49 ¹ Opim yau na harim, yupela ol manmeri na yupela husait i stap long dispela graun. ² Liklik na bikpela, man i gat kago na man i nogat kago olgeta. ³ Maus bilong mi bai i tokaut long gutpela tingting na bel bilong mi bai i luksave long ol gutpela tingting. ⁴ Mi bai putim yau kam klostu long harim ol tok piksa, mi bai kirapim ol tok piksa bilong mi wantaim gita. ⁵ Bilong wanem bai mi pretim ol taim nogut, sapos man nogut i banisim lek bilong mi? ⁶ Bilong wanem bai mi pret long ol man husait i save bilip long ol bikpela mani na biknem bilong ol na apim ol yet long planti gutpela samting ol igat? ⁷ Em i tru olsem nogat wanpela man i ken helpim brata bilong em o baim God long kisim bek em. ⁸ Long kisim bek laip bilong wanpela man, pei bilong em i antap tumas na nogat wanpela man bai bekim dispela dinau. ⁹ I nogat wanpela man bai i stap laip oltaim na bodi bilong em bai i no inap long stin. ¹⁰ Man i gat gutpela tingting bai i dai na ol longlong man na ol man i nogat save ol bai i dai na narapela lain bai kisim samting bilong ol. ¹¹ Hait tingting bilong ol i olsem, ol famili bilong ol bai i stap oltaim na ples we ol i stap long en long olgeta lain bilong ol, ol bai kolim nem bilong graun bilong ol bihhain long nem bilong ol yet. ¹² Tasol man i gat planti samting i no inap long stap laip. Em i wankain olsem ol wel animol i save dai. ¹³ Dispela pasin bilong ol em i nogut, na bihain long ol, ol man i tok orait long ol toktok bilong ol na lititmapim ol. ¹⁴ Ol i wankain olsem sipsip, ol i makim ol long go long ples Sheol na dai bai kamap olsem bosman bilong ol. Ol stretpela man bai bosim ol long mornin taim, na ol bai kaikai bodi bilong ol long ples Sheol na ol bai i nogat hap long stap. ¹⁵ Tasol God bai i kirapim mi bek gen, long ples bilong dai na em bai i kisim mi na litimapim mi. ¹⁶ Noken pret sapos wanpela man i gat planti samting na biknem bilong em i go antap tru. ¹⁷ Taim em i dai em i no inap kisim ol dispela samting i go, na biknem bilong em i no inap tru long go daun wantaim em. ¹⁸ Em i amamasim bel bilong em taim em i stap laip, na ol man i apim nem bilong yu taim yu stap laip, ¹⁹ em bai i go bek gen long ol lain bilong papa bilong em, na ol bai i no inap lukim lait gen. ²⁰ Wanpela man husait i gat planti samting tasol i no gat gutpela tingting em i wankain olsem wel animol i save dai na bagarap.