17 ¹ Jisas i mekim dispela toktok pinis. Na em i lukluk i go antap long skai na i tok, "Papa taim i kamap pinis. Bai yu givim Biknem long pikinini, na pikinini bai givim Biknem long yu.'' ² Olsem yu bin givim em olgeta strong bilong bosim olgeta manmeri, long em i ken givim laip i stap gut oltaim oltaim, long olgeta lain manmeri yu bin givim long en. ³ Dispela laip i stap gut oltaim oltaim i olsem, ol bai save long yu, olsem yu wanpela tasol yu God tru, na yu bin salim Jisas Krais i kam. ⁴ Mi bin givim biknem long yu long dispela graun, na mi pinisim olgeta wok yu bin givim long mi. ⁵ Nau, Papa, givim mi dispela Biknem mi bin i gat wantaim yu bipo taim olgeta samting i no bin kamap yet. ⁶ Mi soim nem bilong yu long ol dispela manmeri, yu bin givim mi long dispela graun. Dispela em ol manmeri bilong yu, na yu givim ol long mi na ol i holim pasim tok bilong yu. ⁷ Nau ol i save pinis olsem, olgeta samting yu bin givim long mi, i kam long yu. ⁸ Tok yu bin givim long mi, em mi givim long ol, na ol i kisim dispela tok na ol i bilip tru, na save olsem mi bin stap wantaim yu na yu salim mi i kam. ⁹ Mi beten long ol. Mi no beten long ol manmeri bilong dispela graun, tasol mi beten long ol lain manmeri yu bin givim mi, em ol lain manmeri bilong yu stret. ¹⁰ Olgeta samting bilong mi, em i bilong yu, na olgeta samting bilong yu, em i bilong mi,na mi gat Biknem long em. ¹¹ Mi no inap stap longpela taim long graun, tasol ol dispela manmeri bai stap long graun na mi bai kam long yu. Papa yu Holi, lukautim ol long nem bilong yu, em dispela nem yu bin givim long mi na bai ol i ken stap wanpela lain olsem yumi i stap wanpela. ¹² Taim mi bin stap wantaim ol, Mi lukautim ol long strong bilong nem yu bin givim long mi, na mi lukautim ol na i nogat wanpela bilong ol i lus, tasol wanpela pikinini inap long kisim bagarap, em tasol i lus. Long dispela as, tok i stap long buk bilong God bai kamap tru. ¹³ Na nau mi kam long yu, tasol mi mekim dispela tok long graun long wanem, amamas bilong mi i ken pulap long ol. ¹⁴ Mi givim tok bilong yu long ol, na ol manmeri bilong graun i birua long ol long wanem, ol i no bilong dispela graun, olsem mi tu, mi no bilong dispela graun. ¹⁵ Mi no beten long yu long rausim ol long dispela graun, tasol mi askim yu long lukautim ol long ol man nogut. ¹⁶ Ol i no bilong dispela graun, olsem mi tu, mi no bilong dispela graun. ¹⁷ Mekim ol i kamap holi insait long tok tru bilong yu, long wanem, tok bilong yu em i tru. ¹⁸ Wankain olsem yu bin salim mi i kam daun long graun, nau mi salim ol i go long graun. ¹⁹ Long helpim ol, mi givim mi yet long ol, long ol yet i mas i stap holi tru. ²⁰ Mi no beten long dispela tasol, Mi beten tu long ol lain husat bai harim tok long maus bilong ol na i bilip. ²¹ Ol i ken kamap wanpela lain manmeri tasol, olsem yu Papa i stap long mi, na Mi stap long yu. Na mi beten tu olsem, ol bai i stap insait long yumi, na bilip olsem yu salim mi na mi kam. ²² Biknem yu bin givim long mi, em mi givim tu long ol, long wanem ol i ken kamap wanpela lain, olsem yumi wanpela. ²³ Mi stap long ol, na Yu i stap long mi, na bai ol i ken kamap wanpela lain. Long dispela rot ol manmeri i ken save olsem yu bin salim mi i kam, na bai yu laikim ol wankain olsem yu laikim mi. ²⁴ Papa, ol dispela lain yu bin givim long mi, Mi laikim olsem, ol i ken stap wantaim mi long ples mi bai stap long en, na bai ol i ken lukim strong bilong mi, we yu bin givim long mi. Long wanem, yu bin laikim mi taim olgeta samting bilong dispela graun i no bin kamap yet. ²⁵ Stretpela Papa, ol manmeri bilong graun i no save long yu, tasol mi save long yu na dispela i soim olsem yu salim mi i kam. ²⁶ Mi bin soim nem bilong yu i kamap ples klia long ol, na bai mi mekim ol i laikim ol arapela olsem yu laikim mi, na bai mi ken stap wantaim ol tu.