¹ Icatsa njaji iacotica David icaietrri lricantanialre ricó jliadaa pia jalredaoca Dio iyomjetacani lripondape ioya, njite Saul ioya tsakja. ² Lriaco cayoji lritatja cádanaco: ''Jiipada taimí-dalrica jliaji no-Minalri, idaanatacada njoa, jliatsa Jliaji iyomjetacada-ca njoa.'' ³ Jiipada taimí-dalrica jliaji no-Diote. Lriinai nokeeta nofacawa nomaodacatsa. Jliatsa nodanaita, Jliatsa Jliaji iyomjetacadaca njoa, idaanatacada njoa, njite noofa carroda lricocani. ⁴ Nowanaotsa jliaji no-Minalri, ima icaamitsa jliaji pandaca irso matsiadalri, njite yomjeotsa njoa naoya njaji jipondatacape njoa. ⁵ Ooni iñokja idanatacada shoca njaji iomacape iinoca njoa, Namaca nocapaca njaji aimadan iomacape iwayaketaca njoa. ⁶ Jliaji irrirrí lriyofieta nodana jinorrotikja sho; njite mayamialri icadaa oowekja jlipashopa njoa. ⁷ Corri cádanacoenatsa notaita nowána jliaji no-Minalri; Nowana jliaji no-Diote; njite Jlimica nowanaca Lriofa carroda matsiadalri rikjoite njite noacoam nowanacawani naocawa Jlinaco lricojle. ⁸ Ikena cananica jliaji jiipai. Canani tsakja eeno irrocawa niini lricarsacawa lrirrocawa njiteo Dio iirroa ikjaote. ⁹ Ítacati imotowa jlitacao lrikjoite njite tiyee kerrádalri imotowa lrinoma lrico niini kerraca njaji tiyeemjeni. ¹⁰ Lrimjeco njaji eenocoma niini cadaocádalri iwacaacawa jlipa iapjipe. ¹¹ Lriarrawa pada querobin nacó njite nacapani caolri inapje ricó. ¹² Njite Lriyofieta lridanawa iyadaoca cadaoca-dalri sho lriwaipoco nacó iiya jiwá-carro eenolrikjoite. ¹³ Eeno iperronialre sho imotowa lrioya jliaji waMinalri, njite tiyeemjeni kerraperri njaji jiwalriwa njiteo. ¹⁴ Jliaji wa-Minalri, jliaji Yenonrse-dalri pjaa pjiomi ioya lriwanaca eeno lrikjoite niini njemicani kjema capisho eeno colro-colroda cádanaco. ¹⁵ Lricadaa macáda napocotacawa njaji njopondape ima lriyawitacana eeno sho eeno lrikjoite. ¹⁶ Njite Lripjiá cádanaco jliaji no-Diote; pacapa ooni itjewacaca lrico, pacapa tsakja jalredaoca irrocawa nacó nafió capoa njemicani Lriema capoa nakjoete. ¹⁷ ¡Lripiajleta lricaapi norso eeno lrikjoite jlipá-carro njoa lricaapi sho! Njite lriyomjetaca njoa ooni imaimaca ioya. ¹⁸ Lriyomjetaca njoa naoya njaji nocoema kjaidaperri, njaji maatsí perri icapaca norso njite aimadan pjacana nooya. ¹⁹ Náno nokjoete aima cádanaco norsoca jirrapitakjeti, mitsa NOMINALRI ikitsindataca njoa. ²⁰ Lridee njoa corricawetsa pacapa njaji nocoema. Lriyomjeta njoa lripeyo capoa njoa. ²¹ No-Minalri iyomjeta njoa naikjaote njaji matsiaperri nonaitjalri ima njoepaca njaji lrinalri nonaitjaca. ²² Nomatsieta nonacoa pjiomi njaji No-Minalri inaalri nonaitjaca njite corrin nonaitjaca maatsi njoena carrontja no-Diote ioya. ²³ Nowaada norsowao lriaco caidalritsa, pjiomi tjakja njaji coancarro lrioma noofacawa njite corrin nomacaca nooyaona. ²⁴ Corrin tsakja nonaitjaca nomatsicanao Lripeyajle, niini lrimatsietaca njoa maatsídalri ioya. ²⁵ Naikjaote njaji matsiaperri nonaitjalri, Jliaji no-Minalri imatsieta njoa Lriinaiwa, catima Lricapaca njoa corri capoa norso nomatsicanaa. ²⁶ Pjia Dio,corrin Pimaca-ca jliaji corridalritsa imaca-ca Pjia. Corrin Pimenataca jliaji corridalritsa imenata Pjia, niini Pjiwacatsa icapa matsiá catsani.. ²⁷ Picadaa lricapa ajádalrica Pjia lrirso jliaji yajírri