36 ¹ Elihu i toktok yet na i tok, ² "Tok orait long mi long toktok liklik taim moa na mi bai soim yu sampela samting bilong wanem mi gat liklik moa tok long mekim long banis bilong God. ³ Mi kisim save longpela taim pinis olsem na mi bai tokaut long stretpela pasin bilong man i mekim mi. ⁴ Tru tumas, toktok bilong mi i no giaman, sampela lain husait i gat bikpela save i stap wantaim yu. ⁵ Lukim, God i gat bikpela strong na i no lukluk daun long wanpela man, em i gat bikpela strong long save bilong em. ⁶ Em i no save lukautim laip bilong ol manmeri nogut , tasol em i save mekim gut long ol gutpela manmeri i stap long hevi. ⁷ Em i no save rausim ai bilong em long ol stretpela manmeri tasol em i save mekim ol i sindaun long sia king olsem ol king oltaim na em i hapim ol. ⁸ Sapos ol i putim sen o kalabusim ol long strongpela rop bilong hevi, ⁹ orait em i putim i kam ples klia ol wanem samting ol i bin mekim, ol pasin nogut na biknem bilong ol yet. ¹⁰ Em i opim yau bilong ol long harim skul tok na tok strong long ol i mas givim beksait long pasin nogut. ¹¹ Sapos ol i harim tok bilong em na lotuim em, ol bai i kamap gutpela man long laip bilong ol na bai ol i amamas olgeta taim. ¹² Olsem tasol, sapos ol i no harim tok, bainat bai i katim ol na ol bai i dai long wanem ol i nogat save. ¹³ Ol lain husait bel bilong ol i no gutpela, ol i save pulap wantaim belhat na ol i no save krai long ol man long helpim ol taim God i givim ol bikpela hevi. ¹⁴ Ol i dai taim ol i stap yangpela yet na laip bilong ol i bagarap namel long giaman lotu bilong pasin pamuk. ¹⁵ God i save helpim ol manmeri husait ol i no inap long helpim ol yet long ol bikpela hevi i kamap long ol, em i opim yau bilong ol long harim gut tok na daunim ol yet. ¹⁶ Tru, em i laik kisim yu i kam autsait long ol hevi na putim yu long gutpela hap we i no gat hatwok na bai stretim tebol bilong yu wantaim ol kaikai i pulap long gris. ¹⁷ Tasol yu pulap long pasin bilong kotim ol manmeri i mekim pasin nogut, bikpela kot na stretpela pasin i stap wantaim yu. ¹⁸ Noken larim belhat bilong yu i mekim yu long hatim bel bilong ol man o ol bikpela pe i mekim yu i givim baksait. ¹⁹ Inap ol kago bilong yu i helpim yu na bai yu i no inap long wari o inap olgeta strong bilong yu i helpim yu? ²⁰ Noken laikim tumas pasin bilong tudak long kamapim sin long arapela lain, taim ol manmeri i bagarapim gutpela sindaun bilong ol. ²¹ Was gut na yu noken mekim sin, long wanem traim bai i kamap long yu long mekim yu i pilim pen na bai yu i stap longwe long mekim sin. ²² Lukim, litimapim nem bilong God long strong bilong em, husait inap stap tisa olsem em? ²³ Husait inap long tokim em long dispela rot na husait inap long tokim em olsem yu mekim pasin i no stret? ²⁴ Tingim na litimapim em long ol wok em i bin mekim, olsem ol manmeri i bin singsing long en. ²⁵ Olgeta manmeri i lukim ol dispela wok em i bin mekim tasol ol i lukim dispela ol wok em i mekim i olsem piksa i stap longwe tru. ²⁶ Lukim, God em i bikpela tumas, tasol mipela i no save gut long em, i nogat wanpela man inap long kaunim ol yia bilong God. ²⁷ Em i mekim mak long wara i stap long skai bai i kamap klin tru na pundaun olsem ren, ²⁸ olsem na ol klaut i kamap olsem ren na bai pundaun planti tru long ol manmeri. ²⁹ Tru, husait man inap save tru long bikpela klaut God i putim na bikpela pairap bilong klaut long haus bilong em? ³⁰ Lukim, em i putim laitnin i raunim em na karamapim olgeta as bilong solwara. ³¹ Long dispela rot tasol, em i skelim ol manmeri na givim planti kaikai tru long ol. ³² Em i pulmapim han bilong em wantaim laitnin inap em tokim en long pairap long mak bilong en. ³³ Klaut i pairap long soim olsem bikpela win na ren bai i pundaun na ol bulmakau tu bai i harim na save olsem em bai i kam.