20 ¹ Olsem na Sofar bilong kantri Nama i bekim tok olsem, ² "Ol tingting bilong mi i mekim mi long bekim tok bilong yu hariap bilong wanem ol wari i pulap tru insait long mi. ³ Mi harim wanpela tok kros i givim sem long mi tasol tingting bilong mi long luksave i tokim mi olsem. ⁴ Yu save long ol dispela samting i bin kamap long bipo tru taim God i bin putim man antap long graun, ⁵ gutpela samting man nogut i bin hatwok long kisim bai i stap sotpela taim tasol na amamas bilong man i no stap aninit long God bai stap liklik taim tasol? ⁶ Maski longpela bilong em i go antap tru long ol heven na het bilong em i go antap long ol klaut, ⁷ tasol dispela kain man bai i pinis olgeta olsem pekpek bilong em yet, ol lain husat i bin lukim em bai i tok olsem,' Em i stap we?' ⁸ Em bai pinis tru olsem driman na bai ol i no inap painim em, tru tru, em bai i rausim em i go olsem driman bilong nait. ⁹ Ol man i lukim em bai i no inap lukim em moa na em bai i no stap moa long ples bilong em. ¹⁰ Ol pikinini bilong em bai tok sori long ol manmeri i nogat planti samting na givim bek ogeta samting bilong em long ol. ¹¹ Ol bun bilong em i pulap long strong bilong ol yangpela man tasol dispela strong bai i stap aninit long graun wantaim em. ¹² Maski pasin nogut i kamap swit tru long maus bilong em ,maski em i haitim aninit long tang bilong em, ¹³ maski em i holim toktok long maus bilong en na i no tokaut, ¹⁴ kaikai i stap insait long bel bilong em i pait tru olsem posin bilong snek i stap insait long em. ¹⁵ Em i daunim ol gutpela kago samting tasol em bai i trautim ol i kam antap gen. God bai i rausim olgeta i kam aut long bel bilong em. ¹⁶ Em bai pulim posin bilong ol snek na tang bilong narapela snek bai i kilim em. ¹⁷ Em bai i no inap long amamasim em yet wantaim ol dispela kago samting i swit olsem hani na bata. ¹⁸ Em bai i givim bek ol kaikai em i hatwok long em na em bai i no inap kaikai ol kaikai we em i hatwok long planim na bai em i no inap amamas wantaim ol planti moni samting we em i kisim long ol wok bisnis bilong em. ¹⁹ Bilong wanem em i givim hevi na i no bin lukautim ol manmeri i sot long ol samting na em i bagarapim ol na kisim ol haus we em i no bin mekim. ²⁰ Bilong wanem em i no inap malolo long laikim moa yet na em bai i no inap long lukautim ol samting em i save laikim. ²¹ I nogat wanpela samting i stap we em i no daunim, olsem na gutpela sindaun bilong en bai i stap sotpela taim. ²² Insait long planti moni samting bilong en, bai em i pundaun long bikpela bagarap na olgeta manmeri husat i nogat planti moni na i gat liklik samting tasol bai i birua long em. ²³ Taim em i laik pulapim bel bilong em, God bai kapsaitim bikpela belhat bilong en antap long em. God bai kapsaitim olsem ren i go daun long em taim em i kaikai yet. ²⁴ Maski dispela man bai i ranawe long samting bilong kilim man ol i wokim long ain tasol bunara ol i wokim wantaim bras bai i sutim em. ²⁵ Em i pulim i kam aut long baksait bilong em na sap bilong spia ol i wokim long bras i kam aut long bel bilong em. Bikpela pret tru i kam antap long em. ²⁶ Bikpela tudak tru i stap yet na wetim ol gutpela kago samting bilong em, bikpela paia we ol man i no bin wokim bai bagarapim em na bagarapim ol hap samting i stap yet long haus sel bilong em. ²⁷ Ol heven yet bai i kamapim ples klia ol pasin nogut bilong em na dispela graun bai i birua long em na kotim em. ²⁸ Ol kago samting insait long haus bilong em bai i pinis na ol kago bilong em bai pundaun i go daun long dispela dei belhat bilong God i kamap ples klia. ²⁹ Dispela em i skel bilong man nogut God bai i givim, em ol samting God i redim bilong em."