16 ¹ "Mi mekim ol dispela tok, long mekim yupela bai i no noken pundaun long bilip. ² Bai ol i rausim yupela i go autsait long haus lotu bilong ol Juda. Tru tumas, yumi kamap klostu long taim bilong ol manmeri long kilim yumi, na long dispela pasin, ol bai i ting olsem ol i mekim gutpela wok bilong God. ³ Ol bai mekim ol dispela pasin long yupela, long wanem, ol i no save long Papa o long mi yet. ⁴ Mi tokaut long ol dispela samting long yupela, na long taim ol dispela samting i kamap, yupela bai tingim gen wanem tok mi bin tokim yupela. Mi i no bin tokim yupela long ol dispela samting bipo, long wanem, mi bin stap wantaim yupela. ⁵ Tasol nau bai mi go long husait i bin salim mi kam, na yet nogat wanpela i askim mi, 'Yu laik go we?' ⁶ Tasol nau, mi tokim yupela long ol dispela samting na sori i pulap long bel bilong yupela. ⁷ Olsem na mi tok tru long yupela, long gutpela bilong yupela bai mi go, long wanem, sapos mi no go, Helpim bai i no inap kam long yupela. Tasol sapos mi go, bai mi salim em i kam long yupela. ⁸ Taim dispela Helpim i kam, em bai soim sin bilong olgeta manmeri bilong graun, na long stretpela pasin, na long kot bilong God, ⁹ na long sin, long wanem, ol manmeri i no bilip long mi, ¹⁰ na long stretpela pasin, long wanem, mi bai go long Papa na bai yupela i no inap lukim mi moa, ¹¹ na long kot bilong God, long wanem, hetman bilong dispela graun i sanap pinis long kot. ¹² Mi gat planti samting moa long tokim yupela, tasol yupela i no inap save long as bilong olgeta samting nau. ¹³ Olsem na taim dispela Spirit bilong Tok Tru i kam, em bai stiaim yupela long olgeta tok tru, em i no inap toktok long em yet, tasol wanem samting em i harim, em bai autim dispela tasol, na em bai tokim yupela olgeta samting bai i kamap bihain. ¹⁴ Em bai givim biknem long mi, long wanem, olgeta samting em harim long mi, dispela tasol, bai em i autim long yupela. ¹⁵ Olgeta samting Papa i gat em i bilong mi tasol, olsem tasol, Holi Spirit bai kisim ol dispela samting bilong mi na tokaut long yupela. ¹⁶ Long liklik taim tasol bai yupela i no lukim mi, tasol long liklik taim bihain, bai yupela i lukim mi gen." ¹⁷ Sampela disaipel bilong em i toktok namel long ol yet olsem, "Wanem kain tok em i mekim long yumi olsem, 'Liklik taim bai yupela i no lukim mi,' na, 'Liklik taim bihain bai yupela i lukim mi gen,' na 'Bilong wanem, mi go long Papa bilong mi'?" ¹⁸ Na ol i tok olsem gen, "Wanem kain tok em i mekim olsem, 'Liklik taim bihain'? Mipela i no save wanem samting em i toktok long en." ¹⁹ Jisas i lukim olsem ol i laik askim em moa, olsem na em i tokim ol. "Ating yupela i askim namel long yupela yet long ol samting mi bin tokim yupela, 'Long liklik taim tasol bai yupela i no lukim mi, tasol liklik taim bihain bai yupela i lukim mi gen'? ²⁰ Tru tumas mi tokim yupela, bai yupela i krai bikmaus, tasol ol man long graun bai amamas, bai yupela i stap wantaim bel sori, tasol bel sori bilong yupela bai tanim na kamap amamas. ²¹ Meri i laik karim pikinin, i em i save pilim bikpela pen na sori, long wanem, taim bilong karim pikinini i kamap nau, tasol taim em i karim pikinini pinis, em i no moa tingim pen bilong en, long wanem, pikinini em i karim i kam long dispela graun i givim em bikpela amamas. ²² Yupela tu i stap wantaim bel sori nau, tasol mi bai lukim yupela gen, na bel bilong yupela bai i amamas gen, na nogat man bai i rausim dispela amamas insait long yupela. ²³ Long dispela de bai yupela i no moa askim mi gen. Tru tumas mi tokim yupela, long nem bilong mi, yupela i askim Papa long wanpela samting, em bai givim yupela. ²⁴ Inap long nau, long nem bilong mi, yupela i no bin askim long wanpela samting. Askim na bai yupela i kisim na amamas bai i pulap long yupela. ²⁵ Mi bin autim olgeta dispela tok long tok piksa, tasol taim i wok long kam na bai mi no moa mekim tok piksa long yupela, tasol bai mi tokaut ples klia long Papa. ²⁶ Long dispela de bai yupela i askim long nem bilong mi, na mi no tok olsem bai mi prea long yupela long Papa, ²⁷ nogat, Papa em yet i laikim yupela, long wanem, yupela i laikim mi na bilip olsem mi bin kam long God. ²⁸ Mi kam long Papa na mi kamap long dispela graun, na gen, mi bai lusim dispela graun na go bek long Papa." ²⁹ Ol disaipel bilong en i tok olsem, "Lukim, nau yu mekim tok ples klia stret na yu no mekim tok piksa. ³⁰ Nau mipela i save olsem yu save long olgeta samting, na i no gat wanpela inap long askim yu long wanpela samting. Long dispela as tasol mipela i save olsem yu kam long God." ³¹ Jisas i bekim tok bilong ol olsem, "Nau yupela i bilip a?" ³² Lukim, taim i wok long kam, yes, tru tumas taim i kamap pinis, na bai yupela i ranawe nabaut wantaim olgeta samting bilong yupela na bai yupela i lusim mi wanpela tasol i stap. Tasol mi no stap wanpela, long wanem, Papa i stap wantaim mi. ³³ Mi mekim olgeta dispela tok, long yupela i ken stap bel isi insait long mi. Long dispela graun bai yupela i gat kainkain hevi, tasol yupela i mas sanap strong, long wanem, mi winim pinis strong bilong dispela graun."