ajádalrica pjia, mitsa maatsídalrica Pjia lriapiya jliaji maatsídalritsa iwaopiakje. ²⁸ Piyomjetaca njaji corri-perrigtsa padalrena, mitsa pimainietaca naicawa njaji njaji padalre-perrimi. ²⁹ 29NOMINALRI, Pjiatsa jliaji nocamarrana. Nocamarranaca Pjia, NOMINALRI, cadaocawerrico. ³⁰ Pjia capoatsa noinai no-Diote notaita njoecocawa nanaco njaji idanatacape njoa; no-Diote ikjaote notaita nowatsiacawa panti iwai nacó. ³¹ Corritsa coca nocaiteca no-Diote nacó, ima corrin pacapa maatsidalri lriapowa lricó. Corrin pacapa maatsidalri no-Minalri iaco lrico. Dio idanataca pjiomi njaji icadaacaperri icaolre Lrinaco. ³² Apadatsa Dio-ca jliaji wa-Minalri. Jiipada taimídalri-ca jliaji wa-Diote. ³³ Dio-ca jliaji nofalri irricoda njite njaji mamatsicanaaperri wa-Minalritsa iwapacana njite lriyamita naoya pjiomi njaji iomacape inaitjaca narso maatsi. ³⁴ Jliatsa icadaa kjaidá-carro njoecocawa neerri sho lricadaa-carro njoa jiipana yenondalri nacó. ³⁵ Jliatsa iyekjetaca njaji nocaapi oowi ipia cayo tsakja njaji nonaapa notaitá-carro notioca-ca yawitjiapoti bronceapo. ³⁶ Pjiatsa icadaa nodanawa yomjé-carro njoa piinaiwa, njite Pimatsiaca inaitja norso matsia. ³⁷ Pinaitja macaite nopjoa carroda nacó wadentja nopjoaca pajlaimi noapiyao. ³⁸ Nopoineta njaji nocoema atee kjerreca noino pjiomina. Corrin nodiacao njoapodamrsewa atee nowayaketa cayami pjiomina. ³⁹ Nowayaketa matsiapena cayoji apana maaficalri awacada lricoda iñjaca lriwini. Corrinatsa nataita neemacawa ima njoaca yaají nanaco njoama capoana. ⁴⁰ Pjiatsa icadaa njoidawa cayoji cintoron papapionda panacoa paacadanacoa oowi ricó; Picadaa njoá-carro yají nanaco njaji jinicolri nokjoete. ⁴¹ Pjiatsa icadaa njeecoca nopjeya njaji nocoema; caicarro picadaaca njoamaca pjiomi njaji maatsiperri icapaca norso. ⁴² Nawana tja ikitsindatacaopena, mitsa corrim coca yaa iyomjetana; nawana tja Dio ikjaolre, mitsa corrim jliepana. ⁴³ Nowititana matsia cayoji jiipai iorsoacapewa papjoacawa inaco, nocadaana caalri italripe sho inipo lricope. ⁴⁴ Piyomjeta njoa naoya njaji nonaikite aimada njenico caojli pia nokjoete. Pjiatsa icadaa njoa-carro njewidaapo njaji apaanatsa inaiki pada jiipai nacoperri, njaji corriperri pia noajíi, opina noajina njite norsoperricana. ⁴⁵ Njaji apanatsa inaiki nacoajacawa nopeyajle. Njemi cádanacotsa nonaco, icaamitsa njeepaca pjiomi njaji nocaiterri narso. ⁴⁶ Natetje cayawa nanoca noderse njaji nocoema namoto cádanacoa nadawaacalri njitewa. ⁴⁷ ¡Caafidalricatsa jliaji wa-Minalri! Ia matsiadalri lrirso jliaji idanatacaita njoa. Jirreta yenonrse no-Diote iipitana, jliaji jiipada iyomjetacada njoa. ⁴⁸ Icatsa jliaji no-Diote iomacada nocoadawa, jliaji icadaacada njoá-carro iajíi nanaco njaji apaana inaiki. ⁴⁹ Lriyomjetaca njoa naoya njaji njopondape. Ajádalrica, Pjiaca jliaji jirretalri njoa naoya njaji yemalri nokjoete. Piyomjeta njoa naoya njaji inaiki maatsiperri. ⁵⁰ Naikjaote njaji, noa matsiadalri Pirso Pjia, no-Minalri napecolrico njaji inaiki aimadan jalredaoca lricoperri; nocanta watsa Piipitana matsiadalri ikjaote. ⁵¹ Dio icada jiametakjeti lrirso jliaji talricanaati lriniwananda njite corrin lrimacoadataca lriacoam Lrinaitjanda lriniwananda iapiya, David njite pjiomi njaji lrinakjoité perri caidalriwetsa.''