¹ Lriapodanpia David iwayacayan njaji filisteonai, nini David jitaca lriaji Gat nitse pjiomi njaji lrinomapiperje nitse corrisha filisteonai yajii nanaco. ² Nitse lriapodan lriwayaketa njaji Moabistanai nitse njaji ashiaanai lricadaca naorsoawa jipairrico lriwicarrona pacjaa jinorrotsicjasho. Nitse njaji lriwiji yamacjasho icasha lrinolrica, nitse njaji pacapesha jinorrotsi jiyapaca lricadashana cafi. Nini njaji moabistanai icasha David inaikiteca nitse nainita nacaweña natsaitacarro naofacao. ³ Nitse David iwayaketashaca lriaji Hadad Ezer Rehob irri, lriaji tsalricanatsi Soba lricodalri, lriajicadanacoa lriaji HadadEzer ajii ooni inomapi Eufrates lripietacarro shenaca lriwapaca lriaji lripaite. ⁴ Nini David jipaca lrioya 1,700 lricarruajen nitse veinte mil lrinaikite ashianai. Nitse David lriyoca nacawapji iitarrapite njaji caballo irsocape carruaje, misha lricadaca aimashca nanacoitse cien fiaa carruaje icoa. ⁵ Nitse njaji arameonai nanoca Damascolricoite nakishindatacarro lriaji Hadad-Ezer tsalricanatsi ajii Soba lrico, misha David iino 22 mil ashianai arameonai. ⁶ Nitse David icadaca lriowite iwapa ajii Aram-lrico adalriji Damascolrico. nitse njaji arameonai icamisha lricadacana lrinaikiteo nadejicarro lrirso. ima lriaji MAMINALRI lriasha icada David jiamacarro njaji lricoema akjerrecawasha lriawa. ⁷ Nitse David jipaca lriaji apaita owirroita nayadapia njaji lrinaikite lriaji Hadad-Ezer nitse lridecan Jerusalen rico. ⁸ Nitse ajii Beta-lrico Berotai shaca, Hadad-Ezer iyacalrerico, lriaji tsalricanatsi David lrita aima bronce naoya. ⁹ Nitse lriaji Toi, tsalricanatsi ajii Hamat lrico, lrimicadaco David iwayacaca njaji Hadad-Ezer ishorarate, ¹⁰ nitse Toi imenaca lrirri Joram lriacarro David iderse lricapani nitse lribendiciacarroni, David inoacacapoa Hadad-Ezer icoetse nitse lriwayaketana, ima Hadad-Ezer icaiteca lrinoacacarro Toi icoema. Misha lriaji Joram lrideca plrata, owirro, nitse bronce shaca lrinaiwa. ¹¹ Lriaji tsalricanatsi David lrienita njaji lritaji naoya nitse lricadaa Dio irso naa, pjiomi njaji palrata nitse owirro shaca nayada pjiomi njaji jipai nainoacajin icoema, ¹² Aram inacoitse, Moabistanai, Amon poco, njaji filisteonai, nitse njaji amalecitanai, nitse pjiomi napiya njaji lrishapaton lriaji Hadad-Ezer lrirri lriaji Rehob, tsalricanatsi Sobalrico. ¹³ Nitse lriaji David ipitana jorre lriacona yacao lritsaitacayami lrinoca njaji arameonai ajii marishitalrico Yokerracoa, napilla njaji lrinaikite 18 mil namaica njaji ashiana. ¹⁴ Nitse lricada lriowite iwapa naoyawaca pjiomi Edom lrico, nitse njaji edonitanai icasha lrinaikiteca. Nini lriaji Dio lricada lriamacana akjerrecawasha lriawa. ¹⁵ salricatsica lriaji David narso pjiomi njaji Israelnai, nini lriwapacana mashia nitse lriaji pjiomi nanaco njaji lriyacalretsa. ¹⁶ Joab lrirri lriaji Sarvia icapiasha njewidapoca njaji shoraranai, nitse lriaji Josafat lrirri lriaji Ahimelec inecada iacotsi tsalricanatsi icaitenda. ¹⁷ Nitse lriaji Sadoc lrienipe lriaji Ahitob nitse Ahimelec lrirri lriaji Abiatar icapisha jiepacaperrica, nitse lriaji Seraia icapiasha iajicada Dio iaco. ¹⁸ Nitse lriaji Benaia lrirri lriaji Joiada casha iwacapada lriaji tsalricanatsi, nitse njaji David ienipe caconaperricana lrirso lriaji tsalricanatsi.