¹ David iniweta njaji tsolrodaonai lrinaiperri niini lricadaaca capitamanai nanaco irsocape mil nanaikite njite Cien tsakja. ² Njite David imeenaca, pamoyoa ipamoyoaca naco Joab iinai, njite njaji paana pamoyoa ipamoyoaca naco lrimeenaca Sarvia iinai, Joab iwerri, njaji paana pamoyoa ipamoyoaca naco lrimeenaca Itai iinai, jliaji geteo-tairri. Njite David iaco narso njaji tsolrodaonai aimadan: ''Ajaca, noá tsakjaotsa iinai.'' ³ Mitsa njaji tsolrodaonai naaco lrirso: ''Cotsa matsiaca pinoca wainai oowi ricojle. Ima wapito cadaa naoya corriotsa coadaca narso, o naino cadaa pamoyoa wanakjoite corri tsakjaotsa coadaca narso. Ima pjiaca jliaji naomalri nainoca, corritsa coadaca narso naino cadaa die mil atsianai wanakjoite. Matsiapja acatsa piofa piwapa faa yacaalre ricotsa, njité-carro catsaotsa pikitsindata faa. ⁴ Niini talricanaati sheepana: ''Nonaitja pedaa cayoji icaite capisho.'' Atsa talricanaati ioca yemawa yacaalre ipananoma lrico naa-cadanawa njaji tsolrodaonai aimadan ciem-pe njite mil-pe tsakja. ⁵ Talricanaati iaco Joab irso, Abisai, njite Itai irso cayoji: ''Manaitja tsaotsa maatsi lrirso jliaji yempeti Absalón nokjaote.'' Njite pjiomi njaji inaiki aimadan njemi jliaji talricanaati icaiterri absalón nacó. ⁶ Njaji tsolrodaonai aimadan David iyaape namotowa nakjoete njaji Iraelnai Absalón inaiperri; teeco lriocawa nanaitjaca oowi na-awacadate nacojle njaji Efraín poco. ⁷ Njaji Absalón inaiperri corrin nataita nakjoete njaji David inaikite; aima mayamica inaiki jliadaa, naino venete mil tsolrodaonai niini. ⁸ Macada nainoaca-cawa awacada lricojle niini aima pjaaca njaji awacada iinoji naoya njaji David inaikite iinolri namatsetan sho. ⁹ Njite Absalón ioketaaca cadanacoa naapiya njaji David itsolrodaonai, Absalón ioma piatja ipítocawa, niini jlirracawa lricaballon naco, mitsa jliaji caballo jiecowa lriapiya apana jaico roblena cakine yapjite niini Absalón jiwida ipaacawa lriki naco. Corrin coaji lriorroco-cawa corrin tsakja coaji jlirra-cawa, njite jliaji lricaballoni oopi jlieco lrioya. ¹⁰ Pada icapa akjerreca Absalón irroa niini lricaiteca Joab irso, lriaco: ''¿Nocapa akjerreca Absalón irroa apana jaico cakine roblena naco.'' ¹¹ Niini Joab iaco lrirso jliaji atsia icapacada Absalón: ''¡Akjerre picapani! ¿'Coada corrin piinoni jliwa-carro jiipai nacojle? Piino cadantja piani, noa piantja pirso die mil moneda palrataitape njite pakja cintoron caconaacarro pjia narso. ¹² Mitsa jliaji atsia iaco Joab irso: ''Pia cadantja norso die mil moneda palrataitape, cotsa noinó-carro cantja lrirri jliaji talricanaati, ima femica matsia coanca lricaiteca jliaji talricanaati pirso, Itai irso njite Abisai irso Absalón nacó: ''Corriotsa coca itaita inotaca jliaji yempetitoa Absalón.'' ¹³ Ima noino cada piantjani, njite talricanaati jlimi njoaca iinoni, pjitsantja iino njoa. ¹⁴ Njite Joab iaco lrirso: ''Mikjapantsa caacoca njoa piapiya.'' Joab jipa madalriapo molroco shoperri njite lritoda Absalón icaolre icoa jliaji irrocadawa jaico roble naco. ¹⁵ Njaji die atsianai idejicape Joab inoacashopawa neema lriwaipoco naco, nainoni atee mayamica Absalón. ¹⁶ Ikena Joab ipjiaca trompeta njite njaji tsolrodaonai nadia, yaamica napineetaca njaji Iraelitanai. Joab imananitaca njaji tsolrodaonai aimadan. ¹⁷ Njepa nadawa Absalón idadam irrirri lrico awacada lricotsa; napeeco jiipada lriicao nadawá carroni. Cayo cadana njaji Iraelnai napitowa nacoamitsa naapana lricojle. ¹⁸ Caafi cádanaco piatoa Absalón, lrinaitja pia lrirsowawa lriwaketanda sho jiipada