31 ¹ Mi bin mekim kontrak pinis, bilong wanem bai mi laikim dispela meri i no i stap wantaim man bipo na mangal long slip wantaim em? ² Wanem ol sampela gutpela samting God i stap antap tru bai givim mi sapos mi brukim dispela kontrak mi bin mekim pinis? ³ Mi save ting olsem bikpela taim nogut i save kamap, em bilong ol man i save mekim pasin i no stret na ol bikpela bagarap i save kamap, em bilong ol man i save mekim pasin nogut. ⁴ God i no luksave long olgeta wokabaut bilong mi na gutpela pasin mi save mekim a? ⁵ Sapos mi bin mekim giaman pasin na long paulim ol manmeri, ⁶ God yet bai bihainim trupela pasin bilong em long skelim gut olgeta stretpela pasin mi bin mekim. ⁷ Sapos mi bin abrus long bihainim gutpela rot na luksave long rot nogut na mi bin bihainim dispela rot nogut na doti pasin i pas long han bilong mi, ⁸ Orait em bai olsem mi planim sit long gaden bilong mi, narapela man bai kisim kaikai bilong en na ol tumbuna bilong mi bai kamautim long as bilong en. ⁹ Sapos bel bilong mi i bin mangal long meri bilong narapela man na mi hait i stap long dua bilong dispela meri long man bilong em i go aut na mi go insait na slip wantaim dispela meri, ¹⁰ Orait meri bilong mi bai stap wantaim narapela man na em bai slip wantaim em. ¹¹ Long wanem dispela bai kamap narapela kain pasin nogut tru na em bai mi i brukim lo na lo bai mekim save long mi. ¹² Long wanem dispela pamuk pasin i olsem paia i lait i stap long hel long kukim ol man na em bai i kukim olgeta samting bilong mi. ¹³ Sapos mi no bin mekim gutpela pasin long harim wari bilong ol wokman na wokmeri bilong mi taim ol i tokpait wantaim mi long sampela samting, ¹⁴ Orait mi bai i mekim wanem tok long haitim mi taim God i kam na kotim mi, bai mi bekim tok olsem wanem long em? . ¹⁵ Dispela God husait i kamapim mi insait long bel bilong mama, em i no kamapim ol wokman bilong mi wankain olsem mi a? ¹⁶ Mi no bin helpim ol man i nogat ol samting na ol meri man bilong ol i dai pinis na mi i mekim ol i wari na krai, ¹⁷ o mi tingim mi yet na i no kaikai wantaim ol pikinini i nogat papa, ¹⁸ tasol mi bin mekim gut long ol pikinini papa mama i dai pinis na ol i kamap bikpela na mi mekim gut long meri man bilong em i dai pinis, taim mi stap yangpela boi i kam inap nao. ¹⁹ Taim mi lukim olsem wanpela man i no gat klos na em laik i dai, o man i no gat planti samting long werim, ²⁰ na bel bilong em i no bin amamas long mi long dispela pasin mi mekim long em na em i bin pilim kol, ²¹ o mi bin traim long bagarapim ol dispela pikinini nogat papa, long wanem mi lukim i gat strong mi bai kisim i stap long dua bilong biktaun, orait kotim mi! ²² Sapos em i tru olsem ol dispela pasin mi bin mekim, orait larim ol man mas brukim solda bilong mi wantaim han bilong mi long join bilong bun. ²³ Long wanem mi pret long bagarap bai i kam long God antap mi olsem na mi no inap long mekim ol dispela samting. ²⁴ Sapos mi bin putim bel na olgeta tingting bilong mi i pas long gol na tok long gol olsem, 'Yu strong bilong mi, ²⁵ o mi bin amamas bikpela tru long wanem ol moni na kago mi gat i kamap bikpela moa na tu mi kisim planti samting long strong bilong mi! ²⁶ Sapos mi bin lukim san taim em i kamap na sut, o lukim pinis mun i bin wakabaut long nait long mun lait, ²⁷ na ol dispela samting i winim bel na tingting bilong mi, olsem na bel bilong mi i bin kirap long lotu long ol, ²⁸ ol dispela pasin tu mi bin mekim i brukim lo bilong God, olsem na ol lo man bai i kotim mi long dispela pasin nogut mi bin mekim long giamanim God. ²⁹ Sapos wanpela man husait i les long mi i kisim bagarap na mi bin amamas tru long dispela bikpela hevi em i kisim, orait putim mi long kot. ³⁰ Tru tumas, long maus bilong mi, i no gat wanpela tok i bin kam long givim hevi long dispela man. ³¹ Sapos ol man long haus bilong mi ol i no bin tokaut olsem, 'Husait i lukim wanpela man i bin kaikai na inapim bel bilong en insait long haus bilong Job?' ³² nogat wanpela man long narapela hap ples i bin slip long ples bilong bung long dua bilong biktaun, long wanem dua bilong mi i op oltaim i stap long ol dispela man long go insait. Sapos mi no bin mekim olsem, orait mi bai i gat tok long en. ³³ Sapos mi bin haitim sin bilong mi olsem ol sampela man i save mekim long karamapim sem bilong mi, ³⁴ long wanem mi pret long ai bilong ol planti manmeri na tu pret long famili bilong mi, olsem na mi hait long haus bilong mi na i no go aut, orait mi bai i gat tok long en! ³⁵ O, sapos ol man inap long stap na harim wanem tok mi mekim! Dispela tok bilong mi mas i gat hanmak, God bikpela mas bekim tok bilong mi. Em bai gutpela sapos wanpela i raitim ol dispela tok insait long buk long ol man i daunim mi. ³⁶ Tru tumas sapos ol mekim olsem, mi inap long putim long solda bilong mi na long het bilong mi olsem hat bilong king long olgeta man i ken luksave. ³⁷ Mi inap long go long God na tokim em long olgeta gutpela pasin mi bin mekim na mi no inap long pret taim mi go long em. ³⁸ Sapos graun bilong mi i singaut na krai i kam bek long mi olsem man na ai wara bilong em i go daun na digim graun, ³⁹ o sapos mi bin kisim kaikai long dispela graun na i no givim pei bilong dispela kaikai mi kisim, ⁴⁰ orait ol nilnil gras bai kamap insait long gaden bilong mi kisim ples bilong gutpela pikinini wit na ol gras nogut bai i kisim ples bilong bari." Job i tokim ol dispela tok i go long ol tripela wantok bilong em.