21 ¹ Bihain long ol dispela samting, Jisas i soim em yet gen long ol disaipel long solwara Taiberias. Em i soim em yet olsem. ² Saimon Pita i bin stap wantaim Tomas ol i kolim Didimas na Nataniel bilong Kana long Galili na tupela pikinini man bilong Sebedi na narapela tupela disaipel bilong Jisas. ³ Saimon Pita i tokim ol, "mi laik go painim pis."Na ol i tokim em, "Mipela tu bai kam wantaim yu." Na ol i go kalap long wanpela bot, tasol long dispela nait ol i no bin kisim wanpela samting. ⁴ Taim tulait i bruk, Jisas i sanap long nambis tasol ol disaipel i no bin save olsem em i Jisas. ⁵ Na Jisas i tokim ol, "Ol yangpela man, yupela i gat sampela samting bilong kaikai?" Na ol i bekim tok olsem, "Nogat." ⁶ Em i tokim ol, "Tromoi umben bilong yupela long hansut bilong bot, na bai yupela kisim sampela pis." Orait ol i tromoi umben bilong ol na ol i no inap long pulim umben i kam antap, long wanem planti pis i pulap long umben. ⁷ Na disaipel Jisas i laikim tumas i tokim Pita, "Em i Bikpela," Taim Saimon Pita i harim olsem em i Bikpela, em i pasim saket bilong em ( long wanem em i bin rausim na i stap ) na em i kalap i go daun long solwara. ⁸ Na ol arapela disaipel i stap insait long bot, i wok long pulim umben i pulap long pis. Long wanem ol i no stap longwe long nambis, klostu olsem 100 mita. ⁹ Taim ol i kamap long nambis, ol i lukim wanpela paia i lait i stap na pis i stap antap long en, na bret tu i stap. ¹⁰ Na Jisas i tokim ol, kisim sampela pis i kam. ¹¹ Saimon Pita i go antap na pulim umben i pulap long ol traipela pis , 153 olgeta , tasol umben i no bin bruk. ¹² Jisas i tokim ol , "Kam na kisim kaikai.Tasol i nogat wanpela disaipel i tingting long askim em, yu husat?" Ol i save olsem, em i Bikpela. ¹³ Jisas i kam kisim bret wantaim pis na givim long ol.. ¹⁴ Dispela em i namba 3 taim Jisas i soim em yet long ol disaipel bihain long em i kirap bek long matmat. ¹⁵ Ol i kaikai pinis na Jisas i tokim Saimon Pita, "Saimon, pikinini bilong Jon, yu laikim mi moa long ol dispela?" Pita i tokim em, "Yes, Bikpela, yu save olsem mi laikim yu." Jisas i tokim em, "Givim kaikai long ol pikinini sipsip bilong mi," ¹⁶ Jisas i askim em gen namba tu taim, "Saimon, pikinini bilong Jon, Yu laikim mi?" Pita i tokim em, "Yes, Bikpela, yu save olsem mi laikim yu." Na Jisas i tokim em, "Lukautim ol sipsip bilong mi." ¹⁷ Jisas i askim em namba 3 taim, "Saimon, pikinini bilong Jon, yu laikim Me?" Pita i bel hevi, long wanem Jisas i askim em namba tri taim, " Yu laikim mi?" Pita i tokim Jisas, "Bikpela yu save long olgeta samting, yu save olsem mi laikim yu." Na Jisas i tokim Pita, "Givim kaikai long ol sipsip bilong mi." ¹⁸ Tru tumas mi tokim yu, taim yu yangpela, yu yet save putim klos bilong yu na wokabaut long laik bilong yu yet. Tasol taim yu kamap lapun, bai yu litimapim han bilong yu na narapela man bai kisim klos bilong yu na putim long yu na karim yu i go long hap yu no laik i go long en." ¹⁹ Jisas i mekim dispela tok long makim wanem kain dai Pita bai bungim long givim biknem long God. Em i mekim dispela tok pinis na bihain em i tokim Pita, "Bihainim mi.'' ²⁰ Pita i tanim na i lukim disaipel Jisas i laikim tumas i bihainim ol - em tasol i bin slip long sait bilong Jisas long taim ol i kaikai, na tok, "Bikpela, husat bai putim yu long han bilong ol birua? ²¹ Pita i lukim em na i tokim Jisas, "Bikpela, dispela man bai mekim wanem?" ²² Jisas i tokim em, "Sapos mi laikim em i stap inap mi kam, Bilong wanem na yu askim long dispela, Yu bihainim mi." ²³ Ol disaipel i harim dispela tok olsem, dispela disaipel bai ino inap dai. Tasol Jisas i no tokim Pita olsem em bai ino inap dai, Tasol em i tok, "Sapos mi laikim em i stap inap mi kam. Bilong wanem na yu askim long dispela?" ²⁴ Dispela em i disaipel husat i bin autim tok long ol dispela samting. Na i bin raitim ol dispela samting, na yumi save olsem tok bilong em i tru. ²⁵ Jisas i bin mekim, planti arapela samting tu, sapos mi raitim olgeta wanwan mi ting olsem olgeta hap graun bai i nogat rum inap long putim ol dispela buk.