19 ¹ Na Pailat i kisim Jisas na wipim em. ² Ol soldia i kisim ol rop i gat nil na i raunim long mekim hat bilong king, na ol i putim long het bilong Jisas, na putim pepol pela klos long em. ³ Ol i kam long em na i tok, "Yu King bilong ol Juda!" Na ol i paitim em. ⁴ Na Pailat i go autsait gen na tokim ol, "Lukim, mi bringim dispela man i kamaut long yupela i ken save olsem, mi no painim asua bilong em. ⁵ Na Jisas i kam autsait, em i putim rop i gat nil olsem hat bilong king na pepol pela klos. Na Pailat i tokim ol, "Lukim, hia em dispela man!" ⁶ Taim ol hetpris na ol ofisa i lukim Jisas, ol i singaut bikmaus na tok olsem, "Nilim em long diwai kros, nilim em long diwai kros!" Na Pailat i tokim ol, "Yupela yet i kisim em na nilim em long diwai kros, mi no painim wanpela asua bilong em." ⁷ Na ol Juda i bekim tok bilong Pailat olsem, "Mipela i gat lo, long dispela lo em i mas dai, long wanem, em i mekim em yet olsem Pikinini bilong God." ⁸ Taim Pailat i harim dispela tok, em i pret moa yet, ⁹ na em i go insait long haus gavman gen na askim Jisas, "Yu kam long wanem hap?" Tasol Jisas i no bekim wanpela tok. ¹⁰ Na bihain Pailat i tokim em, "Bilong wanem yu no tokim mi? Yu no save olsem mi gat strong long lusim yu go na strong long nilim yu long diwai kros?" ¹¹ Na Jisas i bekim tok bilong em olsem, "Sapos God i no givim strong long yu, orait yu no inap long bosim mi. Olsem na man husait i givim mi long han bilong yu, em i gat bikpela sin tru." ¹² Long dispela bekim, Pailat i traim long lusim em, tasol ol Juda i singaut bikmaus na tok, "Sapos yu lusim dispela man, yu no pren bilong Sisar. Olgeta man husait i mekim em yet olsem king, em i birua bilong Sisar." ¹³ Taim Pailat i harim ol dispela tok, em i bringim Jisas i kamaut na sindaunim em long sia bilong jas, long ples ol i kolim Plua Ston. Long tok Hibru, ol i kolim Gabata. ¹⁴ Nau em i de bilong redim ol samting bilong bikpela de bilong Pasova, na taim em i 12- kilok belo, Pailat i tokim ol Juda olsem, "Yupela lukim, hia em king bilong yupela!" ¹⁵ Ol i singaut olsem, "Rausim em, rausim em; nilim em long diwai kros!" Na Pailat i tokim ol, "Bai mi nilim king bilong yupela long diwai kros?" Na ol hetpris i bekim tok bilong em olsem, "Mipela i nogat narapela king, Sisar tasol." ¹⁶ Orait Pailat i givim Jisas long han bilong ol long nilim em long diwai kros. ¹⁷ Orait ol i kisim Jisas i go autsait, na em i karim diwai kros bilong em yet, na i go long ples ol i kolim Ples bilong Bun bilong Het, long tok Hibru ol i kolim Golgota. ¹⁸ Ol i nilim Jisas long diwai kros long hap wantaim tupela arapela man, wanpela man long hapsait na narapela man long hapsait na Jisas i stap namel. ¹⁹ Pailat i raitim wanpela tok tu na putim long diwai kros. Tok ol i bin raitim em i olsem: JISAS BILONG NASARET, KING BILONG OL JUDA. ²⁰ Planti bilong ol Juda i ritim dispela tok, long wanem, ol i nilim Jisas long diwai kros klostu long bikpela taun. Ol i raitim dispela tok long, tok Hibru, tok Latin na tok Grik. ²¹ Bihain ol hetpris bilong ol Juda i tokim Pailat, "Noken raitim olsem, 'King bilong ol Juda,' em yet i tok, 'Mi king bilong ol Juda.'" ²² Pailat i bekim tok bilong ol olsem, "Wanem mi raitim em mi raitim pinis." ²³ Ol soldia i nilim Jisas long diwai