20 ¹ Long moning taim tru long namba wan de bilong wik, taim tudak i stap yet, Maria bilong Makdala i kam long matmat na em i lukim ston i save pasim dua bilong matmat i no stap moa. ² Olsem na em i ran i go long Saimon Pita na long dispela disaipel Jisas i save laikim em tumas, na em i tokim ol, "Ol i rausim Bikpela pinis long matmat na mipela i no save ol i putim em long wanem hap." ³ Orait Pita wantaim dispela disaipel i go autsait na ran i go long matmat. ⁴ Tupela i ran i go wantaim, tasol arapela disaipel i ran strong na i winim Pita na go kamap pastaim long matmat. ⁵ Em i daunim het i go daun na lukluk i go insait na em i lukim ol laplap ol i bin karamapim bodi bilong Jisas i stap, tasol em i no go insait yet. ⁶ Saimon Pita i kamap bihain long en na i go insait long matmat. Em i lukim ol laplap ol i bin karamapim bodi bilong Jisas i stap, ⁷ na hap laplap ol i bin putim long het bilong en. Dispela hap laplap, i no stap wantaim ol narapela laplap, tasol dispela laplap i pas gut na i stap. ⁸ Bihain narapela disaipel husat i kamap pas long matmat, em tu i go insait long matmat na i lukim na i bilip. ⁹ Long dispela taim, ol i no save yet long tok bilong God olsem, Jisas bai i dai na kirap bek. ¹⁰ Olsem na ol disaipel i go bek long haus bilong ol. ¹¹ Tasol, Maria i sanap autsait long matmat na krai i stap, taim em i krai yet, em i lindaun na lukluk i go insait long matmat. ¹² Em i lukim tupela ensel i sindaun wantaim waitpela klos, wanpela long het na arapela long lek we bodi bilong Jisas i bin stap. ¹³ Ol i tokim em, "Meri, yu krai long wanem?" Meri i tokim ol, "Ol i kisim Bikpela bilong mi i go, na mi no save ol i putim em long we." ¹⁴ Taim em i mekim dispela tok pinis, em i tanim na lukim Jisas i sanap i stap, tasol em i no save olsem em Jisas. ¹⁵ Jisas i tokim em, "Meri, yu krai long wanem? Yu painim husait?" Meri i ting olsem, em wanpela man i save wok long gaden, olsem na meri i tokim em olsem, "Bikman, sapos yu bin kisim em i go, tokim mi wanem hap yu bin putim em, na bai mi ken kisim em i go." ¹⁶ Jisas i tokim meri olsem, "Maria." Em i tanim em yet na tok olsem long tok Hidru, "Raboni," (as bilong dispela tok i olsem, "Tisa."). ¹⁷ Jisas i tokim em, "Yu noken holim mi, mi no go yet long Papa bilong mi, tasol yu mas i go long ol brata bilong mi na tokim ol olsem, bai mi go antap long Papa bilong mi na Papa bilong yupela tu, na God bilong mi na God bilong yupela." ¹⁸ Na Maria bilong Makdala i kam na tokim ol disaipel, "Mi lukim Bikpela pinis," na meri i tokim ol wanem samting Jisas i tokim em. ¹⁹ Long apinun, long dispela de long namba wan de bilong wik, taim ol dua i pas na ol disaipel i pret long ol Juda. Jisas i kam sanap namel long ol na tok olsem, "Bel isi i ken stap wantaim yupela." ²⁰ Taim em i mekim dispela tok pinis, em i soim ol han na sait bilong em. Orait, ol disaipel i lukim Bikpela bilong ol na amamas. ²¹ Jisas i tokim ol gen olsem, "Bel isi i ken i stap wantaim yupela. Papa i salim mi na mi kam, wankain tasol, mi salim yupela i go." ²² Taim Jisas i mekim dispela tok pinis, em i winim win bilong en long ol na i tok olsem, "Yupela kisim Holi Spirit. ²³ Sapos yupela lusim sin bilong ol man, God bai lusim sin bilong ol, na sapos yupela i holim bek sin bilong ol man, God tu bai i holim sin bilong ol." ²⁴ Tomas, narapela nem bilong en Didimus, em wanpela bilong ol 12-pela disaipel, i no bin stap wantaim ol taim Jisas i kam. ²⁵ Bihain ol arapela disaipel i tokim em. "Mipela i lukim Bikpela pinis." Tomas i tokim ol, "Sapos mi no lukim mak bilong nil long han bilong en, na putim pinga bilong mi long mak bilong nil, na putim han bilong mi long sait bilong en, mi no inap bilip." ²⁶ Bihain long 8-pela de ol disaipel bilong Jisas i stap insait long haus gen, na Tomas i stap wantaim ol. Jisas i kam na sanap namel long ol taim dua i pas yet, na i tok olsem, "Bel isi i ken stap wantaim yupela." ²⁷ Na em i tokim Tomas olsem, "Putim pinga bilong yu kam na lukim han bilong mi, na putim han bilong yu kam, na putim long sait bilong mi. Yu noken tubel, tasol yu mas bilip." ²⁸ Tomas i bekim tok bilong en, "Bikpela bilong mi na God bilong mi." ²⁹ Na Jisas i tokim em, "Long wanem, yu bin lukim mi na yu bilip. Tasol ol lain i no lukim mi na bilip, ol i ken amamas." ³⁰ Jisas i bin mekim planti mirakel taim em i stap wantaim ol disaipel. Dispela ol mirakel ol i no bin raitim insait long dispela buk, ³¹ tasol ol i bin raitim dispela olgeta tok long yupela i ken bilip olsem Jisas Krais em Pikinini bilong God. Olsem na taim yupela i bilip, bai yupela i kisim laip insait long nem bilong en.