15 ¹ Na mi lukim narapela mak long Heven, em gutpela na narakain tru. Ol 7-pela ensel i holim 7- pela samting nogut tru, dispela em lastpela samting nogut tru na long dispela God i laik pinisim belhat bilong em. ² Na mi lukim samting olsem solwara ol i wokim long glas wantaim paia.Ol man i bin winim wel animal na i no kisim namba i makim nem bilong em, ol i sanap arere long solwara ol i wokim long glas. ol i holim ol gita samting God i givim ol. ³ Ol i wok long singim song bilong Moses, em wokman bilong God na song bilong pikinini sipsip, dispela song i olsem; God yu gat olgeta strong, pasin bilong yu em i tru olgeta, yu King bilong olgeta manmeri bilong graun. ⁴ Husait manmeri bai i no inap pret long yu, yu tasol i stap holi olsem na ol manmeri i mas pret long yu na litimapim nem bilong yu. Olgeta manmeri i mas kam long na lotu long yu, long wanem stretpela pasin bilong yu i kamap ples klia pinis. ⁵ Bihain long dispela ol samting mi lukim haus lotu i gat hait long haus sel i op long heven. ⁶ Ol 7-pela ensel i holim 7-pela samting nogut i kam aut long haus sel bilong God. Ol putim waitpela klinpela klos na let ol i wokim long gold. ⁷ Wanpela bilong ol 4-pela samting i gat laip i givim 7-pela dis gold i pulap long belhat bilong God i save stap oltaim oltaim i go long ol 7-pela ensel. ⁸ Haus bilong God i pulap wantaim smok long strong na pawa bilong God. Nogat wanpela man inap long go insait inap 7-pela belhat bilong God i pinis.