16 ¹ Mi harim bikpela singaut i kam aut long tempel na i tokim ol 7-pela ensel, '' Yupela igo na kapsaitim 7-pela dis i gat belhat bilong God, antap long graun.'' ² Nambawan ensel igo na kapsatim dis bilong em antap long graun; na ol sua nogut tru, wantaim bikpela pain, i kam antap long ol manmeri husait igat mak bilong wel abus, em ol lain husait i lotu long piksa bilong em. ³ Na namba tu-ensel i kapsaitim dis bilong em igo insait long solwara. Na solwara i kamap blut, olsem blut bilong dai man, na olgeta samting igat laip istap insait long solwara i dai. ⁴ Na namba 3-ensel i kapsaitim dis bilong em igo insait long ol bikpela wara, na hul wara, na ol wara i kamap blut. ⁵ Mi harim ensel i lukautim wara i tok, ''Yu stretpela - yu stap nau na bipo. Yu tasol yu holi - na yu skelim dispela samting na givim pei long ol. ⁶ Ol i bin kapsaitim blut bilong ol bilip manmeri na ol profet, olsem na yu givim ol blut long dring; na i gutpela ol i mas dringim. ⁷ Mi harim wanpela maus long alta i mekim tok olsem,'' Yes, Bikpela God yu Strongpela, kot bilong yu em tru na stretpela olgeta.'' ⁸ Na namba 4 ensel i kapsaitim dis bilong em antap long san. Na san i kisim tok orait long kukim man wantaim bikpela hot bilong paia. ⁹ Na bikpela hot bilong paia i kukim ol nogut tru, na ol i tok bilas long nem bilong God, husait i gat strong antap long ol dispela hevi. Na ol i no tanim bel o givim biknem long em. ¹⁰  Na namba 5 ensel i kapsaitim dis bilong em antap long sia king bilong wel abus, na bikpela tudak i karamapim ples bilong em. Na ol i kaikaim tang bilong ol, long wanem ol i pilim bikpela pein. ¹¹  Ol i tok bilas long nem bilong God bilong heven long pein na ol sua ol i kisim. Na ol i no tanim bel long ol samting ol i mekim. ¹²  Namba 6 ensel i kapsaitim dis bilong em igo long bikpela wara Yupretis. Na wara i drai olgeta, long redim rot bilong ol king bilong san kamap bai kam. ¹³  Mi lukim 3-pela spirit nogut olsem frog i kam aut long maus bilong bikpela snek, na long welabus, na long giaman profet. ¹⁴  Em ol spirit nogut i save mekim ol kain kain mirakel. Ol i go aut long ol king bilong olgeta hap graun, long bungim ol wantaim long bikpela pait, we bai kamap long bikpela dei bilong Bikpela God, . ¹⁵  ''Lukim! Bai mi kam olsem stilman! Man husait i was gut, na putim klos bilong em i ken amamas. Em bai i no inap go aut skin nating, na ol i lukim sem bilong em." ¹⁶  Ol i bungim olgeta wantaim long wanpela ples, long tok Hibru, ol i kolim Amagedon. ¹⁷  Na namba 7-ensel i kapsaitim dis bilong em igo long win, na wanpela bikpela nois i kam aut long tempel na long sia king, na tok olsem, ''Em i pinis''. ¹⁸  Na ol lait bilong laitnin i sut igo kam, na ol bikpela nois i kamap, na klaut i pairap, na bikpela guria - kain guria ino bin kamap bipo long taim man i bin stap long graun i kam inap long nau. Dispela guria i bikpela tru. ¹⁹  Dispela biktaun i bruk long 3-pela hap, na ol biktaun bilong planti kantri long graun i pundaun. Na God i tingim Babilon, na i givim em wanpela kap wain long dring. Dispela wain em i belhat bilong God. ²⁰  Olgeta ailan i ranawe na ol maunten ino moa stap. ²¹  Na ol bikpela ais, hevi bilong en i olsem 50 kilo i pundaun long skai antap long ol manmeri. Ol manmeri ol i mekim tok nogut long God, long wanem dispela hevi i bikpela tru.