15 ¹ "Mi yet mi diwai wain tru, na Papa bilong mi em papa bilong gaden wain. ² Em i save rausim olgeta han i stap long mi i no save karim kaikai, na em i save klinim olgeta han i karim kaikai na em bai karim planti moa kaikai. ³ Yupela i kamap klin pinis, bilong wanem, yupela i bin harim tok mi bin autim pinis long yupela. ⁴ Yupela i mas pas wantaim mi, na mi mas pas wantaim yupela. Han bilong diwai i no inap karim kaikai em yet sapos em i no pas long diwai wain, wankain tasol, yupela tu bai karim planti kaikai sapos yupela i pas long mi. ⁵ Mi yet mi diwai wain, na yupela i olsem han bilong diwai wain. Sapos wanpela man i pas wantaim mi na mi pas wantaim em, dispela man bai i karim planti kaikai tru, sapos yupela i lusim mi, yupela i no inap kamapim wanpela samting. ⁶ Sapos wanpela man i no pas wantaim mi, ol bai tromoi em olsem wanpela han bilong diwai i drai pinis, na ol bai tromoi dispela han i go insait long paia na paia bai kukim em olgeta. ⁷ Sapos yupela i pas long mi na tok bilong mi i stap insait long yupela, yupela i askim wanem samting yupela i laikim, bai yupela i kisim. ⁸ Long dispela Papa bilong mi bai kisim biknem, bai yupela i karim planti kaikai na yupela bai i stap disaipel bilong mi. ⁹ Olsem Papa i laikim mi, mi tu mi laikim yupela, olsem na yupela i mas i stap insait long laikim bilong mi. ¹⁰ Sapos yupela i bihainim lo bilong mi, bai yupela i stap insait long laikim bilong mi olsem mi bihainim lo bilong Papa bilong mi na mi stap insait long laikim bilong en. ¹¹ Mi mekim ol dispela tok long yupela long amamas bilong mi i ken i stap long yupela na amamas bilong yupela i ken pulap tru. ¹² Dispela em i lo bilong mi, yupela i ken laikim ol arapela wankain olsem mi bin laikim yupela. ¹³ I no gat wanpela man i gat bikpela laik we em inap long lusim laip bilong em yet long ol pren bilong en. ¹⁴ Yupela bai stap pren bilong mi sapos yupela i mekim olgeta samting mi bin tokim yupela. ¹⁵ Mi no moa kolim yupela wokboi, long wanem, wokboi i no save wanem samting bikman bilong en i wok long mekim. Mi kolim yupela pren, long wanem, mi bin tokim yupela olgeta samting mi bin harim long Papa bilong mi. ¹⁶ Yupela i no bin makim mi, tasol mi bin makim yupela long go na karim kaikai, na dispela kaikai bilong yupela bai i stap. Em olsem na sapos yupela i askim wanem samting long Papa insait long nem bilong mi, em bai i givim long yupela. ¹⁷ . Dispela ol tok mi givim long yupela, em yupela i mas laikim ol arapela. ¹⁸ Sapos ol man long graun i birua long yupela, yupela i mas save olsem pastaim ol i bin birua long mi na bihain ol i mekim long yupela. ¹⁹ Sapos yupela i bilong dispela graun, ol man long graun bai laikim yupela olsem bilong ol yet; tasol yupela i no bilong dispela graun na mi makim yupela aut long dispela graun, long dispela as ol bai birua long yupela. ²⁰ Yupela i mas tingim ol tok mi bin tokim yupela, "Wokboi i no winim tisa na i stap antap long bikman bilong en.' Sapos ol i mekim nogut long mi, ol bai mekim nogut long yupela tu; sapos ol i harim tok bilong mi bai ol i harim tok bilong yupela tu. ²¹ Ol bai mekim dispela olgeta samting long yupela long nem bilong mi, long wanem, ol i no save long em husait i bin salim mi na mi kam. ²² Sapos mi no kam na tokim ol, bai ol i no gat sin; tasol nau bai ol i no gat rot long haitim sin bilong ol. ²³ Sapos wanpela man i birua long mi, em i birua long Papa bilong mi tu. ²⁴ Sapos mi no bin wokim ol wok namel long ol we wanpela man i no bin mekim, bai ol i no gat sin; tasol nau ol i lukim na birua long mitupela Papa. ²⁵ Dispela pasin i wok long kamap long tok ol i raitim pinis long lo i ken karim kaikai: 'Ol i birua long mi nating tru.' ²⁶ Taim Helpim i kam, em bai mi salim i kam long Papa, em Spirit bilong Tok Tru, em i kam long Papa, em bai tokaut long wok bilong mi. ²⁷ Yupela tu bai tokaut long mi long ol arapela, long wanem, long stat yupela i bin stap wantaim mi.