jä̧ji̧ o'comenä 'cuäopina'ado mo̧rjä̧'i̧nä̧ yo̧'cu̧ ni'ina'ado ajiya icha pä'ö ja̧'hua̧ta̧'a̧nö̧ ajiya isoppa'inä, ajiyamä rö̧ä̧nä̧ ichina'ado. Acabmä öcarucänä huä̧mä̧dö̧ 'chi̧nö̧do Jezreelra̧'a̧. ⁴⁶ Ja̧'hua̧nö̧ ja̧'a̧mä̧ Elíasmä tu̧ru̧hua̧ ti̧ä̧nä̧hua̧ umö jacuä ki̧nä̧do. ja̧u̧mä̧ jueö i̧sä̧ta̧ äcänä isappänä rä'ädäcuähuo'äji'ca̧ ti̧'ä̧dö̧ ku̧nä̧huä̧ji̧'ca̧ jopö 'chi̧nö̧ Acab o'ca'anä Jezreel mänä doächäcuähuome jubö päi'önä. Rȩbȩhui̧nö̧do Acabttö ä'canänö Dios a̧'cua̧ ihueyenä.