21 ¹ Job i bekim tok na i tok, ² "Harim gut tok bilong mi, dispela bel isi i kamap olsem ofa yu mekim long mi. ³ Larim em wantaim mi na bai mi toktok tu long en, na bihain long mi toktok pinis, nogut mi giaman gen. ⁴ Long mi, mi tokpait long ol man. Long wanem na mi no inap i stap isi? ⁵ Yupela lukluk long mi na bai yupela i kirap nogut na bai yupela i kaikaim han bilong yupela. ⁶ Taim mi tingting long pein bilong mi, mi pret na guria nogut tru. ⁷ Bilong wanem ol manmeri nogut i stap longpela taim na i go kamap lapun na i kamap strong long pawa? ⁸ Ol tumbuna pikinini i kamap na i stap long ai bilong ol na ol lain pikinini bai i kamap bihain i kamap na i stap long ai bilong ol tu. ⁹ Ol i sindaun gut na i no gat pret, stik bilong belhat bilong God tu i no stap antap long ol. ¹⁰ Ol bulmakau bilong ol i karim ol pikinini gut, ol i no abrus long mekim olsem na karim pinis long en tu ol i no go bagarap. ¹¹ Ol i salim ol pikinini bilong ol i go olsem wanpela lain sipsip. Na ol yangpela pikinini manmeri bilong ol i raun na i kalapkalap. ¹² Ol i mekim ol song long tambarin na gita na ol i winim mambu na danis wantaim. ¹³ Ol i stap gut olgeta dei long olgeta samting na taim ol i dai ol i go long ples bilong ol man i dai pinis isi tru. ¹⁴ Ol i tokim God,"Yu klia long mipela mipela i no laik bai yu skulim mipela long ol gutpela pasin bilong yu. ¹⁵ Wanem bikpela strong, bai mipela inap lotuim em? Wanem gutpela samting mipela inap kisim taim mipela i prea long em? ¹⁶ Lukim ol gutpela samting ol i kisim i no i stap long han bilong ol a? Mi no gat wok long ol toktok ol manmeri nogut i skulim mi. ¹⁷ Hamas taim ol man nogut i save i dai na hamas taim ol taim nogut i save kamap long ol? Na hamas taim i save kamap God Yawe i save larim belhevi insait long belhat bilong em? ¹⁸ Hamas taim ol i olsem gras i drai long taim bilong win o olsem ol pipia bilong wit raun win i karim i go? ¹⁹ Yu save tok, "God Yawe i holim asua bilong man long pikinini biong em, man i mas karim hevi bilong dispela, larim dispela man yet i mas kisim hevi bilong en na bai em i pilim hevi bilong dispela asua. ²⁰ Larim em i mas lukim bagarap long ai bilong em na i dring belhat bilong God Yawe i gat olgeta strong long laip bilong em yet. ²¹ Bai em i wari long femili bilong em olsem wanem taim namba bilong ol mun bilong em long dspela graun i pinis? ²² Inap wanpela man i stap i ken skulim God Yawe long save taim em i laik kotim ol man i stap antap moa? ²³ Wanpela man i stap gut na strong na em i dai long taim stret bilong em na i dai isi tru. ²⁴ Laip bilong sampela i gutpela tru olsem susu i pulap na bodi na bun bilong em i stap gut tru. ²⁵ Narapela man i dai insait long pen na hevi na i no bin lukim wanpela gutpela taim bilong malolo long tewel bilong em. ²⁶ Em i dai na kamap das bilong graun na graun wantaim liklik snek bilong graun i karamapim tupela wantaim. ²⁷ Lukim, mi save long ol tingting bilong yu na ol pasin yu ting long mekim nogut long mi. ²⁸ Olsem yu tok, "Dispela haus bilong pikinini man bilong king i stap we? Haus sel ol man nogut i save stap long en i stap we? ²⁹ Yu no bin askim sampela manmeri i save wokabaut i go i kam? Yu no bin save long sampela pasin bilong ol i ken tokaut, ³⁰ olsem ol man nogut i stap na wetim taim bilong hevi na ranawe long belhat i laik kamap bihain? ³¹ Husat bai i kotim pasin bilong ol man nogut long pes bilong em? Na husat bai i bekim pe bilong wanem samting em i bin mekim? ³² Em bai i dai na go bek long graun na bai ol man i bung na was antap long matmat bilong em. ³³ Taim em i dai bai planti manmeri bai i bung na karim em i go, olgeta manmeri bai i kam bihain long em olsem planti man bai i go pastaim long em. ³⁴ Olsem wanem yu laik mekim gut long mi wantaim tok i no gat gutpela tingting na olgeta tok bilong yu i bin giaman tasol?"