pacoacacawa lrico jiipai talricanati-dalri iipitana, ima lriaco cayoji: ''Meenipe-dalritsa njoa jliá carrontja iwaada noipitana.'' Niini lricadaaca lripitanawa jliaji lriwaketanda jiipada lriipitana shotsa atee panashete toa. ''Jiipada nawaketanda Absalón iyada.'' ¹⁹ Njite Ahimaas, Sadoc irri iaco: ''Picadaa noacarro nocaite lrirso jliaji talricanaati jliaji iacoti matsiadalri coajica wa-Minalri iyomjetani lricoema ioya. ²⁰ Mitsa Joab iaco lrirso: ''Maatsa picaite toa lrinaco panaya; papienakjaotsa picaite lrinaco. Corrin pitaita picaiteca lrinaco jliaji iacoti panaya ima mayamica jliaji talricanaati yenipe. ²¹ Joab icaite lrirso jliaji cusita-tairri: ''Pia picaite lrirso jliaji talricanaati lrinaco jliaji picapalri.'' Jliaji cusita-tairri lricoaja Joab ikjaolre, ikena jliecocawa. ²² Mitsa ahimaas iaco tsenakja Joab irso: ''Coancadaotsa njoyapacawa lrikjaote, pinaitja matsiacalri picadaa noawa cusita-tairri shaapodam.'' Njite Joab iaco lrirso: ''¿Yempeti, coadadao pioma piacawa, piaji cadaana corricaotsa cocá carroca lricoada jliaji pia capoa picaite jliaji iacoti?'' ²³ Njite Ahimaas iaco: ''Cotsa coadaca coancadaa njoyapacawa lrikjaote, mitsa noacawa.'' Niini Joab icadaa lriawa. Ahimaas iawa inipolrico malritsicoa lricoda njite lriá jliyapa cusita-tairri. ²⁴ David yofampe cadaanawa pantinoma ipamoyoaca lrico. Njite jliaji iwapacada icapa naicawa jlirrawa lripolrico nacojle jliaji yacaalre iwai niini lricapaca tekjoite toa, ape atsia jiecocawa naikjaolre jliwaacatsa. ²⁵ Jliaji iwapacada icapa naicao lricaite talricanaati irso. Niini jliaji talricanaati iaco lrirso: ''Pada cadatsa lrinoca niinica iacoti lricaiteoda.'' Njite jliaji shecocadawa lriocawa tsoomi yacaalre ioya. ²⁶ Mitsa jliaji iwapacada icapa naicawa lricapa niini pjaaca pada atsia sheeco cadawa tsakja njite lriaco lrirso jliaji iwapacada pantinoma; lriaco: ''Niini pja pada atsia sheecocadawa lriinai.'' Njite lriaco jliaji talricanaati: ''Lridee catsakja yaacoti lriinai.'' ²⁷ Njite jliaji iwapacada icapa naicawa lriaco: ''Ahimaas, Sadoc irri jiecocaa nocapaca jliecocawa jliaji wacoemjeterri.'' Njite talricanaati iaco: ''Pada atsia matsiadalrica jliarra njite lrideeca iacoti matsiadalri.'' ²⁸ Ahimaas iwanaketsa talricanaati, lriaco lrirso: ''¿Capja matsiatsa pjiomi?'' Ikena jliwaca talriccnaati ipeyajle, jiipai nacojle lriecoa, lriaco lrirso: ''Matsiadalrica jliaji pi-Minalri Dio, ima oopikena Lrimanacotaca pjia naoya njaji atsiani yemalri pikjoete, pjia no-minalri, talricanaati.'' ²⁹ Niini talricanaati sheepani, lriaco: ''¿Capja matsiatsa jliaji yempetitoa Absalón?'' Ahimaas iaco: ''Jliaji pirsodalri Joab, lrimeenaca cádanaco njoa ajerreji piderse, pjia talricanaati, nocapa njeta capisho nacaolre njaji inaiki, mitsa corrin nocapa coadaca. ³⁰ Njite talricanaati iaco lrirso: ''Pjinicoa, apino piemawaji.'' Ahimaas jinico yemawa njite lriemawa mananitsa lricodapi. ³¹ jliada naco cusita-tairri iocawa, lriaco: ''Nodeeca pirso iacoti matsiaperri,pjia talricanaati, ima jliaji wa-Minalri oopina lrioma picoadawa nainai njaji yemalriwa pikjoete.'' ³² Njite talricanaati iaco cusit-tarri irso: ''¿Capja matsiatsa jliaji yempetitoa Absalón?'' Njite cusita-tairri iaco lrirso: ''Cayoatsana Absalón sho pjiomi njaji jinicolriwa pikjoete nanaitjá-carro pirso maatsi.'' ³³ Ikeena iinonaca maatsinaa jliaji talricanaati, njite jlirrawa pacoma nacojle lrirso jliaji panti pantinoma iicaotsa. njite lriiya lriacayawa, lriaco: ''¡Nirri Absalón, nirri Absalón! ¡Njoamintja mayami pinacojle, nirri, nirri!''