¹ Nacaite njemi Joab irso talricanaati iiya catsa njite jlietaacawa iitadalri sho lritsayani Abasalón ikjaote. ² Niini jliaji shamakjeti nacoema nacó jliadaa-dalri lripadama narso njaji tsolrodaonai aimadan iinonacalri ricó, ima njemica jliadaa iinonaaca jliaji talricanaati niini jlietaca iitaperri lritsayani lrirri ikjaote. ³ Njaji tsolrodaonai aimadan njeewao yacaalre rico maacotsa jliadaa jeecoapi, cayoji capaiman capiyo njaji inaiki aimadan njeeco capisho nacoema ioya napitó-carro. ⁴ Jliaji talricanaati lriita lriecoa njite lriwanaca kjaida: ''¡Noenipe Absalón, Absalón noenipe, noenipe!'' ⁵ Ikena Joab jiewawa David iofalri nirse, lriaco lrirso: ''Opoica dekja pipaimanieta matsiape njaji pitsolrodaonai, njaji imanacotalri pjia mayamicalri ioya, pjiomi pienipe, piitonaipe, pininaipe njite njaji pininaipe pirsoperri. ⁶ Ima pipeyoca njaji maatsiperri icapaca pjia, njite pjipondataca njaji ipeyocape pjia. Njite oopica picadaa nacapa njaji comandantenai njite njaji tsolrodaonai corricatsa cocaca pirso. Ima nowaada caafi cadatsantja Absalón njite mayamintja pjiomi faa catiimantja pjia. ⁷ Niini panaya, warsa pimoto naikjaolre njaji tsolrodaonai aimadan, caaco pjia narso yacoti matsiadalri sho. Ajádalri-sho nocaiteca pjia Wa-Minalri nacó corri cadaa pimoto naikjaolre corriotsa padao tsolrodao iofacaotsa piinai jliadaa deepica jliaji. Njite corritsa matsiaca pirso cayo cadaa ima pjirrapitacantja pjiomi njaji pjirrapitalri piyempetica nakjoite atee panajiete.'' ⁸ Niini talricanaati jinico iofawa yacaalre ipananoma lrico, njite nacaite njemi njaji tsolrodaonai talricanaati jinicoca yofawa yacaalre ipananoma lrico. Njite nánoca pjiomi njaji inaiki aimadan talricanaati ipeyajle. Mitsa njaji Iraelnai napitowa naapana lricojle. ⁹ Caacopena njaji inaiki aimadan narsowaaca, pjiomi njaji Irael poco, naaco: ''Jliaji talricanaati David iyomjetaca faa naoya njaji wacoema. Lriyomjeta faa naoya njaji filisteonai, mitsa panaya oopi lripito Absalón ipjeya fepaite ioya. ¹⁰ Njite nakja jliaji waniwananda watalricanao, Absalón, oopi mayamini oowi rico. Niini, ¿Coada caacope faa waoma carrontja lridiacawa waikjaolre jliaji talricanaati?'' ¹¹ Jliaji talricanaati imeenaca njaji sacerdotenai Sadoc njite Abiatar, lriaco narso: ''Icaiteotsa narso njaji pekipenai Judá lricope cayoji: Shaantja inita inaitjaca matsia talricanaati irso idietá-carroni talricanaati dapana lricojle, wade njaa kenakja caaco iinita nadietá-carro jliaji talricanaati talricanaati dapana lricojle njaji Iraelnai. ¹² Ima nokitsiñape-ca shaa, noirrana inakjoité-perri. Niini corritsa matsiaca njaa cadaa yaají ioya njaji Iraelnai nadietá-carro jliaji talricanaati talricanaati dapana lricojle. ¹³ Icaiteotsa Amasa irso cayoji: ''¿Capja corrica nokitsinda, nonakjoite-dalrica pjia?'' Cotsa coadaca norso Dio iino cadaa njoa nocadaa capoantja pjiá-carro yaajíi nanaco njajitsolrodaoni aimadan noyarrope Joab iarromtacao.'' ¹⁴ Njite matsia nacapaca lrirso njaji Judánai niini