12 ¹ Wanpela bikpela sain i kamap long heven: wanpela meri i bilas wantaim san, na mun i stap aninit long lek bilong em, na hat bilong king i gat 12-pela sta i stap antap long het bilong em. ² Dispela meri i gat bel na em i krai strong long pen bilong karim pikinini na em i singaut wantaim bikpela pen. ³ Orait narapela sain i kamap long heven; Lukim! Wanpela bikpela retpela snek, i gat 7-pela het na 10-pela kom na em i gat 7-pela hat bilong king i stap antap long ol het bilong em. ⁴ Na tel bilong em i brumim tri-hap bilong ol sta i stap long heven na tromoi ol i kam daun long graun. Dispela snek i sanap long pes bilong meri husait i laik karim pikinini na taim meri i karim pikinini bai snek i kaikai pikinini bilong dispela meri. ⁵ Na em i karim pikinini man, em wanpela pikinini boi husait bai bosim olgeta manmeri bilong graun wantaim ain stik. Pikinini bilong meri kwiktaim i lusim i go long God na stap long sia king bilong God. ⁶ Na meri i ranawe i go long ples wei i no gat man i stap. God i bin redim wanpela ples bilong dispe la meri bai em yet i lukautim meri inap 1,260-pela de. ⁷ Nau pait i kirap insait long heven. Maikel na ol ensel bilong em i pait wantaim snek. Na snek na ol ensel bilong em i pait bek wantaim ol. ⁸ Tasol snek i no gat strong long winim pait. Olsem na i no gat moa wanpela ples bilong em wantaim ol ensel bilong em i stap long heven. ⁹ Dispela bikpela snek- em snek i bin stap bipo tru ol kolim devol o Satan, husait i giamanim olgeta manmeri- em tromai na pundaun i kam daun long graun, na ol ensel bilong em tu i pundaun i kam daun wantaim em. ¹⁰  Orait, mi harim wanpela maus i singaut long heven: "Nau taim i kam pinis bilong God i kisim bek man, na strong, na kingdom bilong God na namba bilong Krais. Long wanem, man bilong sutim tok long ol brata bilong yumi i bin tromai na pundaun, em dispela man husait i sutim tok long God dei na nait. ¹¹  Ol i winim em long blut bilong Pikinini Sipsip na long strong bilong autim tok, long wanem ol i no laikim tumas laip bilong ol maski dai i bungim ol. ¹²  Olsem na amamas moa, yu heven na yupela ol lain i stap insait long em. Tasol sori tru long graun na solwara, long wanem devol i kam daun long yupela. Em i pulap wantaim bikpela belhat, long wanem em i save olsem em i gat liklik taim tasol. ¹³  Taim snek i luksave olsem em i bin kapsait na pundaun i kam daun long graun, em i bihainim meri husait i bin karim pikinini boi. ¹⁴  Tasol ol i givim dispela meri tupela bikpela wing bilong tarangau, bai em i flai i go long ples ol i redim bilong em long hap i no gat man i stap. Em long dispela ples God i lukautim em inap olsem 3 na hap yia- em i stap longwei tru long snek. ¹⁵  Na snek i trautim wara i kam aut long maus bilong em olsem bikpela wara, olsem na em i laik mekim bikpela taitwara bai karim meri i go. ¹⁶  Tasol graun i helpim meri. Graun i opim maus na dringim wara wei snek i trautim i kam aut long maus bilong em. ¹⁷  Orait snek i belhat nogut tru long meri na i go long kirapim pait wantaim ol tumbuna lain bilong meri, em ol lain husait i save bihainim ol lo bilong God na hoilm tok tru bilong Jisas. ¹⁸  Orait snek i sanap long nambis bilong solwara.