¹ Niini pia maawitacai David jiawajli pia madalriwalria oonia lrinacowaaca, niini David ioma Dio lricaolre lrikjoite. Njite Dio iaco David irso: ''Saul ikjaote njite lrikitsiñape iinocaperri inaiki jliaji maawitacai pinaco, lriino capoa njaji gabaonitanai.'' ² Njaji gabaonitanai corrin nanakjoite perrica njaji Iraelnai; nanakjoite perricana njaji amorreonai iofacapewa iraelnai iinaitsa. Njaji inaiki aimadan Iraelitanai nacaite pia iacoti ajádalri sho corricaotsa nainó carroca njaji gabaonitanai, mitsa Saul ioma piatja iinocana naikjaote njaji Iraelnai njite njaji Judánai. ³ Niini David iwakeeta pjiomi njaji gabaonitanai, lriaco narso: ''¿Cocantja nonaitja ikjaote? ¿Coajintja nomatsietaca jliaji matsídalri Iraelnai inaitjalri irso, itaitá-carro caacoca shaa matsia nanaco njaji Dio inaikite aimadan? ⁴ Niini naaco lrirso njaji gabaonitanai: ''Corrin pacapa aima owirro o palraata cadaa Saul o njaji lrikitsiñape nacaoña shopa jliaji maatsirri lrinaitjalri warso. Mitsa corrin wataita wainoca pada inaiki Irael lrico.'' Niini David iaco: ''¿Coajintja nonaitjaca ikjaote?'' ⁵ Njite njeepaca talricanaati njaji gabaonitanai, cayoji: ''Saúl inaitja pia lriwaopiakjeo wakjoete lriinó-carro pjiomi fáa yofacape pia Irael lrico. ⁶ Panaya picadaa warso siete-dee nanakjoite njaji Dio iniwananda Saul yeenipenai wapapí carroatsa nerroa waMinalri ipjeyajle jii´pana Guibeá lrico aul iyadami. Njiyte David icaite narso: ''Matsiatsa. Nocadeniotsa irsona.'' ⁷ Mitsa corrim talricanaati ioma iinoca Mefiboset, Jonatan irri, Saul irri, ima David njite Jonatan nanaitja pia yaacoti naapiyawaca. ⁸ Mitsa jliaji talricanaati lripa njaji yamadade Rizpa yeenipe, Aja iito, njaji Saul yeenipe rorso. Armoni jliaji pada njite Mefiboset jliaji pada; Jlipa tsakja njaji cincodee Mical yeenipe, Saul iito, Adriel iino, Barzilai irri meholatita. ⁹ Icatsa njaji lricadaalrica narso njaji gabaonitanai. Njite napapi nerroa jiipana nacó wa-Minalri ipeyajle, mayami pjiomi njaji siete-dee pacoaca. Nainona nainita cadaa naniwaca napania cebada. ¹⁰ Njite rsoaji Rizpa, Aja iito rsopa tsaacowanape njite rsowaacatsa ia ipeecona nanaco njaji mayamperrim idaki jiipana nacó atsaji nainita cadaa naniwaca napania nakjoite atee akjerreca iiya jiwaca nanaco. Rowapana waayolri ioyana jaalrewerricó njite naoya njaji maaficalri awacada lricope deepi ricó. ¹¹ Njite nacaite David jimi coanca Rizpa, Aja iito, Saúl irsodarrom inaitjaca. ¹² Niini David iáa iniwa Saul njite lrirri Jonatan yaapipemi naoya njaji atsianai Jabes Galaad lricoda, njaji iñaitolri pia yacalrecoa lrikjoite Bet Sán lricoda, filisteonai icadaacawa pia nerroa naino cayamina Gilboa lrico. ¹³ Icatsa David ideeca njaji Saul iapipemi njite lrirri Jonatan iapipemi njiteo, njite nawakeeta tsakja naapipemi njaji sietedee atsianai napapirri pia irroa ¹⁴ Nadawa Saul njite Jonatan iapipemi Benjamín poco jipaite ricó, zela lricó. Saul jinirri Cis iirrirriapjirre lricotsa. Nanaitjatsa pjiomi cayo talricanaati inaa capisho nanaitjaca. Njite dekjena Dio jimi narso natatja cádanaco Lriinai njepaite nacó. ¹⁵ Njaji filisteonai nanaitja tsenakja oowi Iraelnai ikjoete. David iawa naikjaolre naapiya njaji lri-tsolrodaonai aimadan nainoacá-carro filisteonai ikjoete. Mitsa maapjica David oowicalri ikjaote. ¹⁶ Njite Isbi Benob, pada nanakjoite-dalrica njaji inaiki macanipe, irsocada lrimolroconi walrite toa nanaitjanda broncepe sho, irsocada tre kilo jlimiñaca; lrirso pja paita matseeta walriite toa lrinacoa, yoomje lriinoca David. ¹⁷ Mitsa Abisai, Sarvia irri imanacotan lrioyani. Abisai inoaca lrikjoete jliaji filisteo njite lriinoni. Njite njaji David inaikite naaco lrirso iacoti ajádalri sho: ''Corrinatsa pia-carrocaotsa wainai oowi ricó wadentja yalrimica Irael icamarrana.'' ¹⁸ Nainoaca cayamiwa, napieta tsenakja nanaitjaca oowi filisteonai ikjoete Gob lrico, icatsa Sibecai husatita-tairri iinoca Asaf, pada Refaim inakjoite-dalri. ¹⁹ Napieta cádanaco nanaitjaca oowi nakjoete njaji filisteonai Gob lrico, Elhanán, Jaare Oregim irri beblemita-tairri, lriinoca Goliat geteo tairri, irsocada imolrocon icawaapji mmacaapo. ²⁰ Napieta tsenakja nanaitjaca oowi Gat lrico, nini pia pada atsia macani, lrirso pia sei lricapjiwida lricaapi naco yameemape, njite caitsakja njaji jlipjewida, venticuatro padenirri. Rafaim inakjoite-dalri pia tsakjani. ²¹ Lricaaji piaca naicao njaji Iraelnai, njite Simei irri Jonatan, David ipjerri irri iinoni. ²² Icapiatsa njaji Rafaim, Gat lricoda inakjoite-perrica. David inona njite njaji lritsolrodaonai.