13 ¹ Bihain mi lukim wanpela wel abus i kam aut long solwara. Em i gat 10-pela kom na 7-pela het. Antap long 10-pela kom i gat 10-pela hat bilong king. Long wanwan het bilong dispela wel abus i gat ol tok bilas neim long en. ² Dispela wel abus mi bin lukim, em i wankain olsem wanpela bikpela pusi, lek bilong em i olsem bea na maus bilong em i olsem maus bilong laion. Dispela bikpela snek i givim strong, na sia king na bikpela namba bilong en i go long dispela wel abus long bosim. ³ Wanpela het bilong dispela wel abus i luk olsem ol i kilim em, tasol dispela bikpela sua bilong em i bin kamap orait gen. Ol manmeri bilong olgeta hap graun husait i bihainim em i lukim dispela na kirap nogut. ⁴ Na tu, ol manmeri i lotu long bikpela snek long wanem, em i givim namba bilong em i go long wel abus. Na ol i lotu tu long wel abus na ol i wok long tok olsem, "Husait i wankain olsem dispela wel abus na husait bai pait wantaim em?" ⁵ Dispela wel abus i gat maus i ken mekim toktok bilong hapim em yet na mekim ol tok bilas. Em i kisim tok orait long mekim dispela pasin wantaim namba em igat inap long 42 mun. ⁶ Olsem na wel abus i opim maus bilong em na mekim tok bilas long God, na long nem bilong en, na ples we God istap long en, na ol lain husait i stap long Heven tu. ⁷ Dispela wel abus i kisim tok orait long daunim ol, na kirapim pait wantaim ol bilip manmeri. Na tu, em i gat namba long bosim wanwan hauslain, na manmeri, na tokples na olgeta kantri bilong graun. ⁸ Long stat God i wokim heven na graun i kam inap long nau, husait manmeri nem bilong ol ino istap long Buk bilong Laif bilong Pikinini Sipsip husait ol i bin kilim, ol bai i lotu long dispela wel abus. ⁹ Sapos wanpela i gat yau, larim em i harim. ¹⁰  Sapos wanpela bai i go kalabus, em bai i go kalabus yet. Na sapos wanpela bai i dai long bainat, em bai dai long bainat yet. Na wanpela singaut igo long ol lain i stap isi na karim hevi wantaim pasin bilong bilip. ¹¹  Bihain mi lukim narapela wel abus i kam aut long graun. Em i gat tupela kom olsem bilong sipsip na i toktok olsem bikpela snek ¹²  Em i mekim wok wantaim olgeta namba bilong namba wan wel abus wantaim em. Na em i mekim olgeta manmeri long olgeta hap graun i lotu long nambawan wel abus bikpela sua bilong em inap long dai i bin orait gen. ¹³  Dispela wel abus i mekim planti bikpela mirakel. Na tu, em i mekim paia i lusim heven na kam daun long graun na ol manmeri i lukim. ¹⁴  Long olgeta mirakel em i kisim tok orait long mekim, em i paulim ol manmeri i bin stap long olgeta hap graun. Em i tokim ol long wokim wanpela piksa bilong wel abus na givim biknem igo long em husait i kisim bagarap long bainat inap long dai tasol i stap laip. ¹⁵  Em i kisim tok orait bilong givim win long piksa bilong wel abus olsem na dispela piksa bilong wel abus i ken toktok. Na em i kilim i dai olgeta manmeri husait i no lotu long piksa bilong dispela wel abus. ¹⁶  Em i mekim olgeta manmeri husait i gat biknem o nogat biknem, na ol man i gat kago o nogat kago, na ol manmeri istap kalabus o istap fri long kisim wanpela mak long han sut o long foret bilong ol. ¹⁷  Em i hat tru long ol manmeri long baim o salim ol samting inap ol i gat mak bilong dispela wel abus. Em i olsem, namba i makim nem bilong dispela wel abus. ¹⁸  Dispela em singaut i go bilong gutpela tingting. Sapos wanpela i gat klia tingting larim em i kamapim ples klia as bilong dispela namba bilong wel abus. Dispela em i namba bilong wanpela man na dispela namba em i 666.