37 ¹ Tru tumas mi guria long ol dispela samting i kamap na bel bilong mi i kirap narapela kain. ² Yu, harim gut dispela nois bilong tanda i pairap olsem singaut bilong God. ³ Em i salim tanda i go aut long olgeta hap antap long skai na salim laitnin i go long olgeta hap bilong graun. ⁴ Taim laitnin i kamap, mipela i harim tanda i save pairap, em i pairap olsem bikpela singaut bilong God taim mipela i harim, singaut bilong em i kam olsem laitnin. ⁵ Nek bilong God i pairap nais tru, em i save mekim bikpela samting yumi i no inap long save. ⁶ Taim God i tok long sno, 'Pundaun long graun' na mekim wankain tok long rein, 'Bikpela rein i mas pundaun.' ⁷ Taim God i mekim bikpela rein i pundaun, em i save pasim ol man long wok bilong ol na olgeta man em i bin wokim, ol i ken lukim gutpela bilong em. ⁸ Na olgeta wel abus tu i save ranawe na i go hait long ples hait bilong ol. ⁹ Bikpla rein wantaim win i kam long hap saut na kol win i save kam long hap not. ¹⁰ Win i kam aut long maus bilong God, em i save kamapim ais na wara i save kamap strong olsem ain. ¹¹ Tru tumas, em i pulapim klaut wantaim wara na laitnin i save kam aut long klaut na i go long olgeta hap. ¹² Em i save mekim klaut i raun i go i kam na bai ol i ken bihainim toktok bilong em antap long graun. ¹³ Em mekim olgeta dispela i kamap, sampela taim bilong stretim mipela, sampela taim bilong givim wara long graun na sampla taim long strongnim tok promis bilong em. ¹⁴ Jop, yu mas stap isi na harim gut na tingim wanem bikpela samting God i bin wokim. ¹⁵ Yu save olsem wanem God i kamapim klaut na mekim laitnin i lait strong long em? ¹⁶ Yu luksave long wanem hap bilong skai God i save putim ol klaut, em ol gutpela wok bilong God wantaim olgeta gutpela save bilong em. ¹⁷ Taim win i kam long saut em i mekim ples i kol, olsem wanem na klos yu werim i pulap long tuhat, yu luksave long dispela tu? ¹⁸ Yu inap long surukim skai olsem God i mekim, skai i kamap strong olsem mira ol i wokim long ain? ¹⁹ Job, tokim mipela long wanem tok mipela bai tokim God, long wanem mipela i no gat gutpela tok na nogat klia tingting long tokim em. ²⁰ Inap wanpela man i tokim em olsem mi tingting long toktok wantaim em? Yu ting em i gutpela long man i kisim bagarap? Sapos mi tokim em, em bai bagarapim mi. ²¹ Ol man i no inap long lukluk stret long san taim san i sut long skai inap win i go pas na rausim klaut. ²² God bai kam aut long hap not wantaim glori bilong em na glori bilong em bai sut olsem san na mipela i no inap lukim. ²³ God i gat olgeta strong, mipela i no inap long painim em! Em i gat bikpela strong, em i save mekim gutpela pasin na ino save mekim pasin nogut long mipela. ²⁴ Olsem na olgeta man mas i stap ananit long em. Em i no save wari tumas long man husait i ting ol i save moa.