nawacaacawa papoco tsenakjana, njite nameenaca iacoti talricanaati irso cayoji: ''Pidienawa, pjia njite pjiomi njaji piinaiperri.'' ¹⁵ Ikena Talricanaati idiawa, lriocawa Jordán nacojle njite njaji tsolrodaonai Judá lricope náno Gilgal lricojle nacoadata jliaji talricanaati naawapá-carroni Jordán pemajle. ¹⁶ Njite Simei, Gera irri, nanakjoite njaji Benjamín poco, Bahurim lricoda, lrikjeyapita lriacawa nainai njaji atsianai Judá poco nakjoitepe yaacapewa talricanaati David ikjoete. ¹⁷ Ninipia mil atsianai lrinaiperri, Saul irsodalri Siba iaa tsakja nainai, quince lrienipe njite vente lrirsoperri lriinai. Nayoeta jliaji ooni Jordán talricanaati ikjaolre. ¹⁸ Nayoetawa nadietá-carro talricanaati iipaneta, talricanaati icapá-carro corrica inaiki maatsidalricani. Niini jliaji Gera irri Simei, lriyamjawa talricanaati ikjaolre lripjeyenatsa nayoetaca jliaji ooni Jordán. ¹⁹ Simei iaco talricanaati irso: ''Corrin nooma piwaopia inaiki maatsidalrica njoa, pjia no-minalri talricanaati, wadee piwaopiaca njaji nocaiterri, nonaitjalri pirso pimoto caojli pia Jerosalén lrikjoite. Macadatsa lriofawa lricaolre ricó. ²⁰ Ima jliaji pirsodalri yaajíi camatsicanaacani pikjoete. Niini nonoca piderse napjeya njaji José ikitsiñape nocoadatá-carro pjia, pjia no-minalri talricanaati.'' ²¹ Mitsa Abisai, Sarvia irri, iaco jliepacani: ''Warsotsa wainoca Simei ima caacoca maatsi lrinaco jliaji wa-Minalri iniwananda.'' ²² Niini David iaco lrirso: ''Cotsa coca norsolri iinai, shaa Sarvia yenipe, shaa carrontja nocoema panaya. Corriotsa coca mayami Irael lrico panaya. Ima njoa catoa talricanaati Irael nacó panaya.'' ²³ Niini talricanaati iaco Simei irso: ''Corriotsa mayamí-carroca pjia.'' Cayotsa talricanaati icaiteca lrirso pada yaacoti ajádalri sho lrirso. ²⁴ Njite Mefiboset, Saul irri, iorrocoa lricoadatá-carro talricanaati iinai. Corrin jlieta lritsapatoniwa, corrin tjakja jlirrita lritsinoma, corrin tsakja lri cotsoca lritsayani talricanaati yaa cayami Jerosalén lrikjoite atee akjereca lridia lriocawa lriipana lricojle lrimaodacatsa. ²⁵ Niini lria cádanaco Jerosalén lrikjoite lricapá-carro jliaji talricanaati, talricanaati iaco lrirso: ''¿Coada corrin pino pia noinai, Mefiboset?'' ²⁶ Njite Mefiboset jiepani: ''Pjia no-minalri talricanaati, norsodalri icashataca njoa; niini noaco cayoji: ''Nomatsieta toa nofacarroita noborron nacó noá-carro no-talricanaa iinai ima patsimdalrica lridaki jliaji pirsodalri. ²⁷ Jliaji norsodalri Siba caaco maatsi nonaco lrirso jliaji no-minalri talricanaati. Mitsa jliaji no-minalri talricanaati, cayocani pada Dio iangele shocani. Niini pinaitjena njaji matsialri pjaa pinaitjaca. ²⁸ Ima pjiomi njaji njonirri iipaneta mayamperrim sho-cana no-minalri talricanaati ipeyajle, mitsa pjia, picadaa jliaji pirsodalri lriofá-carro picodapi lriñjá-carro piinai pimesan nacó. Niini corritsa coca notaita pjaaca notatjaca notalricanaa iinai.'' ²⁹ Njite jliaji talricanaati iaco lrirso: ''Ajena wawadaca njaji