50 ¹ Bikpela God Yawe i bin tok olsem na singaut long graun long hap bilong san i kamap na long hap san i go daun. ² Long Saion, dispela naispela bilas em God Yawe i bin mekim em i lait. ³ God Yawe bilong mipela, i kam na em i no stap isi, nogat, paia i go pas long em na i olsem raun win na ren samting i raunim em. ⁴ Em i singaut i go antap long heven na i go long graun, long em i ken kotim ol manmeri bilong em. ⁵ "Bungim ol manmeri husat i holim tru tok bilong mi long bel bilong ol na husat ol i mekim kontrak wantaim mi long ol ofa ol i save mekim." ⁶ Ol samting antap long skai bai i tokaut long stretpela pasin bilong em, long God em yet em man bilong harim kot. ⁷ "Yupela ol manmeri bilong mi i mas putim yau na mi God, God bilong yupela bai i toktok. ⁸ Mi bai i no inap stretim yupela long ol ofa bilong yupela, long wanem, ol ofa bilong yupela paia i kukim pinis olgeta i stap wantaim mi. ⁹ Mi i no inap kisim bulmakau long haus bilong yu, o man meme long hap ol i bung i stap. ¹⁰ Long wanem olgeta wel abus long bikpela bus i bilong mi na tu ol bulmakau long tausen liklik maunten. ¹¹ Mi save long olgeta pisin bilong ol mauten na ol wel abus bilong hap graun ol i bilong mi tu. ¹² Sapos mi hangre, mi i no inap tokim yu, long wanem, dispela graun na olgeta samting i stap antap long em, i bilong mi. ¹³ Inap mi kaikai mit bilong ol bulmakau o dring blut bilong meme? ¹⁴ Givim ofa bilong tok tenkyu i go long God Yawe na mekim ol tok promis i go long Bikpela antap tru. ¹⁵ Singaut long mi long taim bilong hevi na mi bai helpim yu na bai yu litimapim mi." ¹⁶ Tasol long ol man nogut God Yawe i tok, "Yupela i mekim wanem long tok bilong mi, em yupela yet i mekim kontrak long maus bilong yupela, ¹⁷ long wanem na yupela i no laik harim tok bilong mi na tromoi tok bilong mi i go longwe? ¹⁸ Taim yupela i lukim wanpela stilman, yupela i wokbung wantaim em na yupela i stap insait wantaim ol dispela lain husat i save mekim pasin pamuk. ¹⁹ Yupela givim maus bilong yupela long ol toktok i no gutpela na tang bilong yupela i tok giaman. ²⁰ Yupela sindaun na tok baksait long brata bilong yupela na daunim nem bilong pikinini man bilong mama bilong yupela. ²¹ Yupela i mekim ol dispela samting tasol mi bin i stap isi na yupela ting mi wankain olsem yupela.Tasol mi bai stretim yupela na putim olgeta pasin bilong yupela i kamap ples klia. ²² Tingim gut pastaim, yupela husat i lus tingting long God Yawe, nogut bai mi brukim yupela i go liklik hap na bai nogat man inap helpim yupela! ²³ Man husat i givim ofa bilong tok tenkyu na litimapim nem bilong mi na long husat man i kamapim tingting hait long wokabaut long stretpela rot, mi bai soim em rot bilong God Yawe i save kisim bek man."