11 ¹ Ol i bin givim mi wanpela stik olsem, em i olsem wanpela stik bilong makim ol samting, na ol i tokim mi, "Kirap na makim tempel bilong God na alta, na ol lain husait i lotu insait long em. ² Tasol noken makim autsait long banis i raunim tempel bilong God, dispela hap ples ol i bin givim long ol arapela lain manmeri. Ol bai krungutim dispela biktaun i holi inap long 42 mun. ³ Bai mi givim namba long tupela witnes bilong mi long ol, na ol bai i werim klos bilong sori, na i kam mekim tok profet long God insait long 1,260 de." ⁴ Dispela tupela witnes em i tupela oliv diwai na tupela stik lam i bin sanap long pes bilong Bikpela bilong olgeta hap graun. ⁵ Sapos sampela lain i ting long bagarapim ol, paia i save kam aut long maus bilong ol na kukim ol birua bilong ol. Long dispela rot tupela i save bagarapim ol. ⁶ Dispela tupela witnes i gat namba long pasim skai long ren bai ino ken pundaun inap long taim ol i mekim tok profet long em. Ol i gat strong long tanim wara i kamap olsem blut na long bagarapim olgeta hap graun wantaim ol kain kain sik nogut long wonem taim ol i laikim long en. ⁷ Ol bai i mekim tok bilong ol pinis, wanpela wel abus i kam antap long hul i no gat as bilong en bai i kirapim pait wantaim ol. Na em bai i kilim ol na winim ol. ⁸ Bodi bilong ol bai i slip nambaut long rot bilong biktaun (ol i kolim dispela piksa olsem Sodom na Isip) long ples Bikpela bilong ol i bin dai long diwai kros. ⁹ Long 3-pela na hap de sampela bilong olgeta lain manmeri, na tok ples, na ol kantri bai i lukluk long bodi bilong ol. Tasol ol bai tambuim ol long putim bodi bilong ol long matmat. ¹⁰  Husait ol lain i stap long olgeta hap graun bai i amamas tru na givim presen igo ikam, bilong wanem dispela tupela profet i bin givim pen long ol manmeri bilong graun. ¹¹ Tasol bihain long 3-pela na hap de, wanpela win bilong laif i kam long God bai igo insait long ol na ol bai i sanap long lek bilong ol. Na bikpela pret bai i kisim ol lain husait i bin lukim ol. ¹²  Orait, bihain ol bai i harim wanpela bikpela singaut i kam long heven na i tokim ol olsem, "Kam antap long hia." Taim ol birua bilong ol i lukluk yet long ol i stap, ol bai i go antap long heven insait long wanpela klaut. ¹³  Long dispela aua, wanpela bikpela graun guria bai kamap, na wanpela ten hap bilong biktaun bai i pundaun. Dispela guria bai kilim 7,000 manmeri, na ol lain i stap yet bai i gat bikpela pret na ol bai givim biknem i go long God bilong heven. ¹⁴  Namba 2 taim bilong bikpela sori i go pinis. Lukim! Namba 3 taim bilong bikpela sori i kam hariap tru. ¹⁵  Bihain, namba 7 ensel i winim biugel bilong em, na planti singaut i kam long heven na i tok olsem, "Kingdom bilong graun i kamap pinis olsem kingdom bilong Kraist Bikpela bilong mipela. Em bai stap king oltaim oltaim." ¹⁶  Na 24 hetman i bin sindaun long sia king bilong ol wantaim God i brukim skru i go daun long pes bilong ol, na ol i lotu long God. ¹⁷   Ol i tok, "Mipela givim tok tenkyu i go long yu, Bikpela God I Gat Olgeta Strong, husait i bin stap bifo na nau tu, bilong wanem yu kisim pinis bikpela strong bilong yu na yu stap king. ¹⁸  Ol kantri i gat bikpela kros, tasol bikpela moa belhat bilong yu i kamap pinis. Taim bilong ol manmeri i dai pinis long sanap long kot i kam pinis, na taim bilong yu long givim presen long ol wokman bilong yu em ol profet, na ol manmeri i aninit long neim bilong yu na bilip long yu, na ol lain i nogat neim, na ol lain i gat nem wantaim. Taim bilong yu long bagarapim ol lain i bagarapim olgeta hap graun i kamap pinis." ¹⁹  Na bihain, tempel bilong God i stap long heven i op na bokis kontrak bilong em ol i ken lukim insait long tempel bilong em. Na i gat ol lait sut i go i kam long skai, na nois bilong klaut pairap na graun guria na bikpela ren ais i bin kamap.