jiyapalrio. Panaya nocaiteca, jipá-carro pamoyoape njaji jipaite Siba iapiya.'' ³⁰ 30Niini Mefiboset jiepa jliaji talricanaati, lriaco lrirso: ''Ajádalri, picadena jlipá-carro lrirsowao pjiomi ima matsiena norso lridia capoa matsiatsawa lriipana lricojle jliaji no-minalri talricanaati.'' ³¹ Njite Barzilai, galadita-tairri, lriorrocowa Rogelim lrikjoite lriyoetá-carro talricanaati iinai jliaji ooni Jordán, njite lrikitsindajica nayoeta cádanaco ooni Jordán. ³² Njite Barzilai pekirrinatsan, irsocada ochenta cinco oonia lripekirrica naco. Lria pia talricanaati ijaope lrimaa cadanaco pia Mahanaim lrico, ima canaanidalrica jliaji Barzilai. ³³ Talricanaati iaco Barzilai irso. ''Pino noinai, noa watsa pirso pjiomi canacaiperri pirso piofáa-carro noinai Jerosalén lrico.'' ³⁴ Mitsa Barzilai iaco talricanaati irso: ''Corrinatsa nofaa carroca wiá jalredaoca lrico, niini mikjapanitsantja noaca nofaa piinai Jerosalén lrico. ³⁵ Norsoca ochenta oonia. Corrinatsa notaita noajica cocaca jliaji matsiadalri o maatsidalri. Corrinatsa pirsodalri yaajíi lrijaoda o lrirraoda ijoica. Corrinatsa njomica matsia nacantanialre njaji atsianai o inaitjepe cada. Niini mikjapanitsantja pirsodalri iaca iofaa piinai lrimá carrotsantja picapaca. ³⁶ Icaamitsa pirsodalri ioma talricanaati ikitsindajica wayoeta cadanco jliaji Jordán. Njite ¿Coadantja aima calretsa talricanaati ioma icaoñaca njoa? ³⁷ Pinaitja matsiacalri picadaa pirsodalri idia carroa lriipana lricojle, nirse carrotsa mayamini, nadawá-carro njoa njonirri, njodoa icodapitsa. Mitsa alriji pirsodalri Quimam. Pivcadaa lriá-carro piinai njite pinaitja lriapiya njaji piomalri pinaitjaca.'' ³⁸ Niini lriaco jliaji talricanaati: ''Quimam watsa yaa noiani njite nonaitjaotsa lrirso njaji piomalri nonaitjaca lriso.'' ³⁹ Ikena nayoetacawa pjiomi njaji inaiki aimadan, njite talricanaati iyoetawa tsakja. Talricanaati itsotso lricacoda naco njite lricadaa yacoti matsiaperri lrinaco. Ikena Barzilai idiacawa lriipana lricojle. ⁴⁰ talricanaati iyoetawa Gilgal nacojlema njite Quimam tsakja iawa lriinai. Pjiomi njaji Judá itsolrodaonaipe aimadan nadeeca jliaji talricanaati njite pamoyoa nanakjoite njaji tsolrodaonai aimadan Irael lricope. ⁴¹ Ikena nánoca talricanaati iderse njaji inaiki Iraelnai, naaco lrirso: ''¿Coada njaji wakitsiñape Judá lricope naapiya njaji natsolrodaonai naaca nayoeta jliaji talricanaati njite njaji lriipaneta jliaji Jordán nja capisho yajíi talricanaati nacó?'' ⁴² Niini njeepacana njaji Judanai, naaco narso: ''¿Coada maatsi icapaca jliaji wanaitjalri? Wanaitja cayo ima wakitsinda, wanakjoite-dalrica jliaji talricanaati. Cotsa coca njaji wainjalri talricanaati naco. Corrin tsakja coca naalri warso lrikjaote jliaji wanaitjalri. ⁴³ Njite njeepaca njaji Iraelnai: Aima perrica pjaaca faa ioya niini faa pjaaca iajíi David nacó ioya. Niini ¿Coada imenataca faa? Faa pjaaca jliaji iomalri talricanaati idiacawa waikjaolre. Mitsa kjaida pjaaca caacoca njaji Judánai naoya njaji Iraelnai.