kros pinis, ol i kisim klos bilong em na brukim long 4-pela hap. wanwan soldia i kisim wanwan hap, ol i kisim siot bilong em tu. Dispela siot i nogat planti samap, ol i wokim long wanpela longpela klos. ²⁴ Na ol i toktok namel long ol yet olsem, "Yumi noken brukim, tasol yumi pilai satu bilong painim husat i ken kisim." Dispela i kamap long tok i stap long Buk bilong God olsem, "Ol i tilim klos bilong mi namel long ol yet na pilai satu long em." ²⁵ Long dispela taim mama bilong Jisas, susa bilong mama bilong Jisas, Maria meri bilong Klopas na Maria bilong Makdala, em ol dispela meri i bin sanap klostu long diwai kros bilong Jisas. ²⁶ Taim Jisas i lukim mama bilong en na disaipel husait em i save laikim tumas, i sanap i stap klostu, na em i tokim mama bilong em, "Meri, lukim, hia em pikinini bilong yu!" ²⁷ Na bihain em i tokim dispela disaipel, "Lukim, hia em mama bilong yu!" Long dispela taim disaipel i kisim em i go long haus bilong em yet. ²⁸ Bihain long dispela, Jisas i save olsem olgeta samting i pinis, long mekim tok bilong i kamap tru, em tok, "Nek bilong mi i drai." ²⁹ Wanpela sospen i pulap long wain i pait i stap long hap, na ol i putim wanpela spans long han bilong diwai hisop i pulap wantaim wain na apim i go antap na putim long maus bilong em. ³⁰ Taim Jisas i dring dispela wain pinis, em i tok, "Em i pinis ." Na em i daunim het bilong em na lusim spirit bilong em i go. ³¹ Taim bilong redim ol samting bilong de Sabat, olsem na ol i no laikim ol bodi i mas i stap long diwai kros, long wanem, de Sabat em i bikpela de tru. Ol Juda i askim Pailat long brukim lek bilong ol man i hangamap long diwai kros na ol i ken rausim bodi bilong ol i kam daun. ³² Bihain ol soldia i kam na brukim lek bilong namba wan man na namba tu man i hangamap long diwai kros wantaim Jisas. ³³ Taim ol i kam long Jisas, ol i lukim olsem em i dai pinis, olsem na ol i no brukim lek bilong em. ³⁴ Tasol wanpela soldia i sutim sait bilong Jisas wantaim spia na wantu blut wantaim wara i kapsait. ³⁵ Man husait i lukim dispela samting, em i tokaut pinis, em i tru olgeta. Em yet i save wanem tok em i mekim em i tru, olsem na yupela tu i ken bilip. ³⁶ Ol dispela samting i kamap long inapim tok bilong God, "Nogat wanpela hap bun bilong en bai i bruk." ³⁷ Na narapela tok bilong God tu i tok olsem, "Ol bai lukim dispela man ol i sutim." ³⁸ Bihain long ol dispela samting, Josep bilong Arimatia, em i wanpela disaipel bilong Jisas, em i pret long ol Juda na hait tasol, em i kam na askim Pailat long kisim bodi bilong Jisas. Na Pailat i givim em tok orait. Olsem na Josep i kisim bodi bilong em i go. ³⁹ Nikodimas tu em i kam, pastaim em i bin kam long Jisas long nait. Em i bringim sampela sanda i gat gutpela smel, ol i wokim long tupela kain diwai, Hevi bilong em i olsem 30 kilogram. ⁴⁰ Ol i kisim bodi bilong Jisas na pasim long longpela klos wantaim ol sanda. Em i pasin bilong ol Juda long planim man i dai pinis, olsem na ol i mekim. ⁴¹ Long ples ol i bin nilim em long diwai kros, i gat wanpela gaden i stap, na long dispela gaden i gat wanpela nupela matmat we ol i no bin planim wanpela man yet. ⁴² Ol i kisim bodi bilong Jisas, karamapim wantaim liklik klos olsem pasin bilong ol Juda long planim dai manmeri..